Рэпля

Рэ́пля^[1] — вёска ў Беларусі, каля раці Верацёйкі. Уваходзіць у склад Вярэйкаўскага сельсавету Ваўкавыскага раёну Гарадзенскай вобласьці. Насельніцтва на 2010 год — 509 чал. Знаходзіцца за 40 км на паўночных захад ад Ваўкавыску, за 15 км ад чыгуначнай станцыі Рось, каля аўтамабільнай дарогі Масты — Вялікая Бераставіца.

Рэпля лац. Repla
Касьцёл Найсьвяцейшай Панны Марыі
Краіна:	Беларусь
Вобласьць:	Гарадзенская
Раён:	Ваўкавыскі
Сельсавет:	Вярэйкаўскі
Насельніцтва:	509 чал. (2010)
Часавы пас:	UTC+3
Тэлефонны код:	+375 1512
Паштовы індэкс:	231915
СААТА:	4208804119
Нумарны знак:	4
Геаграфічныя каардынаты:	53°18′41″ пн. ш. 24°12′12″ у. д.
Рэпля на мапе Беларусі ± Рэпля Рэпля
Галерэя здымкаў у Вікісховішчы

Рэпля — даўняе мястэчка гістарычнай Ваўкавышчыны (частка Наваградчыны).

Гісторыя

Вялікае Княства Літоўскае

Упершыню Рэпля ўпамінаецца ў XVI стагодзьдзі. З 1558 году ёй валодалі Станіслаў Адахоўскі, Мікалай Ясенскі, Іван Карп, Масальскіх, у 1620-я гады перайшла да Сцыпіёнаў, пазьней Юрыя Валовіча.

На 1690 год у Рэплі было 12 двароў, дзеяў касьцёл, працавалі карчма і млын.

Пад уладай Расейскай імпэрыі

Касьцёл, да 1945 г.

У выніку трэцяга падзелу Рэчы Паспалітай (1795 год) Рэпля апынулася ў складзе Расейскай імпэрыі, у Ваўкавыскім павеце Гарадзенскай губэрні. На 1796 год існавалі аднайменныя фальварак і прыватнае мястэчка ў валоданьні Юзэфа Завадзкага. На 1836 год існавалі прыватны і духоўны фальварак пад назвай Рэплі, дзе было 3 двары, дзеяў касьцёл.

За часамі Першай сусьветнай вайны ў 1915 годзе Рэплю занялі войскі Нямецкай імпэрыі.

Найноўшы час

25 сакавіка 1918 году згодна з Трэцяй Устаўной граматай Рэпля абвяшчалася часткай Беларускай Народнай Рэспублікі. 1 студзеня 1919 году ў адпаведнасьці з пастановай І зьезду КП(б) Беларусі яна ўвайшла ў склад Беларускай ССР^[2]. Згодна з Рыскай мірнай дамовай 1921 году Рэпля апынулася ў складзе міжваеннай Польскай Рэспублікі, у Ваўкавыскім павеце Беластоцкага ваяводзтва.

У 1939 годзе Рэпля ўвайшла ў БССР, дзе 12 кастрычніка 1940 году стала цэнтрам сельсавету. На 2001 год тут было 184 двары, на 1 студзеня 2004 году — 177. У 2000-я гады Рэпля атрымала афіцыйны статус «аграгарадку». 18 кастрычніка 2013 году ў зьвязку зь ліквідацыяй Рэплеўскага сельсавету вёску перадалі ў склад Вярэйкаўскага сельсавету^[3].

Насельніцтва

Дэмаграфія

• XIX стагодзьдзе: 1836 год — 53 чал.
• XX стагодзьдзе: 1914 год — 107 чал.; 1999 год — 469 чал.
• XXI стагодзьдзе: 2001 год — 529 чал.^[4]; 1 студзеня 2004 году — 498 чал.; 1 студзеня 2007 году — 582 чал.; 2010 год — 509 чал..

Інфраструктура

У Рэплі працуюць сярэдняя і музычная школы, дашкольная ўстанова, дом культуры, пошта.

Турыстычная інфармацыя

Славутасьці

• Капліца-пахавальня (пачатак XX ст.)
• Касьцёл Найсьвяцейшай Панны Марыі (пачатак XX ст.)

Страчаная спадчына

• Касьцёл (1732^[5], разабраны ў 1900-я)

Галерэя

• Краявіды Рэплі
• 
  Касьцёл, брама
• 
  Касьцёл, інтэр’ер
• 
  Касьцёл, алтар
• 
  Капліца-пахавальня