Шубічы

Шу́бічы^[2] — вёска ў Пружанскім раёне Берасьцейскай вобласьці. Уваходзіць у склад Шаняўскога сельсавету. Знаходзіцца за 5 км на захад ад Пружанаў, 17 км ад чыгуначнай станцыі Аранчыцы на лініі Баранавічы — Берасьце.

Шубічы
трансьліт. Šubičy
Краіна:	Беларусь
Вобласьць:	Берасьцейская
Раён:	Пружанскі
Сельсавет:	Шаняўскі
Вышыня:	171 м н. у. м.
Насельніцтва:	64 чал. (2010)
Часавы пас:	UTC+3
Тэлефонны код:	+375 1632
Паштовы індэкс:	225170[1]
СААТА:	1256880091
Нумарны знак:	1
Геаграфічныя каардынаты:	52°32′48″ пн. ш. 24°22′55″ у. д.
Шубічы на мапе Беларусі ± Шубічы Шубічы

Геаграфія

Даўней вёска з усіх бакоў была акружаная лесам. Лес з поўначы (Камароўшчына), бярозавы гай з захаду (Казюмрынак) і сасновы бор з усходу захаваліся. З поўдню за ворнымі землямі і поплавам пачынаўся малады алешнік (Пагоня), за савецкім часам пасьля мэліярацыі пераўтвораны ў ворыва^[3].

Мінуўшчына

У 1563 — у Чахецкім вайтоўстве, належыць да Дабучынскага двару Кобрынскай эканоміі (Вялікае Княства Літоўскае)^[4].

За расейскім часам — вёска ў Міхайлаўскай воласьці Пружанскага павету Гарадзенскай губэрні^[5]. На пачатку XX стагодзьдзя 224 жыхары; маёнтак Шубічы — 6 жыхароў.

За польскім часам — фальварак^[6] і вёска ў гміне Шані^[7], а з 1926 року — у гміне Пружана Пружанскага павету Палескага ваяводзтва^[8]. У 1921 року 244 жыхары, 61 двор. У фальварку Шымана Бжэзінскага^[9] (Брызінскага) вырошчваліся бульба й агародніна; мелася 50 дойных кароваў, коні, сьвіньні; сыраварня^[3].

Зь верасьня 1939 року ў складзе БССР, з 15 студзеня 1940 — у Пружанскім раёне Берасьцейскай вобласьці. Адразу па прыходзе Саветаў маёмасьць Бжэзінскіх канфіскаваная. Перад вайной тры сыны Бжэзінскіх эмігравалі ў ЗША, а ўласьнік маёнтку з жонкай і чацьвертым сынам пераехалі ў Пружаны. Далейшы іхні лёс невядомы^[3]. Панскі маёнтак быў аддадзены на кватэры вайскоўцам, у клуні круцілі кіно.

Па вайне ў 1944 року ў Шубічах была адчыненая пачатковая школа, якая разьмясьцілася ў тым самым маёнтку Бжэзінскіх. У кастрычніку 1949 створаны калгас «Малады бальшавік», у 1950 далучаны да шаняўскога «Ленінскага шляху» (цяпер ААТ «Шані-аграпрадукт»)^[3].

Насельніцтва

• XX стагодзьдзе: 1959 год — 314 жыхароў, 85 двароў (перапіс); 1970 год — 296 жыхароў; 1999 год — 102 жыхары
• XXI стагодзьдзе: 2003 год — 94 жыхары, 49 двароў; 2005 год — 89 жыхароў, 48 двароў^[10]; 2010 год — 64 жыхары

Транспарт

Аўтамабільная дарога Н535 Пружаны — Шубічы — Клятное^[11].

Асобы

• Сяргей Бабрук — Герой Савецкага Саюзу
• Васіль Курачынскі — дырэктар Палацу культуры г. Пружаны