Сяргеевічы (Менская вобласьць)

Сярге́евічы^[1] — вёска ў Пухавіцкім раёне Менскай вобласьці. Уваходзіць у склад Навапольскага сельсавету. Месьціцца за 43 км ад Мар’інай Горкі, 58 км ад Менску.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Сяргеевічы.

Сяргеевічы
трансьліт. Siarhiejevičy
Краіна:	Беларусь
Вобласьць:	Менская
Раён:	Пухавіцкі
Сельсавет:	Навапольскі
Насельніцтва:	417 чал. (2010)
Часавы пас:	UTC+3
Тэлефонны код:	+375 1713
Паштовы індэкс:	222825
Нумарны знак:	5
Геаграфічныя каардынаты:	53°29′38″ пн. ш. 27°45′8″ у. д.
Сяргеевічы на мапе Беларусі ± Сяргеевічы Сяргеевічы
Галерэя здымкаў у Вікісховішчы

Назва

Назва ўтвораная ад прозьвішча Сяргееў^[2].

Гісторыя

Вёска адносіцца да ліку старажытных пасяленьняў. У пісьмовых крыніцах вядомая з XVI ст., калі зьяўлялася ўласнасьцю Збароўскіх і ўваходзіла ў склад Менскага павету Вялікага Княства Літоўскага^[2]. У XVII ст. уласнасьць Радзівілаў. Пасьля 2-га падзелу Рэчы Паспалітай у складзе Расейскай імпэрыі, сяло Цітвянскай воласьці Ігуменскага павету Менскай губэрні.

У 1800 годзе вёска, 2 млыны, Георгіеўская царква, уласнасьць Ф. Букатага. У 1884 годзе адкрытая царкоўна-прыходзкая школа. У 1886 годзе распаўсюджаныя промыслы: прадзільны, ткацкі, шавецкі, кравецкі, выраб вапны. У 1897 годзе сяло, царкоўна-прыходзкая школа, хлебазапасны магазын, карчма, царква^[3].

Зь лютага па сьнежань 1918 году акупаваная войскамі Нямецкае Імпэрыі, з жніўня 1919 па ліпень 1920 году — войскамі Польшчы. У 1919 году ў БССР. У 1918 годзе адкрытая школа 1-й ступені (у 1922 годзе 70 вучняў)^[3].

З 20 жніўня 1921 году вёска, цэнтар Сяргеевіцкага сельсавету, Шацкага раёну Менскай акругі. З 26 ліпеня 1930 году ў Пухавіцкім раёне, з 12 лютага 1935 у Рудзенскім раёне, з 20 лютага 1938 у Менскай вобласьці.

У Другую сусьветную вайну, з канца чэрвеня 1941 да пачатку ліпеня 1944 году акупаваная войскамі нацысцкае Нямеччыны, якія ў 1944 годзе спалілі вёску, загубілі 42 жыхароў^[3]. Пасьля вайны вёска адноўленая.

З 20 студзеня 1960 у Пухавіцкім раёне.

Да 29 чэрвеня 2006 году — цэнтар Сяргеевіцкага сельсавету. 29 чэрвеня 2006 году вёска перададзеная зь ліквідаванага Сяргеевіцкага сельсавету ў склад Праўдзінскага пасялковага сельсавету^[4].

Да 28 траўня 2013 году ў Праўдзінскім пасялковым савеце. Пасьля скасаваньня Праўдзінскага пасялковага савету ўключаная ў Навапольскі сельсавет^[5].

Насельніцтва

• 1800 год — 22 двары, 171 жыхар
• 1886 год — 28 двароў, 262 жыхары
• 1897 год:
  • сяло — 78 двароў, 440 жыхароў
  • маёнтак — 12 жыхароў
• 1908 год:
  • сяло — 97 двароў, 571 жыхар
  • маёнтак — 4 жыхары
• 1917 год:
  • сяло — 115 двароў, 667 жыхароў
  • маёнтак — 45 жыхароў
• 1940 год — 140 двароў, 560 жыхароў
• 1999 год — 506 жыхароў
• 2010 год — 417 жыхароў