Цеплякі

Цеплякі́^[4] — вёска ў Беларусі, у басэйне ракі Чарнагосьніцы каля возера Ліпны (за 5 км на паўднёвы ўсход ад яго). Уваходзяць у склад Машканскага сельсавету Сеньненскага раёну Віцебскай вобласьці. Знаходзяцца за 10 км на захад ад Машкан, за 20 км на паўночны ўсход ад Сянна.

Цеплякі лац. Cieplaki
Былая назва:	Цеплакі[1]
Мясцовая назва:	Цыплякі[2]
Краіна:	Беларусь
Вобласьць:	Віцебская
Раён:	Сеньненскі
Сельсавет:	Машканскі
Насельніцтва:	7 чал. (2003)
Часавы пас:	UTC+3
Тэлефонны код:	+375 2135
Паштовы індэкс:	211117[3]
СААТА:	2244829070
Нумарны знак:	2
Геаграфічныя каардынаты:	54°54′8″ пн. ш. 29°55′29″ у. д.
Цеплякі на мапе Беларусі ± Цеплякі Цеплякі

Гісторыя

Вялікае Княства Літоўскае

Упершыню ўпамінаюцца ў 1591 годзе як вёска Цеплакі пры падзеле маёнткаў Івана Іванавіча Сапегі паміж яго сынамі, якая адышла ў валоданьне Рыгора Сапегі — маёнтак Астроўна Віцебскага ваяводзтва Вялікага Княства Літоўскага^[1]. У XVIII ст. вёскай валодалі Пацеі^[2].

Пад уладай Расейскай імпэрыі

У выніку першага падзелу Рэчы Паспалітай 20 кастрычніка 1772 году Цеплякі апынуліся ў складзе Расейскай імпэрыі, у Аршанскай правінцыі Магілёўскай губэрні, з 2 жніўня 1773 году ў Сеньненскі павеце. з 22 сакавіка 1777 да 31 сьнежня 1796 у Сеньненскім павеце Магілёўскай губэрні (Магілёўскае намесьніцтва з 10 студзеня 1778 да 31 сьнежня 1796). З 31 сьнежня 1796 да 27 лютага 1802 году ў Сеньненскім павеце Беларускай губэрні. З 27 лютага 1802 году ў Машканскай воласьці Сеньненскага павету Магілёўскай губэрні^[5]. Вёска належала да прыходу Госьміраўскае Сьвята-Міхайлаўскай царквы (да 1839 году уніяцкай)^[6][7].

У XIX ст. маёнткам Астроўнам, да якога належалі Цеплякі, валодалі Плятэры^[8][9].

У 1910 годзе сялянскай грамадзе вёскі Цеплякоў належала 411 дзесяцін зямлі. Сяляне вёскі адносіліся да прыходу Госьміраўскае Сьвята-Міхайлаўскай царквы й уваходзілі ў Круглянскае сялянскае таварыства^[10][11].

З 14 верасьня 1917 году Цеплякі апынуліся ў Заходняй вобласьці Расейскай рэспублікі.

Наіноўшы час

25 сакавіка 1918 году згодна з Трэцяй Устаўной граматай Цеплякі абвяшчаліся часткай Беларускай Народнай Рэспублікі. 1 студзеня 1919 году згодна з пастановай І зьезду КП(б) Беларусі яны ўвайшлі ў склад Беларускай ССР, аднак 16 студзеня Масква адабрала вёску разам зь іншымі этнічна беларускімі тэрыторыямі ў склад РСФСР, з траўня 1919 году ў Сеньненскім павеце Віцебскай губэрні.

У сакавіку 1924 году Цеплякі вярнулі БССР, з 20 жніўня ў Застадольскім сельсавеце Сеньненскага раёну Віцебскай акругі, з 26 ліпеня 1930 году — Сеньненскі раён, з 12 лютага 1935 году — Багушэўскі раён, з 20 лютага 1938 году ў складзе Віцебскай вобласьці.

У Другую сусьветную вайну пад нямецкай акупацыяй з 8 ліпеня 1941 году да 25 чэрвеня 1944 году. У жніўні 1943 году карнікі спалілі 25 двароў, забілі 16 жыхароў^[12].

Па вайне савецкія ўлады аднавілі калгас «Чырвоная Зорка», які ў 1950 годзе далучылі да калгасу «Сьцяг Леніна» з цэнтрам у вёскі Круглянах. 20 студзеня 1960 году Багушэўскі раён скасавалі, Застадольскі сельсавет далучылі да Сеньненскага раёну. З 1962 году вёска у складзе Обальскага сельсавету^[13][14][15] .

Да 2004 году Цеплякі ўваходзілі ў склад Обальскага сельсавету^[16].

Насельніцтва

• XIX стагодзьдзе: 1857 год — 93 чал.^[7]
• XX стагодзьдзе: 1910 год — 37 двароў, 126 мужчын, 124 жанчыны^[10]; 1940 год — 30 двароў, 64 чал.
• XXІ стагодзьдзе: 2003 год — 5 двароў, 7 чал.

Асобы

• Лілія Тамашова (*25 чэрвеня 1924, вёска Цеплякі — †18 траўня 2016, Менск) — літаратуразнаўца, пэдагог, аўтар мэтадычных дапаможнікаў.