சிவாஜி (திரைப்படம்)

சிவாஜி (Sivaji: The Boss), 2007ஆம் ஆண்டு வெளியிடப்பட்ட தமிழ்த் திரைப்படமாகும்.^[9] இப்படத்தை ஏ.வி.எம். புரொடக்ஷன்ஸ் தயாரிக்க, ஷங்கர் இயக்கத்தில் ரஜினிகாந்த் நடிப்பது சிறப்பம்சமாகும். இப்படத்தில் மணிவண்ணன், விவேக் முக்கிய பாத்திரங்களிலும் நயன்தாரா, மற்றும் இயக்குநர் ஷங்கரும் இத்திரைப்படத்தில் நடிப்பது குறிப்பிடத்தக்கதாகும். பல்வேறுபட்ட காலதாமத்திற்குப் பின்னர் உலகளாவிய ரீதியாக 15 ஜூன் 2007 திரையரையங்குகளில் வெளிவிடப்பட்டுள்ளது. இப்படம் 2005-ல் வெளியான சந்திரமுகி பட வசூலை முறியடித்து சாதனை படைத்தது. ^{[சான்று தேவை]}

சிவாஜி
இயக்கம்	ஷங்கர்
தயாரிப்பு	எம். எஸ். குகன் எம்.சரவணன்
கதை	ஷங்கர் சுஜாதா
இசை	ஏ.ஆர்.ரஹ்மான்
நடிப்பு	ரஜினிகாந்த் ஷ்ரியா சுமன் விவேக்
ஒளிப்பதிவு	கே. வி. ஆனந்த்
படத்தொகுப்பு	ஆண்டோனி
விநியோகம்	ஏ. வி. எம். புரொடக்ஷன்ஸ்
வெளியீடு	2007
நாடு	இந்தியா
மொழி	தமிழ்
ஆக்கச்செலவு	₹60 கோடி[a]
மொத்த வருவாய்	₹150 கோடி[4][5][6][7][8]

கதைச்சுருக்கம்

சிவாஜி என்பவர் மென்பொருள் கட்டுமான அமைப்பாளர், ஐக்கிய மாகாணங்களில் தன்னுடைய பணியை முடித்துவிட்டு இந்தியா திரும்புகிறார். இங்குள்ள சமுதாயத்திற்கு மருத்துவம் மற்றும் கல்வியை இலவசமாக வழங்க வேண்டும் என்ற தன்னுடைய கனவை நிறைவேற்ற வேண்டும் என்று விரும்புகிறார். இந்நிலையில் அதிகாரத்திலுள்ள பெருமுதலாளி ஆதிசேஷன் என்பவர் இவருடைய திட்டத்தை முடக்கி விடுகிறார். சிவாஜி எந்த வழியும் இல்லாமல் இருக்கிறார். ஆனால் தன்னுடைய வழியில் அவனுடைய திட்டத்தை முறியடிக்க நினைக்கிறார்.

நடிகர்கள்

• இரசினிகாந்து - சிவாஜி ஆறுமுகம் / எம்.ஜி.இராமசந்திரன்^[10]
• சிரேயா சரன் - தமிழ்ச்செல்வி சிவாஜியின் காதலி/மனைவி (ஒலிச்சேர்க்கை - கனிகா)^[11]
• சுமன் - ஆதிசேசன் (ஒலிச்சேர்க்கை - சுப்பு பஞ்சு அருணாச்சலம்)^[10]
• விவேக் - அறிவு, சிவாஜியின் மாமா
• ரகுவரன் - மருத்துவர் செழியன்
• இரவிக்குமார் அமைச்சர் அன்பாநந்தம்
• மணிவண்ணன் - ஆறுமுகம், சிவாஜியின் தந்தை
• லிவிங்ஸ்டன் - காவல் ஆய்வாளர் இராம் குமார்^[12]
• வடிவுக்கரசி - பார்வதி ஆறுமுகம், சிவாஜியின் தாய்
• கொச்சி ஹனீஃபா - அமைச்சர் குழந்தைவேல்
• சாலமன் பாப்பையா - தொண்டைமான் இராமலிங்கத்தின் பக்கத்து வீட்டார்
• பட்டிமன்றம் ராஜா - இராமலிங்கம், தமிழ்ச்செல்வியின் தந்தை
• பிரமீட் நடராஜன் - வழக்கறிஞர் கிருஷ்ணமூர்த்தி
• எம். எசு. பாசுகர் - பழநிசாமி^[12]
• உமா பத்மநாபன் - ஜோதி இராமலிங்கம், தமிழ்ச்செல்வியின் தாய்
• போஸ் வெங்கட் - வேலு, ஆதிசேசனின் வலது கை
• வாசு விக்ரம் - சட்டமன்ற உறுப்பினர் இராமசாமி
• அமரசிகாமணி - அமரசிகாமணி^[13]
• வாசு - ஐயப்பன், அறிவின் நண்பர் (சிறப்புத் தோற்றம்)
• இளவரசு - இரங்கதுரை
• முத்துக்காளை - முத்துக்காளை^[14]
• ஏ. சி. முரளி மோகன் - மருத்துவர் கேசவன்^[14]
• சுவாமிநாதன் -நாராயணன்^[14]
• கனல் கண்ணன்^[14]
• மயில்சாமி^[14]
• சின்னி ஜெயந்த்^[14]
• செல்லதுரை
• தாமு -மிம்மிகிரி கலைஞர்^[14]
• கராத்தே ராஜா - ஆதிசேசனின் அடியாள்
• நயன்தாரா - "பல்லேலக்கா" பாடலில் சிறப்புத் தோற்றம்^[12]
• ஷங்கர் - "பல்லேலக்கா" பாடலில் சிறப்புத் தோற்றம்^[15]
• கே. வி. ஆனந்த் - "பல்லேலக்கா" பாடலில் சிறப்புத் தோற்றம் ^[15]
• தோட்டா தரணி - "பல்லேலக்கா" பாடலில் சிறப்புத் தோற்றம்^[15]

பட உருவாக்கம்

பெரிதும் பேசப்பட்ட 1994 இல் வெளிவந்த காதலன் படத்தை இயங்கிய ஷங்கர் சன் டிவி பேட்டியில்^[16] தனது விருப்பம் தமிழ் நாட்டின் பிரபல நடிகர்களான ரஜினிகாந்த் மற்றும் கமல்ஹாசன் ஆகிய இருவரையும் வைத்துத் திரைப்படம் தயாரிப்பதாகும். ஷங்கரின் அடுத்த திரைப்படம் இந்தியன் பத்ம ஸ்ரீ கமல்ஹாசன் மற்றும் நெடுமுடி வேணு முன்னணிக் கதாபாத்திரத்தில் நடிக்க ஊர்மிளா மடோண்த்கர் மற்றும் மனிஷா கொய்ராலாவும் நடித்தனர். இப்படத்தின் வெற்றியினால் பெரிதும் கவரப்பட்ட ரஜினி ஷங்கரின் இயக்கத்தில் நடிக்கத் தனது விருப்பத்தைத் தெரிவித்து இருந்தார். எவ்வாறெனினும் அடுத்தாக பிரசாந்த் ஐஸ்வர்யா ராய் நடிப்பில் ஜீன்ஸ் தமிழிலும் இந்தியிலும் வெளிவந்து வெற்றியளித்தது.^[17]

ஜீன்ஸ் படத்தை அடுத்த ரஜினிகாந்தை ஷங்கர் ஓர் திரைக்கதையுடன் அணுகினார். எனினும் ரஜனிகாந்த் கே. எஸ். ரவிக்குமாரின் இயக்கத்தில் உருவாக்கப்பட்ட படையப்பா திரைப்படத்தில் நடித்துக்கொண்டிருந்தமையால் நேரக்குறைவுகாரணமாக ஒத்துக்கொள்ளவில்லை. இது பின்னர் அர்ஜூன் கதாநாயகனாக நடித்த முதல்வன் திரைப்படமாக ஆக வெளிவந்தது.^[18] இத்திரைபடத்தை அடுத்து பாய்ஸ், அந்நியன் திரைப்படங்கள் வெளிவந்து பெருவெற்றி பெற்றது. நடிகர்களான சிரஞ்சீவி, சல்மான் கான் மற்றும் விஜய் இவரது வழிகாட்டிலில் நடிக்க விருப்பத்தை தெரிவித்திருந்தாலும் அவரசப்பட்டு எந்த ஒரு திரைப்படத்திலும் ஒப்பமிட்டு துவக்கவில்லை.

அக்டோபர் 2005 இல் தமிழ் சினிமாவில் மிகப்பழையதும் பெரியதுமான ஏவிஎம் புரொடக்ஷனை நடத்திவரும் எம். எஸ். குகன் மற்றும் எம். சரவணன் சங்கரை அணுகிப் படமொன்றை தங்களின் ஸ்ரூடியோவில் தயாரித்துத் தரும்படி கேட்டபோது சங்கர் அதற்கு ஒப்புக் கொண்டார். இந்தப் படத்தில் இந்திய சினிமாவில் மிக அதிகமாக சம்பளம் வாங்கும்^[19] சூப்பர் ஸ்டார் இந்தப் படத்தில் நடிப்பதாக ஒப்பமிட்டுச் சம்மதித்தார். தமிழ் சினிமாவில் சந்திரமுகி வெற்றியடைந்ததை அடுத்து சினிமா வாய்ப்புக்கள் கிடைத்தபோதிலும் அதை ஏற்றுக் கொண்டு நடிக்கவில்லை. சிவாஜி ராவ் கெய்க்வாட் கே. பாலசந்தர் திரையுலகில் அறிமுகம் செய்தபோது ரஜினிகாந்த் என அறிமுகப்படுத்தினார். இவரது இயற்பெயராகும் இதனையும் தி பாஸ் என்பதையும் சேர்து சிவாஜி தி பாஸ் என்றவாறு திரைப்படத்திற்குப் பெயரிடப்பட்டுள்ளது.

பாடல்கள்

சிவாஜி: திரைப்பாடல்கள்
திரைப்பாடல்கள் ஏ. ஆர். ரகுமான்
வெளியீடு	ஏப்ரல் 2, 2007 (2007-04-02)
ஒலிப்பதிவு	பஞ்சதன் ரெக்கார்டு
இசைப் பாணி	திரையிசைப்பாடல்
நீளம்	36:10
இசைத்தட்டு நிறுவனம்	ஏவிஎம்
இசைத் தயாரிப்பாளர்	ஏ. ஆர். ரகுமான்
ஏ. ஆர். ரகுமான் காலவரிசை
இப்ரவோக்டு (திரைப்படம்) சிவாஜி: திரைப்பாடல்கள் அழகிய தமிழ்மகன்

சிவாஜி: த பாஸ் திரைப்படத்தில் 7 பாடல்கள் இடம்பெற்றுள்ளன. ஏப்ரல் 2, 2007ல் இவற்றின் அதிகாரப்பூர்வ வெளியீட்டுக்கு ஒரு சில நாட்கள் முன்னரே இப்பாடல்கள் இணையத்தில் திருட்டுத்தனமாகப் பதிவிறக்கக் கிடைத்தது.^[20]

வரிசை	பாடல்	பாடகர்கள்	படமாக்கம்	நீளம் (நி:நொ)	எழுதியது	குறிப்பு
1	பல்லேலக்கா	எஸ்.பி பாலசுப்பிரமணியம், ஏ. ஆர். ரைஹானா, பெனி தயாள்		6.08	நா. முத்துக்குமார்
2	ஸ்டைல்	பிளாஸ், தன்வீ, ராக்ஸ், சுரேஷ் பீட்டர்ஸ்		5.13	பா. விஜய்	முன்னர் "ஒரு கூடை சன்லைட்". சுரேஷ் பீட்டர்ஸ் பாடிய பாடலும் பதிவு செய்யப்பட்டுள்ளது.
3	வாஜி வாஜி	ஹரிஹரன், மதுஸ்ரீ		5.49	வைரமுத்து
4	அதிரடி	ஏ.ஆர்.ரகுமான், சயோனரா		5.47	வாலி
5	சகானா	உதித் நாராயண், சின்மயி		5.21	வைரமுத்து	சின்மயிக்குப் பதிலாக சுஜாதா பாடிய பாடலும் பதிவு செய்யப்பட்டுள்ளது.
6	த பொஸ்	நரேஷ் ஐயர், பிளாஸ், ரகுயீப் அலாம்		3.20	நா. முத்துக்குமார், பிளாஸ்
7	சகாரா	விஜய் யேசுதாஸ், கோமதிஸ்ரீ		4.32	வைரமுத்து

விருதுகள்

2007 தேசிய திரைப்பட விருதுகள்^[21]

• வென்றது – சிறந்த சிறப்பு விளைவுகளுக்கான வெள்ளி தாமரை விருது – எம்.எஸ்.  இந்திய கலைஞர்கள், சென்னை

2008 தென்னிந்திய பிலிம்பேர் விருதுகள்^{[சான்று தேவை]}

• வென்றது – சிறந்த இசை அமைப்பாளருக்கான பிலிம்பேர் விருது  – ஏ. ஆர். ரகுமான்
• வென்றது – சிறந்த ஒளிப்பதிவாளருக்கான பிலிம்பேர் விருது – கே. வி. ஆனந்த்
• வென்றது – பிலிம்பேர் சிறந்த கலை இயக்குநர் விருது – தோட்டா தரணி
• பரிந்துரைக்கப்பட்டது – சிறந்த நடிகருக்கான பிலிம்பேர் விருது – இரசினிகாந்து
• பரிந்துரைக்கப்பட்டது – சிறந்த திரைப்படத்திற்கான பிலிம்பேர் விருது – சிவாஜி
• பரிந்துரைக்கப்பட்டது – சிறந்த பின்னணிப் பாடகிக்கான பிலிம்பேர் விருது – சின்மயி

2007 விஜய் விருதுகள்^[22]

• வென்றது – விஜய் விருதுகள் (விருப்பமான நாயகன்) – இரசினிகாந்து
• பரிந்துரைக்கப்பட்டது – விஜய் விருதுகள் (விருப்பமான நாயகி) – சிரேயா சரன்
• வென்றது – விஜய் விருதுகள் (சிறந்த இசையமைப்பாளர்) – ஏ. ஆர். ரகுமான்
• பரிந்துரைக்கப்பட்டது – விஜய் விருதுகள் (சிறந்த பெண் பின்னணி பாடகர்) – சின்மயி^{[சான்று தேவை]}
• பரிந்துரைக்கப்பட்டது – விஜய் விருதுகள் (சிறந்த ஆண் பின்னணி பாடகர்) – உதித் நாராயண்

2007 தமிழ்நாடு அரசு திரைப்பட விருதுகள்^[23]

• வென்றது- சிறந்த திரைப்படத்துக்கான தமிழ்நாட்டு அரசின் திரைப்பட விருது – முதல் பரிசு

விமர்சனம்

ஆனந்த விகடன் வார இதழில் எழுதிய விமர்சனத்தில் "எல்லாம் இழந்து... பின்பாதியில் அனைத்தையும் அடையும் அண்ணா மலை, படையப்பா பாணி கதை. முழுக்க முழுக்க ரசிகர்களைக் குறிவைத்து ஷங்கர் விட்டிருக்கும் ரஜினி ராக்கெட்!... ரஜினியைப் பொறுத்தவரை, தனக்குக் கிடைத்த வாய்ப்பில் மற்றுமொரு முறை தன்னை நிரூபித்துவிட்டார். ஷங்கருக்குத்தான் - பெட்டர் லக் நெக்ஸ்ட் டைம்!" என்று எழுதி 41/100 மதிப்பெண்களை வழங்கினர்.^[24]

இவற்றையும் பார்க்க

• சிவாஜி திரைப்பட கதாபாத்திரமும் விமர்சனமும்

குறிப்புகள்

1. தி எகனாமிக் டைம்ஸ் நாளிதழ் படி 600 மில்லியன்,^[1] தி டெலகிராப் மதிப்பீட்டின் படி 80 கோடி,^[2] இந்தியா டுடே மதிப்பீட்டின் படி 890 மில்லியன்.^[3]