Новая пошта

«Новая пошта» — прыватнае прадпрыемства Ўкраіны, заснаванае ў лютым 2001 году.

«Новая пошта»
укр. «Нова пошта»
Тып	таварыства з абмежаванай адказнасьцю
Дэвіз	Заўтра будзе
Заснаваная	13 лютага 2001 (24 гады таму)
Заснавальнікі	Вячаслаў Клімаў, Уладзімер Паперашнюк, Іна Паперашнюк
Уласьнікі	Вячаслаў Клімаў, Уладзімер Паперашнюк[1]
Краіна	Украіна
Разьмяшчэньне	Кіеў
Адрас	Галасееўскі раён, мікрараён Віта-Літоўская, Сталічная шаша, дом 103, корпус 1[2]
Ключавыя фігуры	Тарас Кірычэнка (старшыня)[1], Аляксандар Бульба (кіраўнік)
Галіна	сфэра паслугаў
Паслугі	дастаўка пасылкі, грашовы перавод
Абарачэньне	▲44,779 млрд грыўняў[3] (2024 год; 1,065 млрд $)[4]
Апэрацыйны прыбытак	▲4,407 млрд грыўняў (2024 год; 104,8 млн $)
Чысты прыбытак	▼2,500 млрд грыўняў (2024 год; 59,4 млн $)
Лік супрацоўнікаў	34 106 (2024 год)[5]
Матчына кампанія	холдынг «Новая пошта» (90%; Кіпр)
Даччыныя кампаніі	«Нова Пэй» (70%), «Новая пошта Польшчы» (92%)
Аўдытар	«Бэйкер Тылі Ўкраіны»
novapost.com
«Новая пошта» у Вікісховішчы

На 2025 год дастаўляла пасылкі, дакумэнты і грузы ў паштовыя аддзяленьні, паштаматы і на адрас ва Ўкраіне і за мяжой, у тым ліку для прадпрымальнікаў. Улучала даччыныя прадпрыемствы: «Новая пошта Эўропы», «Новая Глябальная», «Авіялініі Супэрнова», аплатную сыстэму «Нова Пэй» і «Новая Лічбавая». Штодня дастаўляла 1,5 млн пасылак і грузаў. Мела ўласную сетку з 11 400 аддзяленьняў і 15 500 паштаматаў. За 2023 год лік адпраўленьняў вырас на 30 % да 412 млн. Наймала 42 000 супрацоўнікаў, у тым ліку 10 000 праз супольнікаў. Валодала 133 аўтаматызаванымі сартавальнямі пасылак у кожным абласным цэнтры Ўкраіны, найбольшыя зь якіх месьціліся ў Кіеве, Харкаве, Хмяльніцкім, Львове, Дняпры і Запарожжы. У 2023 годзе запусьцілі новыя такія сартавальні ў Барыспалі (Кіеўская вобласьць) і Адэсе. Сартавальні маглі апрацоўваць ад 8000 да 50 000 пасылак за гадзіну^[6].

«Новая Глябальная» дастаўляла тавары ад інтэрнэт-крамаў Азіі, Амэрыкі і Вялікабрытаніі. Заснаваныя ў 2021 годзе «Авіялініі Супэрнова» ладзілі звыш 20 грузавых рэйсаў між краінамі Эўропы. «Новая пошта Эўропы» дастаўляла пасылкі і грузы праз замежныя прадстаўніцтвы ў 11 краінах Эўропы: Малдове, Польшчы, Летуве, Латвіі, Чэхіі, Румыніі, Нямеччыне, Славаччыне, Эстоніі, Вугоршчыне і Італіі. У гэтых краінах супольнікі прапаноўвалі 35 000 кропак абслугоўваньня праз свае аддзяленьні і паштаматы. Аплатная сыстэма «Нова Пэй» займала 35 % рынку грашовых пераводаў Украіны, паводле Нацыянальнага банку Ўкраіны, і запусьціла ў 2023 годзе мабільны дастасунак для аплаты паслугаў «Новай пошты». Таксама «Нова Пэй» атрымала дазвол на адкрыцьцё разьліковых рахункаў і выпуск аплатных картак. «Новая Лічбавая» распрацоўвала вэб-дастасункі, якія налічвалі 32 млн карыстальнікаў. За 2023 год холдынг «Новая пошта» павялічыў выплату падаткаў на 50 % да 10,7 млрд грыўняў (281 млн $), што зрабіла прадпрыемства адным з 20 найбольшых падаткаплатнікаў Украіны^[6].

Сартавальныя тэрміналы

Супрацоўнік «Новай пошты» рыхтуе пасылку (2024 год)

На 2025 год «Новая пошта» мела 8 аўтаматызаваных сартавальных тэрміналаў.

1. Кіеўскі. У сакавіку 2018 году адчынілі 1-ю чаргу тэрмінала, а ў студзені 2021-га — 2-ю, што павялічыла яго магутнасьць апрацоўкі да 50 000 пасылак за гадзіну. Люстраны сканэр счытваў штрых-код зь любога боку, а сартавальныя стужкі на некалькіх паверхах празь сьпіральныя вэртыкальныя жолабы накіроўвалі пасылкі ўніз на канвэеры для загрузкі ў самаход. Пры гэтым пасылкі вагой да 1,5 кг сартавалі асобна^[7].
2. Хмяльніцкі. Адчынены 17 траўня 2019 году на плошчы 0,77 га. Мог апрацоўваць 14 000 адпраўленьняў за гадзіну, у тым ліку 8500 пасылак зь 70 гарадоў на захадзе Ўкраіны. Наймаў 300 супрацоўнікаў^[8].
3. Львоўскі. Адчынены 20 верасьня 2019 году на плошчы 1,5 га. Мог апрацоўваць да 15 000 пасылак і грузаў за гадзіну, якія сартавалі асобна. Пасылкі з сартавальнай стужкі па 24 тэлескапічных канвэерах загружалі ў самаходы. Таксама наймаў 300 супрацоўнікаў. Сартаваў пасылкі па 108 гарадах Украіны, у тым ліку з 28 па-за Львоўскай вобласьцю, а таксама па ўсіх аддзяленьнях Львова^[9].
4. Харкаўскі. Запушчаны ў сьнежні 2020 году. Займаў плошчу ў 1,9 га. Меў 350 супрацоўнікаў і 31 тэлескапічны канвэер. Абслугоўваў гарады Харкаўскай, Данецкай і Луганскай вобласьцяў. Мог апрацаваць да 20 000 адпраўленьняў за гадзіну, у тым ліку 8500 пасылак^[10].
5. Дняпроўскі. Адчыніўся 4 лютага 2022 году на плошчы 1,8 га. Мог сартаваць пасылкі вагой ад 2 да 30 кг, а таксама асобна дробныя адпраўленьні вагой да 2 кг. На грузавой пляцоўцы выкарыстоўвалі робатаў, якія маглі несьці на сабе 300 кг і цягнуць за сабой яшчэ 1 тону. У красавіку 2022 году ўвялі дадатковую сартавальную лінію, што павялічыла магутнасьць тэрмінала з 26 000 да 36 000 пасылак за гадзіну. Апрацоўваў пасылкі вагой да 30 кг праз 29 канвэераў для загрузкі і 14 для выгрузкі. Абслугоўваў 108 гарадоў Днепрапятроўскай, Харкаўскай і Данецкай вобласьцяў. Наймаў 500 супрацоўнікаў^[11].
6. Запароскі. Запрацаваў у ліпені 2022 году на плошчы 0,8 га. Сартаваў пасылкі вагой да 30 кг на 2-х аўтаматызаваных стужках. Дробныя грузы вагой да 2-х кг сартавалі на лініі магутнасьцю да 8000 адпраўленьняў за гадзіну, якія накіроўвалі ў 186 аддзяленьняў. Сканэр счытваў 3 штрых-коды за сэкунду з 6 бакоў скрыні. Адначасова прымаў да 78 цяжкавікоў для пагрузкі і разгрузкі. Меў прапускную здольнасьць да 16 000 адпраўленьняў за гадзіну^[12].
7. Адэскі. Запусьцілі ў 2023 годзе.
8. Барыспальскі (Кіеўская вобласьць). Запусьцілі ў 2023 годзе.

Замежная прысутнасьць

Аддзяленьне «Новай пошты» ў Рэшаве (Польшча, 2024 год)

На 2025 год «Новая пошта» мела прадстаўніцтвы ў 11 краінах Эўропы: Малдове, Польшчы, Летуве, Чэхіі, Румыніі, Нямеччыне, Славаччыне, Эстоніі, Вугоршчыне і Італіі. На пачатак 2024 году «Новая пошта Эўропы», створаная ў 2023 годзе, налічвала 86 аддзяленьняў і выкарыстоўвала 35 000 аддзяленьняў супольнікаў у гэтых краінах. Даччынае прадпрыемства «Новая Глябальная» дазваляла праз уласную службу набыцьця гандляваць і купляць у інтэрнэт-крамах ЗША і Эўразьвязу.

1. Малдова. Адчынілі ў 2014 годзе. Налічвалася 20 грузавых і 260 паштовых аддзяленьняў, 34 пункты прыёму адпраўленьняў. Грузы і пасылкі дастаўлялі на наступны дзень. У 2023 годзе дастаўку павялічылі ўдвая да 1,3 млн пасылак і грузаў. У выніку прадпрыемства ўвайшло ў 3-ку найбольшых у Малдове ў галіне дастаўкі.
2. Польшча. Адчынілі ў кастрычніку 2022 году. Працавала 39 аддзяленьняў у 25 гарадах і 2 сартавальні ў Варшаве і Глогаве Малапольскім (Жэшаўскі павет). Супольнікам у краіне выстапала мясцовае прадпрыемства «ІнПост» з 20 000 паштовых аддзяленьняў, празь якой была магчымаць адпраўляць і атрымліваць пасылкі.
3. Летува. Стварылі ў сакавіку 2023 году. У Вільні працавала грузавое аддзяленьне для апрацоўкі адпраўленьняў вагой да тоны, а ў Коўне — паштовае для пасылак вагой да 30 кг. Дастаўлялі ў 480 паштовых аддзяленьняў і 218 паштаматаў супольнікаў.
4. Чэхія. У чэрвені 2023 году адчынілі першыя 2 аддзяленьні ў Празе, а ўвосень — у Брне. Дастаўлялі ў 1400 кропак прыёму і 1300 паштовых аддзяленьняў.
5. Румынія. 15 чэрвеня 2023 году адчынілі аддзяленьні ў Бухарэсьце і Брашове.
6. Нямеччына. 15 чэрвеня 2023 году стварылі аддзяленьне ў Бэрліне. Да канца 2023 году запрацавалі яшчэ 12 аддзяленьняў у Гамбургу, Мюнхэне, Дрэздэне, Франкфурце-на-Майне, Кёльне, Дзюсэльдорфе, Дортмундзе, Брэмэне, Дрэздэне, Бютэльборне (зямля Гэсэн), Магдэбургу і Гановэры. Таксама для пасылак былі даступныя 7700 супольніцкіх кропак абслугоўваньня.
7. Славаччына. У кастрычніку 2023 году адчынілі аддзяленьне ў Браціславе. Былі даступныя 1500 паштаматаў і кропак абслугоўваньня.
8. Эстонія. Стварылі ў кастрычніку 2023 году. Дастаўлялі праз 151 паштовае аддзяленьне і 32 паштаматы.
9. Латвія. Заснавалі ў кастрычніку 2023 году. Дастаўлялі праз 233 паштовыя аддзяленьні і 201 паштамат.
10. Вугоршчына. Стварылі ў лістападзе 2023 году ў Будапэшце. Выкарыстоўвалі 200 паштовых аддзяленьняў і 1600 паштаматаў.
11. Італія. Стварылі ў сьнежні 2023 году ў Міляне^[13].

Мінуўшчына

Іна Паперашнюк — сузаснавальніца «Новай Пошты» (2019 год)

13 лютага 2001 году 25-гадовыя сябры па ўнівэрсытэце Вячаслаў Клімаў і палтаўскі кандытар Уладзімер Паперашнюк заснавалі прадпрыемства «Новая пошта» для хуткай дастаўкі пасылак па Ўкраіне. Сузаснавальніцай стала Іна Паперашнюк. Пачатковы капітал склаў 7000 даляраў, а штат на пачатку налічваў 7 супрацоўнікаў. У 2003 годзе Клімаў і Паперашнюк скончылі бізнэс-школу са ступеняй выканаўчага магістра справавога кіраваньня. У 2005 годзе ўтварылі 2 галаўныя сядзібы ў Кіеве і Палтаве ды абласную сетку аддзяленьняў. У 2007 годзе «Новая пошта» ўпершыню выйшла на прыбытковасьць. У 2008 годзе займелі аддзяленьні ва ўсіх абласьцях Украіны. Аднак у ходзе сусьветнага фінансавага крызісу абарачэньне ўпала на 30 %^[14].

У 2009 годзе «Новая пошта» становіцца найбольшым прадпрыемствам хуткай дастаўкі ва Ўкраіне за кошт пераўтварэньня ў ключавога супольніка інтэрнэт-крамаў. У 2010 годзе абсяг перавозак вырас з 1,6 млн да больш як 4-х млн пасылак, а ўласная сетка павялічылася з 80 да 140 аддзяленьняў. У 2011 годзе лік адпраўленых пасылак вырас да 12 млн, а ўласная сетка разраслася да больш як 500 аддзяленьняў. Штат прадпрыемства вырас да больш як 5000 супрацоўнікаў, таму заснавалі Карпаратыўны ўнівэрсытэт для разьвіцьця іх навыкаў. У 2014 годзе адчынілі замежныя прадстаўніцтвы ў Грузіі і Малдове. Таксама ў аддзяленьнях зьявілася паслуга грашовага пераводу праз аплатную сыстэму «Для пошты», якую ў 2019 годзе перайменавалі ў «Нова Пэй»^[14]. Сярод іншага, запусьцілі ўласны мабільны дастасунак, які да канца 2015 году спампавалі звыш 1,5 млн чалавек. У 2014 годзе стварылі дастаўку гуманітарнай дапамогі за кошт «Новай пошты», празь якую за 8 гадоў 2000 дабрачынных установаў накіравалі звыш 1,5 млн пасылак^[6].

Паштамат «Новай пошты» ў Ізмаіле (Адэская вобласьць, 2022 год)

За 2015—2018 гады ў Кіеве пабудавалі аўтаматызаваную сартавальню, якая пачала апрацоўваць па 200 000 пасылак за содні. У 2018 годзе ўвялі мэдычнае страхаваньне для ўсіх супрацоўнікаў «Новай Пошты». У 2019 годзе аўтаматычныя сартавальні запрацавалі ў Хмяльніцкім коштам 10 млн эўра і Львове. Спадарожна праз рост дастаўкі з канца 2017 году да 2019 году ўласная сетка вырасла з 2300 да 6000 аддзяленьняў. У 2020-м запусьцілі аўтаматычную сартавальню ў Харкаве. У ходзе каронавіруснай пандэміі больш як 50 лякарням Украіны бясплатна перадалі тленавае абсталяваньне, лекі і мэдычныя маскі на 60 млн грыўняў (2,1 млн даляраў). У 2021 годзе запусьцілі 2-ю частку сартавальні ў Кіеве коштам 14 млн эўра, пасьля чаго яе магутнасьць вырасла да 50 000 пасылак за гадзіну. Да канца 2021 году ўласная сетка пашырылася да 9990 аддзяленьняў і 12 739 паштаматаў. Цягам 2017—2021 гадоў дастаўка вырасла з 146 млн да 372-х млн пасылак за год. За 2015—2021 гады замежнае абслугоўваньне пашырылі з 2-х да 7000 справавых кліентаў паводле дамовы і да 7 млн аднаразовых карыстальнікаў дастаўкі. У 2021 годзе для замежнай дастаўкі заснавалі «Авіялініі Супэрнова»^[14].

Цяжкавік «Новай Пошты» ў Дняпры (2024 год)

У лютым 2022 году адчынілі аўтаматызаваныя сартавальні ў Дняпры коштам 28,5 млн эўра і Запарожжы. У 2022 годзе дастаўка вырасла да 315 млн пасылак і грузаў, а падатковыя выплаты ў бюджэт Украіны — на 700 млн грыўняў да 7,1 млрд грыўняў (194 млн $). У сувязі з пачаткам расейскага ўварваньня ва Ўкраіну 24 лютага 2022 году «Новая пошта» аплаціла дастаўку 22 073 тонаў гуманітарнай дапамогі, што каштавала прадпрыемству больш за 400 млн грыўняў (10,9 млн $) за год. Цягам 2022 году ў 18 найбольшых гарадах Польшчы адчынілі 30 уласных аддзяленьняў, лік якіх да канца 2023 году павялічылі да 50. У лютым 2023 году запрацавала аддзяленьне «Новай пошты Летувы» ў Вільні, а «Авіялініі Супэрнова» распачалі дастаўку грузаў з ЗША і Кітаю па маршрутах Рыга — Рэшаў (Польшча) і Рыга — Кішынёў (Малдова). Таксама «Новая пошта» займела 2 грузавыя сартавальні ў Польшы — у Варшаве і Глогаве Малапольскім (Жэшаўскі павет) — агульнай магутнасьцю ў 4500 пасылак за содні. У 2023 годзе запусьцілі аўтаматызаваныя сартавальні ў Адэсе і Барыспалі (Кіеўская вобласьць). Даччынае прадпрыемства «Новая пошта Эўропы» адчыніла аддзяленьні ў Эстоніі, Латвіі, Румыніі, Чэхіі і Нямеччыны^[14]. За 2023 год бясплатна даставілі 33 000 гуманітарных пасылак. У 2-м паўгодзьдзі 2023 году сабралі 330 млн грыўняў (8,7 млн $) на сродкі сувязі для супрацьпаветранай абароны^[6].