Бярозаўскі мясакансервавы камбінат

«Бярозаўскі мясакансервавы камбінат» — дзяржаўнае харчовае прадпрыемства Беларусі, заснаванае ў сакавіку 1978 года ў якасці Бярозаўскага мясакамбіната (Брэсцкая вобласць).

«Бярозаўскі мясакансервавы камбінат»
Тып	адкрытае акцыянернае таварыства
Заснаванне	16 сакавіка 1978 (47 гадоў таму)
Заснавальнікі	Міністэрства мясной і малочнай прамысловасці СССР
Уладальнікі	«Брэстмясамалпрам» (98%)
Краіна	Беларусь
Размяшчэнне	Брэсцкая вобласць
Адрас	Бяроза, вул. Свярдлова, д. 1[1]
Ключавыя постаці	Уладзімір Жуковіч (генеральны дырэктар), Аляксандр Рудзь (галоўны інжынер)
Галіна	харчовая прамысловасць
Прадукцыя	мясныя кансервы, каўбаса, корм для жывёл, мясныя паўфабрыкаты, пельмені, сасіска, стэйк
Уласны капітал	74,9 млн Br (2022)[2]
Абарот	▲260,821 млн рублёў (2021 год)[3]
Аперацыйны прыбытак	▲8,467 млн рублёў (2021 год)
Чысты прыбытак	▼2,938 млн рублёў (2021 год)
Актывы	115 млн Br (2022)[2]
Колькасць супрацоўнікаў	1248 (2022 год)
Аўдытар	ТДА «Фораўдыт» (Смаргонь)[4]
Дэвіз	Якасць прадукцыі сёння — наш дабрабыт заўтра
Матчына кампанія	канцэрн «Брэстмясамалпрам»[5]
Сайт	meat.by

На 2023 год уключаў кансервавы, каўбасна-кулінарны і мясатлушчавы цэхі магутнасцю 100 000 слоікаў, 25 тонаў каўбасы і 120 тонаў мяса за змену адпаведна, а таксама халадзільнік на 4400 тонаў і хлебабулачную пякарню магутнасцю 350 кг вырабаў за змену. Дапаможныя збудаванні ўключалі аміячна-кампрэсарны цэх і кацельню, а таксама 7 участкаў: рамонтна-механічны і рамонтна-будаўнічы, электраўчастак, кантрольна-вымяральных прыбораў і аўтаматыкі (КВПіА), ацяплення і вентыляцыі, водазабеспячэння і водаадвядзення, аўтатранспартны. Сярод іншага, у Баранавічах дзейнічаў вытворчы цэх. «Бярозаўскі МКК» вырабляў мясныя кансервы і паўфабрыкаты, каўбасы і корм для жывёл, булкі і хлеб, а таксама бляшанкі^[6]. На прадпрыемстве дзейнічала праграмная платформа «Гедымін:Мясакамбінат» (руск.: Гедымин:Мясокомбинат) на 150 аўтаматызаваных рабочых месцаў, якая аб’ядноўвала ў сабе перадзабойную базу, цэхі і маркіроўку вырабаў^[7].

Збытавая сетка

На 2023 год фірмовы гандаль «Бярозаўскага МКК» ахопліваў 26 уласных крам «Мясны свет», з іх 10 у Бярозе і 3 у Баранавічах, па 2 у Брэсце і Івацэвічах, па адной у Мінску і Магілёве, Белаазёрску і Драгічыне, Каменцы і Косаве, Пружанах і Новых Засімавічах, а таксама ў Першамайскай^[8]. У сталіцы Расіі дзейнічала збытавое прадстаўніцтва^[9].

Вырабы

На 2023 год Бярозаўскі мясакансервавы камбінат вырабляў:

• вараную і варана-вэнджаную, паўвэнджаную і субпрадуктную, сыравэнджаную і сыравяленую каўбасу;
• сасіскі і сардэлькі;
• брэзаолу і палачкі, суджук і чыпсы з ялавічыны, вяндліну і грудзінку, кумпяк і лапатку, паляндвіцу і філе, шыйку і шынку са свініны^[10];
• смалец і шпік;
• крылы і тушкі куранят, бужаніну і бекон, рулет і рульку, руляду і рэбры, а таксама шчакавіну са свініны^[11];
• мясную выразку і катлеты, катлетнае мяса і рагу, фарш і шашлык^[12];
• пельмені «Сябрукі»;
• 53 найменні стэрылізаваных кансерваў, у тым ліку з індычкі, качкі і кураня ў соусе, тушанай каніны і 14 з тушанай ялавічыны, тры з ялавічыны ў соусе і адно ў булёне, гуляш з ялавічыны і кашы з мясам, а таксама паштэты^[13];
• вяндлінныя пастэрызаваныя кансервы, у тым ліку з ялавічыны;
• 17 найменняў кармоў для катоў і сабак;
• мармуровыя стэйкі з ялавічыны^[14].

Гісторыя

У лістападзе 1972 года ў Бярозе (Беларуская ССР) пачалі ўзводзіць мясакамбінат паводле праекта Мінскага аддзялення «Лендзіпрамясамалпраекта». Пад камбінат адвялі 20,2 гектараў зямлі. У 1975 годзе набылі халадзільнік на 4000 тоны мяса. У 1976 годзе запусцілі мясатлушчавы цэх магутнасцю 120 тона мяса за змену і 2-ю чаргу халадзільніка на 400 тонаў мяса. У 1977-м дабудавалі мясаперапрацоўчы цэх з выпускам 15 тонаў каўбасы за змену і 20 тонаў паўфабрыкатаў і фасаваных вырабаў пры агульнай магутнасці 45 тонаў перапрацаванага мяса ў змену. 16 сакавіка 1978 года міністр мясной і малочнай прамысловасці СССР С.Ф. Літвінаў падпісаў Указ № 9 аб увядзенні ў эксплуатацыю Бярозаўскага мясакамбіната магутнасцю 120 тонаў мяса і 15 тонаў каўбасы ў змену з халадзільнікам на 4400 тонаў^[15].

У 1978 годзе дабудавалі кансервавы завод магутнасцю 100 000 слоікаў за змену, з іх 20 000 туб вяндлінных пастэрызаваных кансерваў, з халадзільнікам на 500 тонаў, а таксама літаграфскі цэх. Пасля гэтага прадпрыемства пераўтварылі ў Бярозаўскі мясакансервавы камбінат. У наступныя гады ўзвялі сталовую і пункт аховы здароўя, цяпліцу і 2 інтэрнаты, аздараўленчы лагер «Бярозка» і 12 жылых шматкватэрных дамоў для супрацоўнікаў камбіната^[15]. На 1996 год Бярозаўскі мясакансервавы камбінат выпускаў мяса і субпрадукты, каўбасы і паўфабрыкаты, стэрылізаваныя кансервы і пастэрызаваную вяндліну, харчовы тлушч і сухі корм, а таксама скураную сыравіну^[16].

У маі 2001 года «Бярозаўскі МКК» пераўтварылі ў камунальнае ўнітарнае прадпрыемства. У 2002 годзе адкрылі хлебабулачную пякарню магутнасцю 350 кг вырабаў у змену. 29 снежня 2003 года прадпрыемства пераўтварылі ў адкрытае акцыянернае таварыства. У наступныя гады стварылі сетку ўласных фірмовых крам у Белаазёрску і Брэсце, Бярозе і Драгічыне, Івацэвічах і Кобрыне, Косаве і Пружанах. Сярод іншага, у Бярозе налічвалася 3 уласныя фірмовыя крамы і 3 павільёны^[15].

Кіраўнікі

• Уладзімір Жуковіч (са снежня 2000 года)^[15]