聖方濟各·沙勿略

聖方濟各·沙勿略（西班牙語：San Francisco Javier，1506年4月7號—1552年12月3號），西班牙籍天主教傳教士，也是耶穌會創始人之一，首先擔天主教信仰傳播到亞洲個馬六甲搭日本。天主教會稱之為「歷史丄最偉大個傳教士」；是「傳教士個主保」。天主教會同時尊其爲中國、日本，以及果阿、澳門兩個教區之主保，瞻禮定在每年12月3日。

聖方濟各·沙勿略畫像 典藏在日本神戶市立博物館

一幅以聖方濟各·沙勿略帶華人施洗為題個彩繪玻璃窗（局部圖，攝在香港伯大尼修院）

早年生活

1506年，方濟各·沙勿略生在乃朝西班牙北面納瓦拉沙勿略堡個一個巴斯克望族家庭。1512年，西班牙人入侵納瓦爾，當地交關家族個城堡包括沙勿略屋裏，全在昰歇畀人摧毀脫，而佢場個領地乃末也失去脫。1515年，沙勿略個父親離世。

1525年，19歲個沙勿略前往法國巴黎大學聖巴巴拉學院攻讀哲學，五年後獲碩士學位，開始擔任講師。在巴黎有一位比佢年長十五歲個同鄉依納爵·羅耀拉搭佢一淘租房子住。昰位同鄉追求個是天主個光榮，佢常莊話畀沙勿略一句《聖經》裏向個金句：「人縱然賺得了全世界，卻賠上了自家個靈魂，為佢有啥些益處呢？」（瑪竇十六:26）。經過依納爵長遠個薰陶，沙勿略個思想也逐漸改變爻，乃末加入仔追隨依納爵個行列。

1534年8月15日，羅耀拉、沙勿略等七人在巴黎個蒙馬特高地，共同誓發神貧搭貞潔個誓願，創立耶穌會，佢場原本想前往耶路撒冷，但畀教宗保祿三世阻止。1540年9月27日，教宗保祿三世正式批准成立耶穌會，命羅耀拉成為第一任會長。沙勿略嚜，受命成為耶穌會個首批傳教士。

伊歇葡萄牙國王約翰三世歡迎耶穌會教士前往葡萄牙開闢個東方地區去傳教。1540年，沙勿略到仔葡萄牙。1541年佢另外兩個夥伴沿牢仔葡萄牙人開闢個東方航海路線，去印度、中國、日本咾啥場許傳教。

傳教工作

印度

1541年4月7日，沙勿略、卡瑪利諾（M. P. de Camerino）搭曼西亞（F. Mansillas）從葡萄牙里斯本出發。

1542年5月6日，沙勿略抵達葡萄牙在印度個中心地果阿。剛到嘸沒幾許辰光，沙勿略還朆學歇地方語言、文化、風俗習慣，就在印度德干半島東南沿海個漁村畀交交關關個人付洗。

1545年一月，方濟各·沙勿略寫仔昰然一封信：「在一個號頭之內，我付洗個人超過一萬。我個方法是：當我來到伊排要皈依基督個外教人蹲拉個村莊辰光，我擔所有個男人搭小囡全聚集在一淘，以宣呼天主聖父、聖子搭聖神個聖名為開始，並讓佢場作三次十字聖號，呼求天主聖叄之名，承認衹有一位天主。挨落來，我場誦念《悔罪經》、《信經》、《天主十誡》、《天主經》、《聖母經》搭《讚頌聖母經》。在兩年之內，我擔昰眼祈禱經文全譯成功佢場個語言，我自家也會背誦。慢慢叫嚜，大人小囡全科會得重覆誦念昰眼經文。祈禱好仔嚜，我畀佢場解釋《信經》各信條搭《天主十誡》個意義。然後，我要佢場公開為自家過去個生活請求天主寬恕。講道結束仔嚜，我問佢場是弗是真正相信《信經》各信條個內容，眾人異口同聲回答相信；乃末，我高聲誦念每個信條，每念完一個信條，我就問佢場是否相信；佢場乃末雙手交叉作十字狀，放在胸前，齊聲回答相信。就昰然，我就畀佢場付洗，並用筆寫交畀佢場每個人一隻聖名。男人領洗後，回到屋裏，又叫佢場個妻子搭家人到我箇𡍲來。我用同樣個方式畀佢場付洗。當大家全部領好洗，我就吩咐佢場擔廟宇搭偶像全部摧毀脫。」

1545年8月底，沙勿略從馬拉巴前往馬六甲，直到1546年1月纔離開前往摩鹿加群島傳教。1547年佢又回到馬六甲，並在該年8月與日人彌次郎見面。

日本

1549年8月15日（聖母升天節），方濟各·沙勿略在一位日本朋友彌次郎個引介之下，攜同兩位耶穌會士（島來斯神父、斐迪南修士）經馬六甲海峽，輾轉抵達彌次郎個家鄉，日本南部九州個鹿兒島。成為第一位踏上日本國土個天主教傳教士。年底，鹿兒島已經有一百五十人、附近地區有四百五十人領洗入教。

沙勿略登陸日本後，馬上發覺日本個情況搭印度大異其趣，日本人個生活習慣，思想文化原來比印度複雜得多。佢意識到弗能擔在印度使用個傳教方法搬到日本，在箇𡍲首先必須學習日本語言，認識日本文化，哲學思想，並採用日本人個風俗習慣，而且要花費交交關關辰光纔足以使一個人皈依基督。沙勿略從日本寫回歐洲個信隔手畀人公布出來，吸引仔無數人個興趣，也產生極大個共鳴。一時，佢畀人推崇為現代個傳教士。

儘管佢得到地方大名個支持，外加打算到京都謁見天皇並取得日本全國傳教之權，但兩者全未成功。乃末佢在1551年離開日本，前往中國。昰歇日本有教友一千。在日本個鹿兒島現今還樹立着沙勿略個紀念碑。

中國

沙勿略發覺，中國文化對日本個影響很深，於是決心儘早訪問中國。但當時，外國傳教士要進入中國是一樁邪氣困難的事情。1552年，佢組織了一個赴中國個葡萄牙使團，參見明朝皇帝。但5月底使團在馬六甲畀長官亞戴德（Alv.d,'Ataide）扣留。乃末佢決心獨自前往中國，1552年8月底，佢擔距離中國廣東海岸老近個上川島（屬於台山）作為基地，計劃偷渡入境。但是，答應幫助佢場偷渡個中國商人反悔，遲遲弗來。

1552年12月3日晨，沙勿略因瘧疾病逝在島丄，年僅46歲，終朆達成進入中國個心願。同年10月6日，利瑪竇生在意大利馬切拉塔（Macerata）。三十年後，利瑪竇成功個擔天主教傳入明帝國。耶穌會在1847年至1853年建造在中國個第一座主教座堂時就擔其命名為聖方濟各沙勿略堂（上海董家渡）。

紀念

據說，沙勿略個屍體長期弗腐爛，一路向人展示，到1554年纔安葬在印度果阿。1662年沙勿略畀教會列為聖徒，佢個墓地也成為朝拜個聖地。同時，馬六甲、羅馬搭澳門聖若瑟修院全珍藏着沙勿略個部份遺髑。

命名

天主教堂

• 上海董家渡聖方濟各沙勿略堂

中學

• 光啟學校 ( Xavier School )
• 上海聖芳濟書院
• 香港嘉諾撒聖方濟各書院
• 香港荃灣聖芳濟中學
• 台灣桃園市私立振聲高級中學(St. Francis Xavier High School)

小學

• 香港嘉諾撒聖方濟各學校

參見

• 耶穌會
• 聖依納爵·羅耀拉