Анатоль Васілевіч Бараноўскі

У Вікіпедыі ёсць артыкулы пра іншых людзей з прозвішчам Бараноўскі.

Анатоль Васілевіч Бараноўскі (9 мая 1937(1937-05-09), Менск — 31 студзеня 2017(2017-01-31), Самахвалавічы, Мінская вобласць) — беларускі мастак-жывапісец, педагог. Заслужаны дзеяч мастацтваў Беларусі (1992). Народны мастак Беларусі (2012)^[1].

Анатоль Васілевіч Бараноўскі
Анатоль Бараноўскі (фота Яўгена Колчава).
Дата нараджэння	9 мая 1937(1937-05-09)
Месца нараджэння	Менск, Беларуская ССР, СССР
Дата смерці	31 студзеня 2017(2017-01-31) (79 гадоў)
Месца смерці	Самахвалавічы, Самахвалавіцкі сельсавет, Мінскі раён, Мінская вобласць, Беларусь
Месца пахавання	Усходнія могілкі
Грамадзянства	СССР  Беларусь
Дзеці	Алена Анатолеўна Бараноўская
Род дзейнасці	мастак
Месца працы	Беларуская дзяржаўная акадэмія мастацтваў
Жанр	пейзаж, партрэт і нацюрморт
Вучоба	мастацкі факультэт БДАМ (1965) Мінскае мастацкае вучылішча (1958) Беларускі саюз мастакоў
Мастацкі кірунак	рэалізм і імпрэсіянізм
Вядомыя працы	«Гнёзды» (1983), «Купалле» (1982), «Нараджэнне дня» (1984), «Восень на Прыпяці» (1994), «З веку ў век» (2001), «Спадчына. Мірскі замак» (2005), «Адзінства» (2007), «Крэва» (2007), «Вызвалены Мінск» (2008)
Уплыў	Іван Восіпавіч Ахрэмчык, Альгерд Адамавіч Малішэўскі, Іван Нічыпаравіч Стасевіч і Канстанцін Міхайлавіч Касмачоў
Уплыў на	Алесь Ксёндзаў, Анатоль Кузняцоў, Аляксей Кузьміч, Уладзімір Хадаровіч, Алена Бараноўская, Аляксей Хацкевіч
Прэміі
Узнагароды
Медыяфайлы на Вікісховішчы

Біяграфія

Нарадзіўся 9 мая 1937 года ў Мінску. У 1953—1958 гадах вучыўся ў Мінскім мастацкім вучылішчы (выкладчык А. Малішэўскі). У 1958 годзе заснаваў мастацкую студыю ў Палацы культуры Мінскага трактарнага завода, якую вёў да 1972 года. У 1959—1965 гадах вучыўся ў Беларускім тэатральна-мастацкім інстытуце. Педагогі І. Ахрэмчык, І. Стасевіч, К. Касмачоў^[2]. З 1965 года прымаў удзел у рэспубліканскіх, міжнародных, групавых і персанальных выстаўках як у Беларусі, так і за яе межамі.

У 1973 годзе стаў членам Союза мастакоў Беларусі, з 1974 года — член Саюза мастакоў СССР. У 1977—1986 гадах быў сакратаром секцыі жывапісу Саюза мастакоў БССР.

Шмат часу прысвяціў педагагічнай дзейнасці. На працягу 1966—2007 гадоў выкладаў на мастацкім факультэце Беларускай дзяржаўнай акадэміі мастацтваў, спачатку на кафедры жывапісу (1966—1975), потым на кафедры манументальна-дэкаратыўнага мастацтва (1975—2007). З 1987 года быў дацэнтам кафедры, з 1997 — прафесарам. У розныя часы вучнямі Анатоля Бараноўскага былі У. Тоўсцік, У. Зінкевіч, У. Крываблоцкі, В. Барабанцаў, В. Альшэўскі і іншыя. З 2007 года займаўся выключна творчай дзейнасцю. Жыў і працаваў у горадзе Мінску.

Лаўрэат Дзяржаўнай прэміі Рэспублікі Беларусь у галіне літаратуры, мастацтва і архітэктуры (1996) — за цыкл жывапісных прац 1993—1995 гадоў «Далягляды бацькаўшчыны».

Творчасць

Анатоль Бараноўскі працаваў у розных жанрах, але найбольш адметна — у пейзажы. Мастацкай манеры аўтара ўласцівы асабліва пільныя адносіны да колеру, фактуры, кампазіцыі^[3]. Творы мастака адрозніваюцца імпрэсіяністычным падыходам вобразнага адлюстравання, рамантыка-лірычнымі і паэтычнымі трактоўкамі прыродных матываў^[4]. Паводле Міхаіла Баразны: "У творах жывапісца выяўлена дакладная вобразная структура, у якой гарманічна злучаны своеасаблівая творчая манера аўтара, пабудаваная на прыёмах пуантылістаў, і абвостраная назіральнасць, якая праяўляецца ў нечаканых кампазіцыйных прыёмах, ракурсах"^[5].

Творчасць мастака была прадстаўлена ў Англіі, Польшчы, Германіі, Бельгіі, Швейцарыі, Францыі, ЗША, Украіне, Расіі, Балгарыі, Даніі, Японіі, Кітаі, Італіі і іншых краінах свету. Анатоль Бараноўскі быў удзельнікам першага міжнароднага пленэра ў Сазопалі (Балгарыя, 1981), першага і другога міжнароднага пленэра па жывапісу імя В. К. Бялыніцкага-Бірулі (Магілёў, 1996), міжнароднага пленэра «Вобраз Радзімы ў выяўленчым мастацтве», прысвечанага памяці Н. В. Неўрэва (Магілёў, Беларусь, 1998), усходнееўрапейскай праграмы 1996/97, Мастацкай акадэміі Мюнстэра (Германія, 1996). У 2002 годзе творы Анатоля Бараноўскага экспанаваліся на выстаўцы «Сучасныя мастакі Беларусі» ў зале П’ера Кардэна (Парыж)^[5].

Творы знаходзяцца ў Нацыянальным мастацкім музеі Рэспублікі Беларусь, Нацыянальным цэнтры сучаснага мастацтва, Магілёўскім абласным мастацкі музеі імя П. В. Масленікава, Светлагорскай карціннай галерэі «Традыцыя» імя Г. Пранішнікава, Музеі сучаснага выяўленчага мастацтва Кітая (Пекін), Нацыянальнай бібліятэцы Рэспублікі Беларусь, у калекцыі ОАО «Пріорбанк» (Мінск), у зборах мастацкай галерэі Сазопаля (Балгарыя), фондзе Міжнароднай канфедэрацыі саюзаў мастакоў (Масква), іншых грамадскіх установах, а таксама ў прыватных калекцыях па ўсяму свету.

Памяць

Асобе мастака быў прысвечаны шэраг тэлеперадач і фільмаў, сярод якіх дакументальны фільм «Далягляды Бацькаўшчыны» (рэж. В. Салаўёва. БТ, 1997) тэлеперадача «Партрэт у інтэр’еры» (рэж. Л. Цітарэнка, аўтар-склад. В. Шумай. СТБ, 2003), «Культурнае жыццё» (А. Яфрэмаў). СТБ, 2008). У 2010 годзе ў свет выйшаў дакументальны фільм аб жыцці і творчасці мастака «Шлях да святла» (з цыклу «Кніга Лёсаў». рэж. Н. Сідзельнікава. БТ, 2010), у 2016 годзе — тэлеперадача «Камертон»^[6] (рэж. А. Красуляк, аўт. І. Нікалаева. Беларусь-3). У 2018 годзе быў паказаны фільм «Анатоль Бараноўскі»^[7] (у межах аўтарскага тэлевізійнага цыкла «Сучаснае мастацтва Беларусі»; аўт. і рэж. А. Лукашэвіч, другі рэж. А. Аляксееў, Беларусь 3).

Сям’я

Дачка Алена Бараноўская, таксама мастачка.

Галерэя

• 
  Анатоль Бараноўскі. "Купалле". 1982 г. Палатно, алей. 135х160 см.
• 
  Анатоль Бараноўскі. "У навальніцу". 1986 г. Палатно, алей. 80х100 см. Нацыянальны цэнтр сучасных мастатваў Рэспублікі Беларусь.
• 
  Анатоль Бараноўскі. "Браслаўскі абсяг". 1991 г. Палатно, алей. 130х175 см.
• 
  Анатоль Бараноўскі. "Кветкі Браслаўшчыны". 1991-1992 гг. Палатно, алей. 100х140 см.
• 
  Анатоль Бараноўскі. "Жнівень". 1994 г. Палатно, алей. 70х80 см. Нацыянальны мастацкі музей Рэспублікі Беларусь.
• 
  Анатоль Бараноўскі. "Восеньскі настрой". 1995 г. Палатно, алей. 100х130 см.
• 
  Анатоль Бараноўскі. "Сувязь часоў". 2001 г. Палатно, алей. 140х150 см.
• 
  Анатоль Бараноўскі. "Адзінства". 2007 г. Палатно, алей. 110×100 см. Нацыянальны мастацкі музей Рэспублікі Беларусь.
• 
  Анатоль Бараноўскі. "Крэва". 2007 г. Палатно, алей. 110х131 см.