Сарэйка

Сарэйка (Сарака, Сарка, Зарык, Шарэйка, Шарка, Жарэйка), Сярэйка (Сэрэйка, Серака) — мужчынскае імя і вытворнае ад яго прозьвішча.

Saricho
Паходжаньне
Мова(-ы)	германскія
Утворанае ад	Сар + суфікс з элемэнтам -к- (-k-)
Іншыя формы
Варыянт(ы)	Сарака, Сарка, Зарык, Сярэйка, Сэрэйка, Серака, Шарэйка, Шарка, Жарэйка
Вытворныя формы	Сірэйка
Зьвязаныя артыкулы
якія пачынаюцца з «Сарэйка»

Паходжаньне

Асноўны артыкул: Імёны ліцьвінаў

Сарыка, Сарака або Серэка (Saricho, Saracho, Serecho^[1]) — імя германскага паходжаньня^[2]. Іменная аснова -сар- (-сер-) (імёны ліцьвінаў Сарвід, Саргоўд, Сарман; германскія імёны Sarvidis, Saregaud, Saraman) паходзіць ад гоцкага і германскага sarwa 'зброя'^[3].

У Чэхіі бытавала імя Шарка (Šárka)^[4].

У Польшчы адзначаюцца прозьвішчы Жарэйка (Żarejko), Шарка (Szarko) і Шаркевіч (Szarkiewicz)^[5].

Варыянты імя ў гістарычных крыніцах: des Schalauers Sarecka (1276 год)^[6]; пан Шареико (16 студзеня 1437 году)^[7]; kmethones… Szyerkowycz (9 ліпеня 1489 году)^[8]; homines… Siereyko Juszkowicz (3 ліпеня 1505 году)^[9]; Ян Сореика^[10], Олехно Сореикович^[11], Юцъ Сареиковичъ^[12] (1528 год); намъ Семашъко Серейковичъ (9 траўня 1540 году)^[13]; села Серейковичовъ (1554 год)^[14]; у Полоцъку… Харка а Микиты Шарковичъ нивы… Шарковичовъ Харкова а Микитина (1 красавіка 1558 году)^[15]; Onacz Sarko (2 траўня 1558 году)^[16]; Sarejko (1565 год)^[17]; Бартошъ Сарковичъ… Андрей Сарковичъ… Матей Сарковичъ (1567 год)^[18]; панъ Бальцеръ Серейко (13 студзеня 1671 году)^[19]; Kaz Zaryk (1688 год)^[20]; et Casimiri Serakiewicz — civitatis iuratorum (15 сьнежня 1712 году)^[21]; Szarkiewiczowa Albina (XIX ст.)^[22].

Носьбіты

• Ян Сарэйка — упіцкі баярын, які ўпамінаецца ў попісе войска Вялікага Княства Літоўскага 1528 году
• Алехна Сарэйкавіч — эйрагольскі баярын, які ўпамінаецца ў попісе войска ВКЛ 1528 году
• Юц Сарэйкавіч — шоўдзенскі баярын, які ўпамінаецца ў попісе войска ВКЛ 1528 году
• Рыгор Сьцяпанавіч Саракевіч — расенскі зямянін, які ўпамінаецца ў 1580 годзе^[23]
• Станіслаў, Казімер, Баляслаў, Паўліна, Стэфанія, Алена, Юзэфа, Лукаш, Браніслаў, Ян, Павал і Юзэф Жарэйкі (Żorejko) — уладальнікі гаспадарак у Каменным Лузе каля Шумску на 1933 год^[24]

Шарэйкі (Szarejko) — літоўскі шляхецкі род зь Вільні^[25].

Шаркевічы — літоўскі шляхецкі род^[26].

Сараковіч (Sarakowicz), Сэрэйка (Serejko), Сярыйка (Sieryjko), Шарэйка (Szarejko, Szerejko), Шарайковіч (Szarejkowicz), Шарка (Szarka), Шаркевіч (Szarkiewicz) і Шарайкевіч (Szerejkiewicz) — прозьвішчы, зафіксаваныя ў XIX стагодзьдзі ў ваколіцах Сувалкаў^[27].

У 1585 годзе ўпаміналася мясцовасьць Шаркавічы (gruntu… Szarkowyczow) у Лідзкім павеце^[28].

На 1904 год існавала сядзіба Шаркі ў Бельскім павеце, а таксама вёскі Лонскія Шаркі і Шарыкаўшчына (Шарыкоўшчына) у Парэцкім павеце Смаленскай губэрні^[29].

На 1909 год існаваў хутар Шарэйкава ў Слуцкім павеце Менскай губэрні^[30].

На гістарычнай Браслаўшчыне існуе мястэчка Шаркоўшчына, у гістарычнай Прусіі — Заркаў. Назву Шарэйкі маюць вёскі на гістарычных Амсьціслаўшчыне і Мазыршчыне.