Гершоны

Гершо́ны^[1] — былая вёска ў Беларусі, каля ракі Бугу. З 1 чэрвеня 2007 году уваходзіць у склад Берасьця.

Гершоны лац. Gieršony / Hieršony
Першыя згадкі:	1564
Былая назва:	Гершановічы
Краіна:	Беларусь
Вобласьць:	Берасьцейская
Раён:	Берасьцейскі
Сельсавет:	Гершонскі
Насельніцтва:	124 чал. (1999)
Часавы пас:	UTC+3
Тэлефонны код:	+375 162
СААТА:	1212804011
Нумарны знак:	1
Геаграфічныя каардынаты:	52°2′49″ пн. ш. 23°43′1″ у. д.
Гершоны на мапе Беларусі ± Гершоны Гершоны
Галерэя здымкаў у Вікісховішчы

Назва

Асноўны артыкул: Керш

Герыш, Гірш або Кірш (Gerisch, Giersch, Kiersch) — імя германскага паходжаньня^[2]. Іменная аснова -гер- (-гар-, -гір-) (імёны ліцьвінаў Гералт, Гермонт, Бутгер; германскія імёны Gerolt, Geromont, Butger) паходзіць ад стараісьляндзкага geirr, стараверхненямецкага gēr 'дзіда'^[3].

Ранейшая назва — Гершано́вічы^[4].

Варыянты назвы ў гістарычных крыніцах: в Кгершановичахъ (8 сакавіка 1555 году)^[5]; z Gierszonowicz… cerkwie gierszonowskiej swieszczenik… Gierszenowicze (1667 год)^[6].

Гісторыя

У 1564 годзе ўпамінаецца Кіршанавіцкі палац. У XVI стагодзьдзі Гершоны былі сялом у Берасьцейскім старостве Трокскага ваяводзтва Вялікага Княства Літоўскага. У 1566 годзе тут жыў 41 чалавек^[7]. Гісторыя Гершонаў зьвязаная зь іменем Афанасія Філіповіча, берасьцейскага ігумена. 5 верасьня 1648 году ён быў забіты непадалёк ад вёскі за выступы супраць Берасьцейскай уніі.

27 лістапада 2007 году цэнтар Гершонскага сельсавету перанесьлі з Гершонаў у вёску Страдзеч^[8]. 1 чэрвеня 2007 году вёску перадалі ў склад места Берасьця^[9]. 21 сьнежня 2007 году вёску вылучылі з складу Гершонскага сельсавету^[10].

У студзені 2008 году ўлады Берасьця апублікавалі праект забудовы мескага раёну Валынка-Гершоны.

Эканоміка

Сумеснае прадпрыемства па вытворчасьці мэталячарапіцы «Берасьцесталь».

Славутасьці

У Гершонах знаходзіцца Царква Раства Прасьвятой Багародзіцы, збудаваная ў 1866—1869 гадох. Каля вёскі знаходзяцца фартыфікацыі Берасьцейскага (Брэст-Літоўскага, 62-га) раёну (гл. Берасьцейская крэпасьць):

• Форт № 5, збудаваны ў 1878—1888 гадох. Ён дастаткова добра захаваўся і цяпер ёсьць часткай музэю «Берасьцейская крэпасьць»;
• Форт літары З, збудаваны ў 1913—1914 гадох. Па Другой сусьветнай вайне выкарыстоўваўся пад склад угнаеньняў і істотна пашкоджаны;
• Доўгачасовыя агнявыя пункты Берасьцейскага раёну ўмацаваньняў, збудаваныя ў 1940—1941 гадох.