Радзілавічы

Ра́дзілавічы^[1] (таксама — Радзі́лавічы^[2], Радзіві́лавічы^[1][3]; з 1931 году — Дзяржы́нск^[1]) — вёска ў Беларусі, на левым беразе ракі Рова (Плаў). Цэнтар Радзілавіцкага сельсавету Лельчыцкага раёну Гомельскай вобласьці. Знаходзяцца за 14 км на паўднёвы захад ад Букчы, за 75 км на захад ад Лельчыцаў.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Дзяржынск (неадназначнасьць).

Радзілавічы лац. Radziłavičy
Першыя згадкі:	1520
Краіна:	Беларусь
Вобласьць:	Гомельская
Раён:	Лельчыцкі
Сельсавет:	Радзілавіцкі
Вышыня:	149 м н. у. м.
Насельніцтва:	812 чал. (2010)
Часавы пас:	UTC+3
Тэлефонны код:	+375 2356
СААТА:	3228820021
Нумарны знак:	3
Геаграфічныя каардынаты:	51°40′10″ пн. ш. 27°32′53″ у. д.
Радзілавічы на мапе Беларусі ± Радзілавічы Радзілавічы
Галерэя здымкаў у Вікісховішчы

Назва

Асноўныя артыкулы: Радзівіл (імя) і Радзіла

Паводле францускага лінгвіста-германіста Раймонда Шмітляйна, які на падставе шматгадовых дасьледаваньняў прыйшоў да высноваў пра германскае паходжаньне літоўскіх уласных імёнаў, імя Радзівіл цалкам адпавядае засьведчанаму ў гістарычных крыніцах старажытнаму германскаму імя Ratwilius^[4][5].

Гісторыя

Вяілкае Княства Літоўскае

Упершыню ўпамінаюцца ў 1520 годзе, як сяло ў складзе Вялікага Княства Літоўскага, уладаньне вялікага гетмана літоўскага Канстантына Астроскага. У 1777 годзе ў сяле збудавалі драўляную царкву.

Пад уладай Расейскай імпэрыі

На 1886 год у сяле і маёнтку Радзілавічах было 53 двары, на 1888 год — 69 двароў. На 1909 год было 116 двароў у сяле і 2 двары ў фальварку Радзілавічах.

Найноўшы час

З 20 жніўня 1924 году — цэнтар сельсавету. У 1931 годзе савейкія ўлады ў рэчышчы палітыкі русіфікацыі і дэнацыяналізацыі беларусаў перайменавалі Радзілавічы ў Дзяржынск. На 1940 год — 187 двароў.

У чэрвені 1943 годзе нацысты спалілі вёску і загубілі 13 жыхароў. На 1971 год — 399 двароў, на 1998 год — 358 двароў, на 2000 год — 368 двароў.

Мікравёскі

Традыцыйная вёска падзяляецца на 4 мікравёскі^{[Крыніца?]}:

• Брод;
• Бярэзьнік;
• Падвымокла — знаходзіцца ў нізіне;
• Селішча — засялялася па нямецка-савецкай вайне.

Акрамя гэтага цэнтар вёскі называюць «Сяло».

Насельніцтва

Дэмаграфія

• XIX стагодзьдзе: 1886 год — 298 чалавек
• XX стагодзьдзе: 1909 год — 672 чалавекі ў сяле Радзілавічах і 12 чалавек у фальварку Радзілавічах^[6]; 1923 год — 898 чалавек; 1940 год — 570 чалавек; 1971 год — 1668 чалавек; 1998 год — 1116 чалавек; 1999 год — 1076 чалавек; 2000 год — 1070 чалавек
• XXI стагодзьдзе: 2010 год — 812 чалавек

Інфраструктура

У вёсцы знаходзіцца лясьніцтва, рамонтныя майстэрні, сярэдняя школа, бібліятэка, аддзяленьне сувязі, аўтаматычная тэлефонная станцыя, фэльчарска-акушэрскі пункт, дзіцячы сад, аддзяленьне ААТ «Беларусбанк», 3 крамы. Цэнтар камунальнага сельскагаспадарчага прадпрыемства «На варце».

Турыстычная інфармацыя

Страчаная спадчына

• Драўляная царква