Карла Спампані

У Вікіпедыі ёсць артыкулы пра іншых людзей з прозвішчам Спампані.

Ка́рла Спампа́ні (італ.: Carlo Spampani; 1750, Рым (?) — 2 сакавіка 1783) — архітэктар барока, прадстаўнік паладыянскай школы.

Карла Спампані
Дата нараджэння	1750 ці 1730
Месца нараджэння	Рым, Папская вобласць
Дата смерці	2 сакавіка 1783(1783-03-02)
Месца смерці	Ражанка, Лідскі павет, Віленскае ваяводства, Вялікае Княства Літоўскае
Месца пахавання	Цапра
Грамадзянства	Рэч Паспалітая
Працы і дасягненні
Працаваў у гарадах	Вільня, Заслаўе, Шчорсы
Найважнейшыя пабудовы	Шчорсаўскі палац Палац Пшаздзецкага Радзівілімонтаўскі палац
Медыяфайлы на Вікісховішчы

Біяграфія

Нарадзіўся ў Італіі, меркавана, у Рыме. Лічыцца, што вучыўся ў Акадэміі Святога Лукі ў Рыме. Пад уплывам мастака Францішка Смуглевіча ў 1770 перасяліўся ў Вялікае Княства Літоўскае. Першапачаткова працаваў з заказамі езуітаў (да скасавання ордэна ў 1773), выкладаў архітэктуру ў Віленскай акадэміі. Удзельнічаў у пабудове акадэмічных будынкаў, астранамічнай абсерваторыі^[1].

Пасля служыў у войску, у 1774 атрымаў ранг харужага булавы польнай літоўскай, з 1779 капітан^[1].

Для Паўла Ксаверыя Бжастоўскага пабудаваў палац у Паўлаве, з канца 1770-х гг. выконваў заказы Караля Радзівіла Пане Каханку (аўстэрыя, перабудова палаца ў Альбе і інш.). У 1779—1783 прыдворны архітэктар Юзафа Радзівіла, пабудаваў для яго драўляны палац у Радзівілімонтах пад Клецкам. Для Дамініка Пшаздзецкага пабудаваў палац у Заслаўі, завяршыў будоўлю касцёла. Для Адама Хмары пабудаваў палац у Сёмкаве. Для Тадэвуша Коцела пабудаваў двор і лямус у Беніцы каля Маладзечна. Кіраваў дэкараваннем палаца ў Шчорсах для Іахіма Храптовіча. Удзельнічаў у пабудове палаца Ігната Мараўскага ў Беліцы каля Менска. Па заказе Юстыніяна Шчыта будаваў палац у Юстыніянаве, двары ў Добрамыслях і Таболках. Для Пятра Твароўскага пабудаваў двор у Велясніцы пад Пінскам. У Вільні кіраваў рамонтам капліцы Святога Казіміра пры кафедральным касцёле. Для Юзафа Паца склаў праект двароў у Мытах і Ражанцы каля Ліды^[1]. Для Альбрэхта Радзівіла пабудаваў драўляны палац у Анопалі^[2].

Памёр ад сухотаў. Пахаваны ў драўлянай царкве базыльянскага манастыра ў Цапры пад Клецкам^[1].

Творчасць

Быў адным з піянераў класіцызму ў ВКЛ, будаваў пераважна мураваныя і драўляныя палацы, займаўся іх дэкараваннем.

Радзівілімонтаўскі палац

• Шчорсаўскі палацава-паркавы ансамбль, 1770—1776^[3] (разам з Я. Габрыелем і Джузэпэ Сака).
• Асобныя крылы езуіцкага калегіума і прыбудовы да абсерваторыі Віленскага ўніверсітэта, 1773.
• Праект палаца ў Паўлаве пад Вільняй, 1775.
• Палац у Сёмкаве, 1775/6-1780.
• Нясвіжскі палацава-паркавы комплекс (у 1778—1779)^[3]
• Палац Пшаздзецкага ў Заслаўі, 1778—1782^[3].
• Касцёл Найсвяцейшай Дзевы Марыі ў Заслаўі (?).
• Радзівілімонтаўскі палац^[3], 1778—1783.
• Абнаўленне капліцы Святога Казіміра ў Віленскім кафедральным саборы, 1782 (абнаўленне).
• Сядзіба і лямус у Беніцы пад Маладзечнам^[3].
• мост і капліца ў в. Кухцічы^[3].