BRICS

BRICS is 'n interregeringsorganisasie bestaande uit tien ontluikende markte, hulle is Brasilië, Rusland, Indië, die Volksrepubliek China, Suid-Afrika (die oorspronklike lidlande waarvan dié akroniem ontleen is), Egipte, Ethiopië, Indonesië, Iran en die Verenigde Arabiese Emirate. Oorspronklik is die vier eersgenoemde lande as BRIC gegroepeer, met die aansluiting van Suid-Afrika in 2010. Al vyf BRICS-lande behoort tot die voorste nuut geïndustrialiseerde lande en is lidlande van die Groep van 20.

Die lidlande van die BRICS en hulle verteenwoordigers tydens spitsberade.
BRICS-lande
Brasilië (Federale Republiek Brasilië) President: Luiz Inácio Lula da Silva
Rusland (Russiese Federasie) President: Wladimir Poetin Eerste minister: Michail Misjoestin
Indië (Republiek Indië) President: Droupadi Murmu Eerste minister: Narendra Modi
Volksrepubliek China President: Xi Jinping Eerste Minister: Li Qiang
Suid-Afrika (Republiek van Suid-Afrika) President: Cyril Ramaphosa
Egipte (Arabiese Republiek Egipte) President: Abdel Fattah el-Sisi Eerste minister: Moustafa Madbouly
Ethiopië (Federale Demokratiese Republiek Ethiopië) President: Taye Atske Selassie Eerste minister: Abiy Ahmed
Indonesië (Republiek Indonesië) President: Prabowo Subianto
Iran (Islamitiese Republiek Iran) Opperleier: Ali Khamenei President: Masoud Pezeshkian
Verenigde Arabiese Emirate President: Mohamed bin Zayed Al Nahyan Eerste minister: Mohammed bin Rashid Al Maktoum

Samestelling

Die term "BRIC" is oorspronklik deur die Amerikaanse Beleggingsbank- en sekuriteitsverhandelingsmaatskappy Goldman Sachs omtrent einde 2001 vir die groot opkomende markte met 'n jaarlikse ekonomiese groei tussen vyf en tien persent, naamlik Brasilië, Rusland, Indië en die Volksrepubliek China, gebruik.^[1] Sedert 2009 vergader die vier lande jaarliks vir ekonomiese en politieke ooreenkomste,^[2] sedert 2010 is Suid-Afrika 'n volle lid van die BRICS.^[3]

Die BRICS is weens hul groeiende ekonomie, groot bevolkings, groot oppervlaktes en ryk hulpbronne baie belangrik vir die wêreldekonomie. Rusland is met 'n oppervlakte van 17 098 246 km² by verre die grootste land ter wêreld, die Volksrepubliek China is met 'n bevolking van 1 403 500 365 in 2016 die wêreld se mees bevolkte land, gevolg deur Indië se 1 324 171 354 in 2016. Brasilië is volgens oppervlakte sowel bevolking die wêreld se vyfde grootste land.

Die vyf BRICS-lande vorm die leidende lande in hul streke: Brasilië in Latyns- en Suid-Amerika, Rusland in Oos-Europa en Noord-Asië, Indië in Suid-Asië, die Volksrepubliek China in Oos-Asië en Suid-Afrika in Afrika.

Doelwitte en ekonomiese agtergrond

Die doelwitte van die BRICS-lande sluit in die wedersydse ondersteuning in ekonomiese en politiese kwessies asook die oprigting van eie internasionale instellings vir wedersydse beleggings, soos die Nuwe Ontwikkelingsbank.

Sedert die middel-2010's word die ekonomieë van die vyf BRICS-lede deur krisisse en dalende groei gekenmerk. As gevolg van die Krim-anneksasie deur Rusland is die Russiese ekonomie deur die Europese Unie en die Verenigde State aan sanksies onderwerp. Brasilië en Suid-Afrika moet met wydverspreide korrupsie en min ekonomiese groei veg. Net die Volksrepubliek China en Indië toon sedert baie jare 'n konstante ekonomiese groei van meer as vyf persent per jaar.

Uitbreiding met vyf nuwe lede

BRICS-leiers op 24 Augustus tydens aankondiging van die uitbreiding

Op 24 Augustus 2023, tydens die 15de BRICS-beraad, het die Suid-Afrikaanse president Cyril Ramaphosa aangekondig dat Argentinië, Egipte, Ethiopië, Iran, Saoedi-Arabië en die Verenigde Arabiese Emirate deur die huidige lede genooi is om by die blok aan te sluit.^[4] Volle lidmaatskap het op 1 Januarie 2024 in werking tree.^[5]

Die doel van hierdie uitbreiding word voorgehou as deel van die plan om 'n "multipolêre" wêreldorde te bou wat gewig gee aan tot dusver gedempte stemme van die Globale Suide en hulle na die sentrum van die wêreldagenda te bring.^[6] Op 30 Desember 2023 het die nuwe Argentynse regering egter aan dié land se aansoekproses onttrek en die uitnodiging vir aansluiting van die hand gewys.^[7] Saoedi-Arabië het ook nie op 1 Januarie 2024 amptelik by BRICS aangesluit nie.^[8]

Vennootlande

Op 18 Januarie 2025 het Nigerië die negende BRICS-vennoot geword ná Belarus, Bolivië, Kasakstan, Kuba, Maleisië, Oesbekistan, Thailand en Uganda.^[9]

Spitsberade

No.	Datum(s)	Gasland	Gasheer	Plek	Notas
1ste	16 Junie 2009	Rusland	Dmitri Medwedef	Jekaterinburg
2de	15 April 2010	Brasilië	Luiz Inácio Lula da Silva	Brasília	Gaste: Jacob Zuma (President van Suid-Afrika) en Riyad al-Maliki (Palestina se Minister van Buitelandse Sake)
3de	14 April 2011	Volksrepubliek China	Hu Jintao	Sanya	Eerste spitsberaad met Suid-Afrika ingesluit by die oorspronklike BRIC-lande.
4de	29 Maart 2012	Indië	Manmohan Singh	Nieu-Delhi	Die BRICS-kabel kondig 'n optiese vesel ondersese kommunikasiekabel-stelsel vir telekommunikasie tussen die BRICS-lande aan.
5de	26–27 Maart 2013	Suid-Afrika	Jacob Zuma	Durban
6de	14–17 Julie 2014	Brasilië	Dilma Rousseff	Fortaleza[10] Brasília	Ooreenkomste vir die Nuwe Ontwikkelingsbank en die Voorwaardelike Reserweraad onderteken. Gaste: Leiers van die Unie van Suid-Amerikaanse Nasies (UNASUR)[11][12]
7de	8–9 Julie 2015	Rusland	Wladimir Poetin	Oefa[13]	Gemeenskaplike beraad met SCO-EEU
8ste	15–16 Oktober 2016	Indië	Narendra Modi	Benaulim	Gemeenskaplike beraad met BIMSTEC
9de	3–5 September 2017	Volksrepubliek China	Xi Jinping	Xiamen	Gemeenskaplike beraad met EMDCD
10de	3–5 September 2018	Suid-Afrika	Cyril Ramaphosa	Johannesburg
11de	13–14 November 2019	Brasilië	Luiz Inácio Lula da Silva	Brasília
12de	17 November 2020	Rusland	Wladimir Poetin	Sint Petersburg	Videokonferensie
13de	9 September 2021	Indië	Narendra Modi	Nieu-Delhi	Videokonferensie
14de	23 Junie 2022	Volksrepubliek China	Xi Jinping	Beijing	Videokonferensie
15de	22–24 Augustus 2023	Suid-Afrika	Cyril Ramaphosa	Johannesburg	Ses lande, naamlik Argentinië, Egipte, Ethiopië, Iran, Saoedi-Arabië en die Verenigde Arabiese Emirate word genooi om in Januarie 2024 ook lede van BRICS te word. Op 29 Desember 2023 het die regering van Argentinië 'n brief aan alle BRICS-leiers gestuur waarin hulle die uitnodiging om by die blok aan te sluit amptelik van die hand gewys het.[14] Saoedi-Arabië het nog nie sy aanvaarding van lidmaatskap bevestig nie.[15]
16de	22–24 Oktober 2024	Rusland	Wladimir Poetin	Kazan	[16]

Moontlike lede

Die volgende lande het óf belangstelling uitgespreek om by BRICS aan te sluit óf het reeds aansoek gedoen om lidmaatskap:

Afrika  Algerië3  Angola[17]  Burkina Faso[18]  DR Kongo[19]  Ekwatoriaal-Guinee[20]  Ghana[21]  Kameroen[22]  Libië[23]  Mali[24]  Nigerië[25]3  Kongo[26]  Senegal[27]1

Sentraal-Afrikaanse Republiek[28]  Soedan[29]  Suid-Soedan[30]  Tunisië[31]  Uganda[32]3  Zimbabwe[33]1 Amerikas  Bolivië[34]3  Colombia[35]  El Salvador[36]  Kuba[37]3  Nicaragua[38]  Peru[39]  Venezuela[40]1

Asië  Afghanistan[41]  Azerbeidjan[42]1  Bahrein[43]1  Bangladesj[44]1  Irak[45]  Jemen[46]1  Kasakstan[47]3  Koeweit[48]1  Laos[49]1  Maleisië[50] 3  Mianmar[51]  Noord-Korea[52]

Oesbekistan3  Pakistan[53]1  Saoedi-Arabië[54]2  Sri Lanka[55]  Staat Palestina[56]  Sirië[57]1  Thailand[58]3  Viëtnam[59]3 Europa  Belarus[60]3  Serwië[61]  Turkye[62]3

1 – Amptelik aansoek gedoen om lidmaatskap
2 – Amptelik genooi om as 'n lidstaat aan te sluit, maar moet nog 'n formele besluit neem
3 – Amptelik genooi om as 'n vennootstaat aan te sluit^[63]

Hedendaagse BRICS-leiers

• 
   Brasilië
  Luiz Inácio Lula da Silva, President
  (Hoof van staat en regering)
• 
   Rusland
  Wladimir Poetin, President
  (Staatshoof)
• 
   Indië
  Narendra Modi, Eerste minister
  (Regeringshoof)
• 
   Volksrepubliek China
  Xi Jinping, President
  (Staatshoof)
  (Sekretaris-generaal as de facto leier sedert 15 November 2012)
• 
   Suid-Afrika
  Cyril Ramaphosa, President
  (Hoof van staat en regering)
• 
   Egipte
  Abdel Fattah el-Sisi, President
  (Staatshoof)
• 
   Ethiopië
  Taye Atske Selassie, President
  (Staatshoof)
• 
   Indonesië
  Prabowo Subianto, President
  (Staatshoof)
• 
   Iran
  Masoud Pezeshkian, President
  (Regeringshoof)
• 
   Verenigde Arabiese Emirate
  Mohammed bin Zayed Al Nahyan, President
  (Staatshoof)

Sien ook

• Groep van Agt