Маладзечанскі завод металаканструкцый

«Маладзечанскі завод металаканструкцый» (МЗМК) — найбольшы ў Еўропе завод будаўнічых матэрыялаў з металу, заснаваны ў снежні 1968 г. у Маладзечне (Мінская вобласць, Беларусь)^[3]. На 2015 г. прадпрыемства мела звыш 560 прылад абсталявання магутнасцю звыш 30 тыс. тон металаканструкцый за год. Асноўным абсталяваннем былі: пракатны стан магутнасцю звыш 110 тыс. тон за год для выпуску гнутазварных профіляў квадратнага і прамавугольнага сячэння, электразварных труб і гнутых швелераў; пракатная лінія магутнасцю звыш 40 тыс. тон за год для вырабу стальных ліставых гнутых профіляў з трапецыяпадобнымі гофрамі з ацынкавана-афарбаванай сталі (профнасціл); аўтаматычная лінія вытворчасці трохслойных сценавых і дахавых сэндвіч-панэляў з напаўняльнікам з мінеральнай ваты. У 2012 г. вытворчасць завода перавысіла спажыванне будаўнічых металаканструкцый у Беларусі^[4].

«Маладзечанскі завод металаканструкцый»
Тып	Адкрытае акцыянернае таварыства
Заснаванне	29 снежня 1968
Краіна	Беларусь
Размяшчэнне	Маладзечна (Мінская вобласць, Беларусь)
Адрас	Маладзечна
Ключавыя постаці	Алег Меснік
Галіна	Прамысловасць будаўнічых матэрыялаў
Прадукцыя	Агароджа, вежа, сэндвіч-панэль, электразварная труба, цяпліца, швелер
Абарот	▼128,173 млрд рублёў[1] (2015; $7,994 млн)[2]
Аперацыйны прыбытак	▲-85,750 млрд руб. (2015; -$5,348 млн)
Чысты прыбытак	▲-85,774 млрд руб. (2015; -$5,349 млн)
Дэвіз	Вашыя праекты ў рэчаіснасць
Матчына кампанія	Міністэрства архітэктуры і будаўніцтва Рэспублікі Беларусь
Сайт	mzmk.by

З 2000 г. завод быў асноўным пастаўшчыком металаканструкцый для шэрагу буйных будынкаў:

• у Беларусі: звыш 2000 вежаў сотавай сувязі па 70 метраў вышынёй (2000—2012), Нацыянальная бібліятэка Беларусі (2002—2006), завод газетнай паперы (Шклоў, Магілёўская вобласць, 2005—2008), Мінск-Арэна (2006—2008), Летні амфітэатр (Віцебск, 2007), Мінскі цэнтр фрыстайлу (2009—2015), «Крычаўцэментнашыфер» (Магілёўская вобласць, 2008—2013), Беларускі цэментны завод (Касцюковічы), «Ваўкавыскцэментнашыфер» (Гродзенская вобласць), завод цынкавання (Ліда, Гродзенская вобласць), 9 лядовых палацаў (Бабруйск, Баранавічы, Брэст, Віцебск, Орша, Гомель, Ліда, Маладзечна);
• за мяжой: завод металакорду (Ліпецк, Расія), завод паркетнай дошкі (Вінніца, Украіна), завод сухіх сумесяў (Астана, Казахстан), радыёмаякі ў партах Балтыйскага мора (Клайпеда, Літва; Балтыйск, Калінінградская вобласць, Расія), Калінінградская ЦЭЦ-2, Сланцаўскі цэментны завод (Ленінградская вобласць, Расія), Іжорскі трубны завод (Пецярбург, 2005), завод «Кірышынафтааргсінтэз» (Ленінградская вобласць)^[4].

Зноскі

1. Справаздача аб дзейнасці ААТ за 2015 год (руск.)(недаступная спасылка). Міністэрства фінансаў Рэспублікі Беларусь (14 кастрычніка 2016). Архівавана з першакрыніцы 10 мая 2021. Праверана 26 сакавіка 2020.
2. Сярэднеўзважаны курс беларускага рубля ў адносінах да замежных валют на валютным рынку Рэспублікі Беларусь за 2015 год (16 034,24 за долар). Нацыянальны банк Рэспублікі Беларусь. 2016. Праверана 14 жніўня 2016.
3. Маладзечанскі завод металаканструкцый (Мінская вобласць) (нявызн.). Нацыянальная бібліятэка Беларусі (14 кастрычніка 2015). Праверана 14 жніўня 2016.
4. Іван Бараноўскі. Металаканструкцыі з Маладзечна: надзейнасць і бяспека // Звязда : газета. — 21 сакавіка 2012. — № 53 (27168). — С. 4-5. — ISSN 1990-763x.(недаступная спасылка)