Такары (Берасьцейская вобласьць)

Такары́^[2] — вёска ў Камянецкім раёне Берасьцейскай вобласьці, за 46 км на захад ад Камянцу, за 43 км на паўночны захад ад Берасьця, за 10 км на паўднёвы захад ад чыгуначнай станцыі Высока-Літоўск на лініі Берасьце — Беласток і за 500 мэтраў на ўсход ад беларуска-польскай мяжы. Такары ўваходзяць у Агародніцкі сельсавет, знаходзяцца ў складзе ААТ «Макарава-Агра». Празь вёску праходзіць аўтамабільная шаша рэспубліканскага значэньня Р85 (Слонім — Высокае). У вёсцы маецца Міхайлаўская царква.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Такары.

Такары
трансьліт. Takary
Першыя згадкі:	2-я палова XVI стагодзьдзя
Краіна:	Беларусь
Вобласьць:	Берасьцейская
Раён:	Камянецкі
Сельсавет:	Агародніцкі
Насельніцтва:	77 чал. (2010)
Часавы пас:	UTC+3
Тэлефонны код:	+375 1631
Паштовы індэкс:	225081[1]
СААТА:	1240848071
Нумарны знак:	1
Геаграфічныя каардынаты:	52°21′50″ пн. ш. 23°16′8″ у. д.
Такары на мапе Беларусі ± Такары Такары
Галерэя здымкаў у Вікісховішчы

Гісторыя

• 2-я палова XVI ст.: шляхецкая ўласнасьць.
• 1567: А. Букраба з маёнтка Такары выстаўляў для войска коней.
• 1795: пасьля 3-га падзелу Рэчы Паспалітай у складзе Расейскай імпэрыі.
• 1-я палова XIX ст.: сяло і 5 аднайменных маёнткаў.
• 1816: пабудавана Міхайлаўская царква.
• паводле 8-й рэвізіі (1833) і інвэнтароў (1844—1847) існавалі:
  • маёнтак памешчыка Лянкевіча, фальварак, у вёсцы 39 рэвіскіх душ, больш за 312 дзесяцінаў зямлі;
  • маёнтак памешчыкаў Валковіцкіх, у вёсцы 29 рэвіскіх душ, больш за 81 дзесяціну зямлі;
  • маёнтак Паўла Залескага, фальварак, у вёсцы 20 двароў, 121 рэвіская душа, 486 дзесяцінаў памешчыцкай зямлі і 350 дзесяцінаў сялянскай зямлі, млын, карчма, вінакурня;
  • маёнтак Аляксандра Такаржэўскага, 7 рэвіскіх душ, 31 дзесяціна зямлі;
  • маёнтак Івана Такаржэўскага, у вёсцы 3 двары, 19 рэвіскіх душ, 58 дзесяцінаў памешчыцкай зямлі і 34 дзесяціны сялянскай зямлі.
• 1857: у Такарах усяго 292 рэвіскія душы.
• у канцы XIX ст.: у Высока-Літоўскай воласьці Берасьцейскага павету Гарадзенскай губэрні.
• 1890: маёнткі Токары належалі Паўлу Залескаму (274 дзесяціны зямлі), Тэафіліі Такаржэўскай (звыш 87 дзес.), Міхаілу Груявіцкаму (47 дзес.), Казіміру Янкоўскаму і Ігнату Валкавіцкаму (64 дзес.), Ёсіфу Лянкевічу (225 дзес.).
• 1897: паводле перапісу сяло Токары, праваслаўная царква (больш за 2500 прыхаджан), народнае вучылішча, кузьня, карчма.
• 1905: у народным вучылішчы 80 навучэнцаў.
• 1921: ў складзе Высока-Літоўскай гміны Берасьцейскага павету Палескага ваяводзтва міжваеннай Польшчы.
• 1923: у вёсцы Такары 92 двары, 529 жыхароў, побач аднайменныя фальваркі — 7 двароў, 84 жыхары.
• 1939: у складзе Берасьцейскай вобласьці БССР.
• 1940: цэнтар Такарскага сельсавету Высокаўскага раёну Берасьцейскай вобласьці. У вёсцы 182 двары і 1069 жыхароў, пачатковая школа.
• 1945: тэрыторыя сельсавету перададзена Польшчы.
• 1948: у пачатковай школе 83 вучні.
• 1950: пасьля ўдакладненьня савецка-польскай мяжы вёска ў Агародніцкім сельсавеце.
• 1959: 220 жыхароў.
• 1962: у Камянецкім раёне Берасьцейскай вобласьці.
• 1970: 181 жыхар.

Насельніцтва

• 1999 год — 132 жыхары
• 2005 год — 85 жыхароў, 36 двароў^[3]
• 2010 год — 77 жыхароў

Ураджэнцы

• Усевалад Ігнатоўскі (1881 — 1931) — беларускі гісторык, грамадзкі і палітычны дзяяч. Першы прэзыдэнт Акадэміі навук Беларусі.