Дабрамысьлі

Дабрамы́сьлі^[1] — вёска ў Беларусі, на рацэ Чарніцы. Цэнтар сельсавету Лёзьненскага раёну Віцебскай вобласьці. Знаходзяцца за 15 км на паўднёвы захад ад мястэчка і чыгуначнай станцыі Лёзна, за 55 км ад Віцебску; на аўтамабільнай дарозе Лёзна — Арэхаўск.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Дабрамысьлі (неадназначнасьць).

Дабрамысьлі лац. Dabramyśli
Першыя згадкі:	1749
Краіна:	Беларусь
Вобласьць:	Віцебская
Раён:	Лёзьненскі
Сельсавет:	Дабрамысьлінскі
Насельніцтва:	1110 чал. (2010)
Часавы пас:	UTC+3
Тэлефонны код:	+375 2138
СААТА:	2230825021
Нумарны знак:	2
Геаграфічныя каардынаты:	54°55′51.4″ пн. ш. 30°40′16.1″ у. д.
Дабрамысьлі на мапе Беларусі ± Дабрамысьлі Дабрамысьлі
Галерэя здымкаў у Вікісховішчы

Дабрамысьлі — даўняе мястэчка гістарычнай Віцебшчыны. Сярод мясцовых славутасьцяў вылучаўся мураваны касьцёл у стылі барока і драўляная Пятніцкай царква, помнікі архітэктуры XVIII—XIX стагодзьдзяў, зруйнаваныя савецкімі ўладамі.

Гісторыя

Рынак і касьцёл па маскоўскай перабудове. Малюнак А. Кабішчар-Якерсон, 1925 г.

Вялікае Княства Літоўскае

Першы пісьмовы ўпамін пра мястэчка Дабрамысьлі датуецца 1749 годам. Паселішча ўвайходзіла ў склад Віцебскага павету Віцебскага ваяводзтва.

У 1754^[a] годзе ў мястэчку збудавалі мураваны касьцёл^[2].

Пад уладай Расейскай імпэрыі

Пятніцкая царква. Малюнак А. Кабішчар-Якерсон, 1925 г.

У выніку першага падзелу Рэчы Паспалітай (1772 год) Дабрамысьлі апынуліся ў складзе Расейскай імпэрыі, у Аршанскім павеце Магілёўскай губэрні. У 1850 годзе ў мястэчку збудавалі новую драўляную царкву Сьвятой Параскевы Пятніцы. Па здушэньні паўстаньняў расейскія ўлады гвалтоўна перарабілі тутэйшы касьцёл пад царкву Ўрадавага сыноду Расейскай імпэрыі (Маскоўскай царквы).

На мяжы XIX—XX стагодзьдзяў у мястэчку дзеялі 2 царквы і юдэйская малітоўная школа, працавала расейская народная вучэльня^[3] (з 1875 году). На 1910 год — 215 двароў, дзеялі царква і юдэйскі малітоўны дом, працавалі народная вучэльня, 5 хлебных крамаў, млын.

Найноўшы час

25 сакавіка 1918 году згодна з Трэцяй Устаўной граматай Дабрамысьлі абвяшчаліся часткай Беларускай Народнай Рэспублікі. 1 студзеня 1919 году згодна з пастановай І зьезду КП(б) Беларусі яны ўвайшлі ў склад Беларускай ССР, аднак 16 студзеня Масква адабрала мястэчка разам зь іншымі этнічна беларускімі тэрыторыямі ў склад РСФСР. У 1924 годзе Дабрамысьлі вярнулі БССР, дзе яны сталі цэнтрам сельсавету. Статус паселішча панізілі да вёскі. У Другую сусьветную вайну савецкія войскі ўзарвалі касьцёл, помнік архітэктуры XVIII ст.

На 1971 год у Дабрамысьлях было 146 двароў, на 1997 год — 466. У 2000-я гады паселішча атрымала афіцыйны статус «аграгарадку».

Насельніцтва

Дэмаграфія

• XIX стагодзьдзе: 1860 год — 350 чал.^[4]
• XX стагодзьдзе: 1910 год — 459 чал. у мястэчку Дабрамысьлі і 68 чалавек у вёсцы Лагунах або Дабрамысьлі^[5]; 20 жніўня 1919 году — 603 чал.^[6]; 1971 год — 425 чал.; 1997 год — 1236 чал.^[7]; 1999 год — 1242 чал.
• XXI стагодзьдзе: 2010 год — 1110 чал.

Інфраструктура

У Дабрамысьлях працуюць сярэдняя школа, дом культуры, бібліятэка, лякарня, амбуляторыя, пошта.

Турыстычная інфармацыя

Страчаная спадчына

• Касьцёл (1754)
• Царква Сьвятой Параскевы Пятніцы (1850)

Заўвагі

1. Спісак царквей, касьцёлаў і іншых малітвенных дамоў, існуючых па Лёзьненскаму раёну Віцебскай вакругі, 08.01.1926 // Дзяржаўны архіў Віцебскай вобласьці. Т. 2356. Воп. 1. Спр.31.