Жабјани

Оваа статија се однесува на прилепското село Жабјани. За битолското село, видете Жабени.

Жабјани
Поглед на Жабјани
Жабјани Местоположба на Жабјани во Македонија Жабјани на карта
Координати 41°27′11″N 21°22′50″E
Регион	Пелагониски
Општина	Долнени
Област	Прилепско Поле
Население	49 жит. (поп. 2021)[1]
Пошт. бр.	7537
Повик. бр.	048
Шифра на КО
Надм. вис.	610 м
Жабјани на општинската карта Атарот на Жабјани во рамките на општината
Жабјани на Ризницата

Жабјани — село во Општина Долнени, во околината на градот Прилеп.

Географија и местоположба

Жабјани се наоѓа северозападно од градот Прилеп, помеѓу селата Ропотово, Пешталево и Сарандиново, на надморска височина од 610 м.^[2] Денес селото е речиси во целост припоено со соседното село Ропотово.

Историја

Во отоманскиот период, чифлици во селото имале Турци од Прилеп. Од нив подоцна земјата ја купиле браќата Алил, Јусуф и Абдула од Дебар, кои основале три чифлици. Сестрата на браќата се омажила за Рушит, кој основал четврти чифлик. По 1912 година, жителите ја купиле земјата од чифликсајбиите.^[2][3]

Население

Население во минатото

Година Нас. ±% 1948 67 —     1953 — —     1961 — —     1971 42 —     1981 71 +69.0%	Година Нас. ±% 1991 51 −28.2% 1994 56 +9.8% 2002 56 +0.0% 2021 49 −12.5%

Во делото „Етнографија на вилаетите Адријанопол, Монастир и Салоника“ се вели дека во 1873 г. Жабјани било село со 16 домаќинства и 80 жители Македонци.^[4]

Според статистиката на Васил К’нчов („Македонија, Етнографија и статистика“) од 1900 година, во Жабјани имало 50 жители Македонци.^[5] По податоците на секретарот на Бугарската егзархија Димитар Мишев („La Macédoine et sa Population Chrétienne“), во 1905 година во селото имало 56 жители Македонци.^[6]

На Етнографската карта на Битолскиот Вилает од 1901 г. Жабени се води како чисто македонско село во Прилепската каза на Битолскиот санџак со 8 куќи.^[7]

Според германска карта издадена во 1941 година, а заснована на пописот на Кралството Југославија од 1931 година, селото имало 100 Македонци.^[8]

Според пописот од 2002 година, во селото живееле 56 жители, од кои 55 Македонци и 1 Србин.^[9]

Според последниот попис од 2021 година, во селото живееле 49 жители, од кои 46 Македонци, 1 Албанец, 1 останат и 1 лице без податоци.^[10]

Во табелата во продолжение е направен преглед на населението во сите пописни години:

Година	1900	1905	1948	1953	1961	1971	1981	1991	1994	2002	2021
Население	50	56	67	—	—	42	71	51	56	56	49

Извор за 1900 г.: Македонија. Етнографија и статистика.^[11]; за 1905 г.: La Macédoine et sa Population Chrétienne.^[12]; за 1948-2002 г.: Државен завод за статистика на РМ.^[13]; за 2021 г.: Државен завод за статистика на РМ.^[14]

Родови

Жабјани е чисто македонско православно село, сите родови во селото се доселенички.

Родови во Жабјани се:

• Доселеници: Тутунџиовци (1 к.) доселени се од некаде, тие се најстар род во селото; Тасевци или Дебранци (2 к.) доселени се на почетокот од XX век од мијачкото село Селце; Коневци (1 к.), доселени се од Вранче, во Вранче биле староседелци; Алексовци (1 к.) од прилепското село Слепче, се населиле најпрво во Ропотово, па од таму во Жабјани; Крапјанци (1 к.), доселени се од Крапа, Порече; Поповци (1 к.), доселени се од Македонски Брод; Синадиновци (1 к.), доселени се во 1946 година од Манастирец, Порече и Ѓоргијовци (1 к.), доселени се од Могилец, Порече.^[3]

Општествени установи

Со оглед на тоа дека селото е речиси во целост припоено со Ропотово, во негова непосредна близина се наоѓа основното училиште „Ѓорче Петров“, каде што се изведува настава до деветто одделение.^[15] Во селото има и бензинска пумпа.

Самоуправа и политика

Селото влегува во рамките на Општина Долнени од 1955 година.

Во периодот 1952-1955, селото било дел од Општина Дебреште.

Избирачко место

Селото е опфатено во избирачкото место бр. 1488 според Државната изборна комисија, сместени во просториите на старо училиште на селото Ропотово.^[16]

На претседателските избори во 2019 година, на ова избирачко место биле запишани вкупно 426 гласачи.^[17]

Културни знаменитости

Чешма

• Христијанска чешма

Цркви и параклиси^[18]

• Црква „Св. Троица“ — главна селска црква изградена во 1859 година;
• Црква „Св. Атанасиј“ — манастирска црква во изградба;
• Параклис „Св. Архангел Михаил“ — параклис изграден во 2008 година.

Иселеништво

Волчевци (2 к.) иселени се во Браилово; Дупевци (1 к.), иселени се во Слепче; Жабјанци (5 к.), иселени се во Секирци; Тилко (1 к.), иселени се во Дреновци; Кривошинци се иселени во Секирци; Рулевци се иселени во Прилеп. Еден род со 3 домаќинства е иселен во Скопско Поле. Некои се родови изумрени.^[3]

Галерија

• 
  Патот низ селото
• 
  Чешмата покрај патот кон Рилево
• 
  Бензинската пумпа