Войны-Ясянецкія

Войны-Ясянецкія — літоўскі шляхецкі род гербу Гакі.

Войны-Ясянецкія лац. Vojny-Jasianieckija
Герб Гакі
Краіна паходжаньня	Вялікае Княства Літоўскае

Прозьвішча

Асноўны артыкул: Война

Вуйна, Вуна або Вона (Uuenna, Wuono^[1], Vunna, Wona) — імя германскага паходжаньня^[2][3]. Іменная аснова -вуйн- (-войн-, -вун-) (імёны ліцьвінаў Вайніла, Войнар, Войнат; германскія імёны Vuinla, Wunar, Wonnat) паходзіць ад старагерманскага wunna, гоцкага wunands 'шчаснасьць, задаволенасьць', ісьляндзкага vænn 'прыемны', нямецкага gewohnt 'задаволены'^[4]. Такім парадкам, імя Война азначае 'шчасны'^[3].

Гісторыя

Паходжаньне роду зьвязваюць зь віцебскімі баярамі Рамейкавічамі. Сын аднаго зь іх, Война Богушавіч Рамейка, у сярэдзіне XVI стагодзьдзя служыў княгіні Астроскай і яе другому мужу Альбрэхту Ласкаму, валодаў невялікім маёнткам Ясенцам на рацэ Сэрвачы у Наваградзкім павеце. У 1567 годзе ён выстаўляў у войска аднаго вершніка. Яго нашчадкі — павятовая шляхта ў Віцебскім, Наваградзкім і Мазырскім паветах — ужывалі прозьвішча Войны-Ясянецкія (часам з даданьнем старога прозьвішча Рамейка) і карысталіся ўласным гербам, які адрозьніваўся ад гербу астатніх Рамейкавічаў дадаткам паўмесяца з зоркай уверсе гербавай выявы^[5].