Пятроўшчына (станцыя метро)

У паняцця ёсць і іншыя значэнні, гл. Пятроўшчына.

Пятроўшчына (трансліт.: Piatroŭščyna) — станцыя Маскоўскай лініі Мінскага метрапалітэна. Размешчана паміж станцыямі «Міхалова» і «Малінаўка», на скрыжаванні праспекта Дзяржынскага з вуліцамі Голубева і Сямашкі. З боку вуліцы Голубева знаходзіцца жылы мікрараён Паўднёвы Захад, з боку вуліцы Сямашкі — Беларускі дзяржаўны медыцынскі ўніверсітэт, 9-я гарадская клінічная бальніца і Студэнцкая вёска. Лічыцца адной з самых прыгожых у Мінскім метрапалітэне.

«Пятроўшчына» руск.: Петровщина
Маскоўская лінія
Мінскі метрапалітэн
Дата адкрыцця	7 лістапада 2012
Праектная назва	Паўднёвы Захад
Раён	Маскоўскі
Тып	Мелкага закладання
Выхад да вуліц	праспект Дзяржынскага, вуліца Голубева, Сямашкі
Наземны транспарт	А: 28, 30с, 30а, 57, 74с, 75, 84, 103, 122э, 170э Т: 10, 25, 32, 40, 40а, 45, 64, 90
Час адкрыцця	5:34—1:10
Код станцыі	111
Суседнія станцыі	Міхалова і Малінаўка
Медыяфайлы на Вікісховішчы

Маскоўская лінія
умоўныя абазначэнні
Смаленская Уручча Барысаўскі тракт Усход Маскоўская Парк Чалюскінцаў Акадэмія навук Плошча Якуба Коласа Плошча Перамогі Кастрычніцкая Плошча Леніна Інстытут культуры ЦЧ-1 «Маскоўскае» Грушаўка Міхалова Пятроўшчына Малінаўка Шчомысліца

Адкрылася 7 лістапада 2012 года ў складзе 4-й пускавой чаргі разам са станцыямі «Грушаўка» і «Міхалова». Да 3 чэрвеня 2014 года з’яўлялася канцавой станцыяй Маскоўскай лініі, пасля чаго была адкрыта станцыя метро «Малінаўка»^[1].

Названа ад колішняй вёскі і прадмесця Мінска Пятроўшчыны, якая ўвайшла ў склад горада.

Будаўніцтва

Будаўніцтва пачалося ў 2007 годзе^[2]. Адкрыццё станцый «Грушаўка», «Міхалова», «Пятроўшчына» было запланавана на 1 верасня 2012 года^[3], аднак адкрыццё перанеслі^[4]. У выніку станцыі «Грушаўка», «Міхалова» і «Пятроўшчына» былі адкрыты 7 лістапада 2012 года^[5].

Станам на ліпень 2011 года былі цалкам узведзены канструкцыі станцыі, канструкцыі разваротных тупікоў за станцыяй, канструкцыі вестыбюляў. Вялося будаўніцтва уваходаў і падземных пераходаў, з якіх цяпер ажыццяўляецца ўваход на станцыю. Былі пачаты аздобныя працы.

Станам на ліпень 2012 года было цалкам завершана ўзвядзенне канструкцый станцыі, а таксама абодвух пераходаў.

Пасажырапаток

Штодзённая загружанасць станцый метрапалітэна на ўваход і выхад па даследаванні 2013 года. Пераход пасажыраў паміж лініямі не ўлічваўся

У 2013 годзе пасажырапаток складаў каля 50 тысяч чалавек штодзень. Аднак пасля адкрыцця новай канцавой станцыі «Малінаўка» пасажырапаток зменшыўся да 32 тысяч^[6].

Дызайн і канструкцыя

Зорнае неба

«Пятроўшчына» прадстаўляе сабой зімовае поле, над якім знаходзіцца зорнае неба. Паводле скульптара Максіма Пятруля, у аснове мастацкай канцэпцыі ляжыць ідэя мемарыялізацыі вёскі, якая ўвайшла ў склад горада^[7].

Станцыя аднасклепяністая, два вестыбюля. Вядучы мастацкі матыў — прырода. У столь умантавана прыкладна 400 святлодыёдных лямпаў. Мармур, нержавеючая сталь, металакераміка з’яўляюцца асноўнымі матэрыяламі аздаблення.

Асаблівасцю станцыі з’яўляецца столь, упрыгожаная дыёдамі, якія выконваюць функцыю зорак на небе. Размешчаны ўсе зоркі ў хаатычным парадку, таму шукаць на імправізаваным начным небе сузор’я не варта^[8].

Цікавыя факты

Станцыя метро «Пятроўшчына» на паштовай марцы Беларусі

На станцыі «Пятроўшчына» праходзяць начныя музычныя мерапрыемствы ў метро. Першае ў гісторыі «Пятроўшчыны» і Беларусі падобнае мерапрыемства адбылося 14 кастрычніка 2018 года^[9].

Зноскі

1. http://www.belta.by/ru/all_news/regions/V-Minske-otkrylas-stantsija-metro-Malinovka_i_671303.html
2. http://ato.by/metro/petrovschina
3. https://web.archive.org/web/20111012101119/http://news.tut.by/society/253663.html
4. http://realt.onliner.by/2012/10/03/metro-34/
5. http://realt.onliner.by/2012/11/07/metro-41
6. https://mediaalyans.by/services/reklama-v-metro/reklamnye-plakaty-na-stantsiyah-i-v-perehodah-metro/st-m-petrovshhina/
7. Архіўная копія (нявызн.)(недаступная спасылка). Архівавана з першакрыніцы 17 ліпеня 2020. Праверана 27 верасня 2022.
8. https://mag.relax.by/citynews/10606823-kogda-pojut-pticy-na-malinovke-kakije-sozvezdija-jesty-na-petrovshhine-i-kak-chasto-vorujut-grushi-na-grushevke-3-fakta-o-minskom-metro/
9. https://people.onliner.by/2018/10/14/noch-v-metro