Інстытут прадпрымальніцкай дзейнасці

Інстытут прадпрымальніцкай дзейнасці (ІПД) — беларуская прыватная вышэйшая навучальная ўстанова ў 1992—2024 гадах у Мінску.

Установа адукацыі "Інстытут прадпрымальніцкай дзейнасці" (УА "ІПД")
Міжнародная назва	Institute of Entrepreneurial Activity
Заснаваны	1992
Год закрыцця	2024
Рэктар	Віктар Леанідавіч Цыбоўскі
Краіна	Беларусь
Размяшчэнне	Мінск
Метро	Пралетарская
Юрыдычны адрас	Мінск, 220033, вул. Серафімовіча 11
Сайт	uoipd.by

Гісторыя

Заснаваны ў 1992 годзе рашэннем савета народных дэпутатаў Ленінскага раёна Мінска (пратакол № 14 ад 14.07.1992), ініцыятывай акадэміка Сяргея Сяргеевіча Атаева^[1]. У 2004 годзе ВНУ атрымала назву «Прыватная ўстанова адукацыі „Інстытут прадпрымальніцкай дзейнасці“».

Да 2011 года Інстытут займаў два будынкі: акрамя асноўнага на вул. Серафімовіча, 11, заняткі праводзіліся на вул. Пляханава, 8. З 2011 года ўстанова месціцца толькі ў будынку па вул. Серафімовіча каля самай станцыі метро «Пралетарская».

З 2014 года Інстытут прадпрымальніцкай дзейнасці з’яўляецца афіцыйным цэнтрам падтрымкі прадпрымальніцтва і зарэгістраваны Міністэрствам эканомікі Рэспублікі Беларусь у якасці базавага цэнтра падтрымкі прадпрымальніцтва (пасведчанне № 45 ад 30 лістапада 2014 года).

З 2015 года ІПД дае студэнтам дзённага аддзялення месцы ў інтэрнатах, якія знаходзяцца ў арандаваных памяшканнях на вул. Серафімовіча, 8а, Судмаліса 7 (інтэрнат БДПУ) і некалькіх іншых месцах Мінска.

Інстытут мае ліцэнзіі Міністэрства адукацыі Рэспублікі Беларусь на падрыхтоўку спецыялістаў з вышэйшай адукацыяй першай ступені (бакалаўрыят) па спецыяльнасцях: «Сучасныя замежныя мовы», «Эканоміка і кіраванне прадпрыемствам», «Бізнес-адміністраванне», «Эканоміка і кіраванне турыстычнай індустрыяй», «Камерцыйная дзейнасць», «Маркетынг», «Турызм і гасціннасць». Максімальна магчымая колькасць студэнтаў вочнай (дзённай) формы навучання, вызначаная міністэрствам для інстытута, складае 750 чалавек, завочнай формы навучання — 2000 чалавек.

У пастанове калегіі Мінадукацыі РБ № 1 ад 19.01.2024 было адзначана: «У шэрагу ўстаноў адукацыі прыватнай формы ўласнасці не забяспечваюцца неабходныя ўмовы дзейнасці моладзевых грамадскіх аб’яднанняў», — сярод гэтых устаноў згаданы ІПД^[2].

Заснавальнікі і кіраўніцтва інстытута прынялі рашэнне спыніць адукацыйную дзейнасць з 1 верасня 2024 года. Рашэнне было апублікавана 24 чэрвеня 2024 года^[3]. Прыём абітурыентаў быў спынены, студэнты другога і старэйшых курсаў пераведзены ў іншыя ВНУ (БДЭУ, МДЛУ і іншыя)^[4]. Агулам было пераведзена каля 500 студэнтаў^[5].

Вядомыя асобы ІПД

• Сяргей Атаеў — беларускі акадэмік, заснавальнік ВНУ;
• Міхаіл Грабоўскі — беларускі хакеіст — выпускнік 2012 года^[6].
• Антон Матолька — блогер, грамадскі актывіст, выпускнік 2013 года^[7]

Выданні ІПД

• Весці Інстытута прадпрымальніцкай дзейнасці, навукова-практычны часопіс, які публікуецца ў чэрвені і снежні кожнага года;
• Студэнцкая газета «World of Wisdom»^[8], выдаецца як альманах;
• Зборнік навуковых артыкулаў «Эканоміка і прадпрымальніцтва» ^[9], выдаецца штогод.

Цікавыя факты

• Студэнты ІПД прымалі ўдзел у стварэнні зборніка дакументаў па гісторыі ЗША ў беларускім перакладзе^[10].

Крытыка і водгукі

У 2009 годзе шэраг студэнтаў Інстытута правялі анлайн дыскусію УКантакце пра тое, што ім падабаецца і не падабаецца ў ІПД^[11]. У асноўным крытыкаваліся тэхнічныя нязручнасці: марудны інтэрнэт, праблемы з ліфтам. Адносіны да супрацоўнікаў і студэнтаў былі неадназначнымі і месцамі суб’ектыўнымі.

31 кастрычніка 2013 года рэктар Інстытута Віктар Цыбоўскі ўзнагароджаны медалём «За працоўныя заслугі»^[12]. Акрамя гэтага, уласна Інстытут мае шэраг ліцэнзій і сертыфікатаў, якія сведчаць пра адпаведнасць дзейнасці ВНУ дзяржаўным стандартам Беларусі.

З іншага боку ў Сеціве кіраўніцтва Інстытута крытыкуецца за аўтарытарны падыход да выкладчыкаў^[13].

Зноскі

1. История Института Архівавана 10 красавіка 2015. // Официальный сайт ИПД
2. Пастанова калегіі Міністэрства адукацыі РБ ад 19.01.2024 № 1, с. 2
3. ИПД: Информационное сообщение!
4. По вопросам перевода… // Сайт ИПД
5. Минобр: о преподавателях закрытых вузов были запросы из других университетов // Точка BY, 08.09.2024
6. Хакей. Міхаіл Грабоўскі: другая вышэйшая! // Прессбол
7. Паводле даных яго старонак у сацыяльных сетках
8. Студэнцкая газета «World of Wisdom» Архівавана 29 верасня 2014.
9. Зборнік Архівавана 8 красавіка 2015.
10. Гісторыя ЗША ў дакументах
12. Архівавана 1 ліпеня 2014.
13. Тэракт у мінскім метро 11 красавіка 2011 г. // Блог Андрэя Берастоўскага