សហព័ន្ធកីឡាបាល់ទាត់អន្តរជាតិ (FIFA)

ហ្វីហ្វា ឬមានឈ្មោះពេញថា សមាគមសហព័ន្ធកីឡាបាល់ទាត់អន្តរជាតិ (អក្សរឡាតាំង៖ FIFA, ឈ្មោះពេញជាភាសាបារាំង៖ Fédération Internationale de Football Association និងជាភាសាអង់គ្លេស៖ International Federation of Association Football) គឺជាអង្គការមិនរកប្រាក់ចំណូលដែលតែងតែសម្តៅលើខ្លួនឯងថាជាស្ថាប័នគ្រប់គ្រងសមាគមកីឡាបាល់ទាត់ ហ្វុតសល និងកីឡាបាល់ទាត់ឆ្នេរខ្សាច់អន្តរជាតិ។ វាគឺជាស្ថាប័នគ្រប់គ្រងកីឡាបាល់ទាត់ខ្ពស់បំផុតលំដាប់ថ្នាក់អន្តរជាតិ។

សមាគមសហព័ន្ធកីឡាបាល់ទាត់អន្តរជាតិ

Fédération Internationale de Football Association (FIFA)
ផែនទីសមាជិកហ្វីហ្វាបើគិតតាមសហព័ន្ធទ្វីបនីមួយៗ
អក្សរ​កាត់	ហ្វីហ្វា – FIFA[១]
ស្ថាបនា	២១ ឧសភា ១៩០៤
ប្រភេទ	សហព័ន្ធកីឡា
ឋានៈ​តាម​ផ្លូវ​ច្បាប់	ស្ថាប័នគ្រប់គ្រងកីឡាបាល់ទាត់
គោល​បំណង	អង្គការកីឡា
ទី​ស្នាក់ការកណ្ដាល	ហ្ស៊ូរិច ប្រទេសស្វីស
កូអរដោនេ	47°22′53″N 8°34′28″E
តំបន់ ​ដែល​ត្រូវ​បម្រើ	ជុំវិញពិភពលោក
សមាជិកភាព	២១១ ប្រទេស
ភាសា​ផ្លូវ​ការ	ភាសាបារាំង ភាសាអង់គ្លេស ភាសាអេស្ប៉ាញ ភាសាអាល្លឺម៉ង់
ប្រធាន	ជី​យ៉ាន​នី អ៊ី​ន​ហ្វា​នទី​ណូ
អនុប្រធានជាន់ខ្ពស់	សាលម៉ាន ប៊ីន អ៊ីប្រាហ៊ីម អាល់ កាលីហ្វា (AFC)
អនុប្រធាន	អាឡេហានដ្រូ ដូមីនហ្កេស (CONMEBOL) អាឡិចសាន់ដឺ កេហ៊្វេរីន (UEFA) ប៉ាទ្រីស៍ មុតសេពេ (CAF) ឡាំប៊ឺត ម៉ាល់តុក (OFC) វិចទ័រ ម៉ុនតាគ្លីអានី (CONCACAF) សានឌ័រ ស្យានយី[២]
អង្គលេខាធិការ	ហ្វាត៍ម៉ា សាមូរ៉ា
អង្គការ​មេ	សន្និបាតហ្វីហ្វា
បុត្រសម្ព័ន្ធ	AFC CAF CONCACAF CONMEBOL OFC UEFA
សាខា	គណៈកម្មាធិការអូឡាំពិកអន្តរជាតិ ក្រុមប្រឹក្សាសមាគមកីឡាបាល់ទាត់អន្តរជាតិ
បុគ្គលិក	៧៥០
គេហទំព័រ	fifa.com

ហ្វីហ្វាត្រូវបានបង្កើតឡើងនៅក្នុងឆ្នាំ១៩០៤ ដើម្បីដើរតួជាអង្គការត្រួតពិនិត្យការប្រកួតប្រជែងអន្តរជាតិក្នុងចំណោមសមាគមប្រទេសជាតិដូចជា៖ បែលស៊ិក ដាណឺម៉ាក បារាំង អាល្លឺម៉ង់ ហុល្លង់ អេស្ប៉ាញ ស៊ុយអែត និងស្វីស។ ហ្វីហ្វាមានទីស្នាក់ការកណ្តាលនៅទីក្រុងហ្ស៊ូរិច ប្រទេសស្វីស ហើយបច្ចុប្បន្ននេះ វាមានសមាជិកភាពរហូតដល់ទៅ ២១១ ប្រទេស។ ដើម្បីក្លាយជាសមាជិកហ្វីហ្វា ប្រទេសទាំងនោះត្រូវមានសមាជិកភាពក្នុងសហព័ន្ធមួយនៅក្នុងចំណោមតំបន់ទាំង ៦ ដែលត្រូវបានបែងចែកលើពិភពលោកគឺ៖ អាហ្វ្រិក អាស៊ី អាមេរិកខាងជើង កណ្តាល និងការ៉ាអ៊ីប អឺរ៉ុប និងអូសេអានី។

បច្ចុប្បន្ន ហ្វីហ្វាបានបង្ហាញពីគោលបំណងមួយចំនួននៅក្នុងលក្ខន្តិកៈរបស់អង្គការរួមមាន ការបង្កើនប្រជាប្រិយភាពនៃកីឡាបាល់ទាត់នៅជុំវិញសកលលោក ខិតខំប្រឹងប្រែងធានាថាមនុស្សគ្រប់រូបអាចទទួលព័ត៌មានផ្សេងៗពោលគឺដឹងឮពីកីឡាបាល់ទាត់ ការតស៊ូមតិដើម្បីសុចរិតភាពនិងការលេងដោយយុត្តិធម៌ (ហ្វែរផ្លេ)។^[៣] ហ្វីហ្វាគឺជាអ្នកទទួលខុសត្រូវចំពោះការរៀបចំនិងការលើកកម្ពស់រាល់ការប្រកួតអន្តរជាតិធំៗជាពិសេសគឺការប្រកួតបាល់ទាត់ពិភពលោកដែលបានចាប់ផ្តើមដំបូងនៅឆ្នាំ១៩៣០ និងការប្រកួតបាល់ទាត់ពិភពលោកផ្នែកនារីដែលបានចាប់ផ្តើមនៅឆ្នាំ១៩៩១។ ក្រុមប្រឹក្សាសមាគមកីឡាបាល់ទាត់អន្តរជាតិដែលហ្វីហ្វាជាសមាជិកមួយគឺជាអ្នកកំណត់និងអនុវត្តច្បាប់នៅគ្រប់ការប្រកួតទាំងឡាយរបស់ហ្វីហ្វា។^[៤] គ្រប់រាល់ការប្រកួតរបស់ហ្វីហ្វា ប្រាក់ចំណូលភាគច្រើនគឺបានមកពីការឧបត្ថម្ភដូចនៅឆ្នាំ២០១៨ ហ្វីហ្វាបានចំណូលជាង ៤.៦ លានដុល្លារអាមេរិកដែលបានបញ្ចប់វដ្តឆ្នាំ២០១៥–២០១៨ ជាមួយនឹងកម្រៃវិជ្ជមានណែតប្រមាណ ១.២ ពាន់លានដុល្លារនិងមានថវិកាទំនុកបម្រុងជាង ២.៧ ពាន់លានដុល្លារ។^[៥]

របាយការណ៍ពីអ្នកសារព័ត៌មានស៊ើបអង្កេតបានភ្ជាប់ថ្នាក់ដឹកនាំហ្វីហ្វាជាមួយបទអំពើពុករលួយ ការសូកប៉ាន់ និងការលួចបន្លំសន្លឹកឆ្នោតទាក់ទងនឹងការបោះឆ្នោតជ្រើសរើសម្ចាស់ផ្ទះពានរង្វាន់បាល់ទាត់ពិភពលោកសម្រាប់ឆ្នាំ២០១៨ និងឆ្នាំ២០២២។ ការចោទប្រកាន់ទាំងនោះបាននាំឱ្យមានការធ្វើពិរុទ្ធកម្មលើមន្ត្រីជាន់ខ្ពស់របស់ហ្វីហ្វាចំនួន ៩ នាក់ដោយក្រសួងយុត្តិធម៌សហរដ្ឋអាមេរិកពីបទចោលប្រកាន់មួយចំនួនដូចជា អំពើទុច្ចរិត ការលួចបន្លំតាមរយៈគ្រឿងអេឡិចត្រូនិច និងការបន្លំបង្វែរប្រាក់ជាដើម។ នៅថ្ងៃទី២៧ ខែឧសភា ឆ្នាំ២០១៥ មន្ត្រីហ្វីហ្វាមួយចំនួនត្រូវបានចាប់ខ្លួនដោយអាជ្ញាធរស្វីស។ មន្ត្រីទាំងនោះដែលត្រូវបានចោទប្រកាន់ដោយសហរដ្ឋអាមេរិកអាចនឹងត្រូវធ្វើបត្យាប័នដើម្បីប្រឈមមុខនឹងការចោទប្រកាន់នៅទីនោះផងដែរ។^{[៦][៧][៨]} មន្ត្រីជាច្រើនរូបត្រូវបានបញ្ឈប់ពីការងារ (បណ្តោះអាសន្ន) ដោយហ្វីហ្វាមានដូចជាអតីតប្រធានលោកសែប ប្លាទ័រ^[៩]និងលោកមីឆែល ប្លាទីនីជាដើម។^[១០]

ប្រវត្តិ

អត្ថបទដើម: ប្រវត្តិសាស្ត្រហ្វីហ្វា

គំនិតក្នុងការបង្កើតស្ថាប័នមួយដើម្បីត្រួតពិនិត្យការប្រកួតកីឡាបាល់ទាត់ត្រូវបានផុសឡើងនៅដើមសតវត្សទី២០ ស្របពេលដែលប្រជាប្រិយភាពនៃកីឡាបាល់ទាត់កំពុងកើនឡើង។ ដូច្នេះ Fédération Internationale de Football Association (ឬ FIFA) ក៏ត្រូវបានបង្កើតនៅក្រោយទីស្នាក់ការសហភាពសហព័ន្ធកីឡាអត្តពលកម្មសង្គមបារាំង (Union des Sociétés Françaises de Sports Athlétiques – USFSA) នៅផ្លូវ Saint Honoré 229 នៃទីក្រុងប៉ារីសក្នុងថ្ងៃទី២១ ខែឧសភា ឆ្នាំ១៩០៤។^[១១] សមាជិកស្ថាបនិកមានដូចជា៖ បែលស៊ិក ដាណឺម៉ាក បារាំង ហុល្លង់ អេស្ប៉ាញ (តំណាងដោយក្លឹបបាល់ទាត់ទីក្រុងម៉ាឌ្រីដព្រោះថារាជសហព័ន្ធកីឡាបាល់ទាត់អេស្ប៉ាញមិនទាន់បង្កើតនៅឡើយ) ស៊ុយអែត និងស្វីស។ នៅថ្ងៃដដែរនោះ សមាគមកីឡាបាល់ទាត់អាល្លឺម៉ង់ (DFB) បានប្រកាសពីគម្រោងចូលរួមតាមរយៈទូរលេខ។^[១]

ក្រៅពីនៅទ្វីបអឺរ៉ុប មានប្រទេសនៅតាមទ្វីបផ្សេងៗជាច្រើនបានក្លាយជាសមាជិកថ្មីនៃហ្វីហ្វាមានដូចជា៖ អាហ្វ្រិកខាងត្បូងនៅក្នុងឆ្នាំ១៩០៩ អាហ្សង់ទីនក្នុងឆ្នាំ១៩១២ កាណាដាហើយឈីលីនៅឆ្នាំ១៩១៣ និងសហរដ្ឋអាមេរិកនៅក្នុងឆ្នាំ១៩១៤។^[១២]

នៅអំឡុងសង្គ្រាមលោកលើកទី១ កីឡាករអឺរ៉ុបជាច្រើនត្រូវបានប្រទេសរបស់ពួកគេកេណ្ឌយកទៅធ្វើសង្គ្រាមហើយការធ្វើដំណើរទៅប្រកួតតាមប្រតិទិនដែលបានកំណត់គឺត្រូវបានផ្អាកឬលុបចោលតែម្តង។ ពេលសង្គ្រាមបានបញ្ចប់ អង្គការមួយនេះត្រូវបានដឹកនាំដោយធនាគារិកាជនជាតិហុល្លង់ម្នាក់ឈ្មោះសាល ហឺត្សច៍ម៉ាន។ ដោយសារវិបត្តិនិងផលអវិជ្ជមាននៅក្រោយសង្គ្រាម អង្គការហ្វីហ្វាគឺស្ទើរតែក្ស័យធនទៅហើយប៉ុន្តែសម្ពាធវិបត្តិហិរញ្ញវត្ថុបានបាត់ទៅវិញបន្ទាប់ពី"ក្រុមប្រទេសម្ចាស់ផ្ទះ" (ប្រទេសសមាជិកនៃសហរាជាណាចក្រ) បានសម្រេចដកខ្លួនចេញដោយប្រកាសថាខ្លួននឹងមិនប្រកួតជាមួយអតីតសត្រូវសង្គ្រាមលោកទៀតឡើយ។ ទោះជាយ៉ាងណានៅក្នុងឆ្នាំ១៩២៤ ក្រុមប្រទេសទាំងនោះក៏បានសម្រេចចិត្តចូលជាសមាជិកហ្វីហ្វាវិញម្តងទៀត។

សារមន្ទីរប្រវត្តិសាស្ត្រដែលទាក់ទងនឹងហ្វីហ្វាដំបូងបង្អស់បានបើកដំណើរការឡើងនៅឆ្នាំ២០០១ នៅទីក្រុងមែនឈេសទ័រ ប្រទេសអង់គ្លេស។^[១៣] ការប្រកួតពានរង្វាន់បាល់ទាត់ពិភពលោកដំបូងត្រូវបានធ្វើឡើងនៅក្នុងឆ្នាំ១៩៣០ នៅទីក្រុងម៉ុងតេវីដេអូ ប្រទេសអ៊ូរុយគ្វេ។^[១៣]

រចនាសម្ព័ន្ធ

សហព័ន្ធចំនួនប្រាំមួយ និងប្រទេសសមាជិកចំនួន ២១១

ក្រៅពីស្ថាប័នអន្តរជាតិផ្សេងៗ ហ្វីហ្វាបានទទួលស្គាល់សហព័ន្ធចំនួន ៦ ដែលមានតួនាទីត្រួតពិនិត្យនិងរៀបចំការប្រកួតនៅតាមទ្វីបនិងតំបន់ផ្សេងៗទៀតនៅលើពិភពលោក។ ច្បាប់និងវិន័យនៃសហព័ន្ធទ្វីបត្រូវបានចែងនៅក្នុងលក្ខន្តិកៈរបស់ហ្វីហ្វា ហើយការចូលជាសមាជិកសហព័ន្ធគឺជាតម្រូវការមូលដ្ឋានមុននឹងចូលជាសមាជិកផ្លូវការរបស់ហ្វីហ្វា។

     សហព័ន្ធកីឡាបាល់ទាត់អាស៊ី (AFC, ៤៧ សមាជិក)^{[lower-alpha ១]}

     សហព័ន្ធកីឡាបាល់ទាត់អាហ្វ្រិក (CAF, ៥៦ សមាជិក)

     សហព័ន្ធកីឡាបាល់ទាត់អាមេរិកខាងជើង អាមេរិកកណ្តាល និងការ៉ាអ៊ីប (CONCACAF, ៤១ សមាជិក)^{[lower-alpha ២]}

     សហព័ន្ធកីឡាបាល់ទាត់អាមេរិកខាងត្បូង (CONMEBOL, ១០ សមាជិក)

     សហព័ន្ធកីឡាបាល់ទាត់អូសេអានី (OFC, ១៣ សមាជិក)^{[lower-alpha ១]}

     សមាគមសហភាពកីឡាបាល់ទាត់អឺរ៉ុប (UEFA, ៥៥ សមាជិក)^{[lower-alpha ៣]}

ហ្វីហ្វាបានទទួលស្គាល់ប្រទេសសមាជិកចំនួន ២១១ សរុបនិងក្រុមជម្រើសជាតិនារីរបស់ប្រទេសទាំងនោះចំនួន ១២៩ ក្រុម; សម្រាប់ព័ត៌មានបន្ថែម សូមមើលបញ្ជីរាយក្រុមជម្រើសជាតិបាល់ទាត់។ ចំនួនសមាជិករបស់ហ្វីហ្វាគឺមានអត្រាខ្ពស់ជាងចំនួនរដ្ឋសមាជិក អសប ដោយហ្វីហ្វាបានទទួលស្គាល់ថាខ្លួនមានសមាជិកចំនួន ២៣ មកពីរដ្ឋដែលគ្មានអធិបតេយ្យភាពដូចជាក្រុមម្ចាស់ផ្ទះទាំងបួននៃសហរាជាណាចក្រ ឬក៏ទឹកដីជម្លោះនយោបាយដូចជារដ្ឋប៉ាឡេស្ទីនជាដើម។^[១៤]

គណៈកម្មាធិការការងារនៃប្រជាជាតិតូចៗរបស់ហ្វីហ្វាបានចាត់ចំណាត់ថ្នាក់រដ្ឋដែលមានសក្តានុភាពចូលជាសមាជិកជាបីក្រុម៖

១. រដ្ឋឯករាជ្យដែលមិនទាន់ជាសមាជិកហ្វីហ្វា (មាន គីរីបាទី កោះម៉ាសាល់ មីក្រូនេស៊ី ម៉ូណាកូ ប៉ាឡូ ទូវ៉ាលូ និងទីក្រុងវ៉ាទីកង់)

២. រដ្ឋ/ទឹកដីគ្មានអធិបតេយ្យភាព (កោះអ័រឡែន ហ្គោដឺឡូប ក្រូអិនឡង់ ហ្គឺនស៊ី កោះមែន ជឺស៊ី ម៉ាទីនីក កោះម៉ារីណាខាងជើង រេអុយញ៉ុង ស៊ីងម៉ាទីន សង់ស៊ីបារ)

៣. តំបន់ជម្លោះនយោបាយ (អាប់កាស៊ី គ្រីមៀ ស៊ីបខាងជើង និងអូសេទីខាងជើង)។^{[១៥][១៦]}

ចំណាត់ថ្នាក់ហ្វីហ្វាពិភពលោកគឺត្រូវបានធ្វើបច្ចុប្បន្នភាពជារៀងរាល់ខែដោយផ្អែកលើលទ្ធផលរបស់ក្រុមជម្រើសជាតិនីមួយៗនៅក្នុងកម្មវិធីប្រកួតអន្តរជាតិនានា ការប្រកួតវគ្គជម្រុះ និងការប្រកួតមិត្តភាពជាដើម។ ចំណាត់ថ្នាក់ពិភពលោកសម្រាប់កីឡាបាល់ទាត់នារីក៏មានវត្តមានផងដែរដោយត្រូវធ្វើបច្ចុប្បន្នភាពចំនួន ៤ ដងក្នុងមួយឆ្នាំ។

ច្បាប់ និងស្ថាប័ន

កម្មវិធីប្រកួតរបស់ហ្វីហ្វា

ជម្រើសជាតិ

ផ្នែកបុរស

• ពានរង្វាន់បាល់ទាត់ពិភពលោក
• ការប្រកួតកីឡាបាល់ទាត់អូឡាំពិក (អាយុក្រោម ២៣ ឆ្នាំ)
• ពានរង្វាន់បាល់ទាត់ពិភពលោកអាយុក្រោម ២០ ឆ្នាំ
• ពានរង្វាន់បាល់ទាត់ពិភពលោកអាយុក្រោម ១៧ ឆ្នាំ
• ការប្រកួតកីឡាបាល់ទាត់យុវជនអូឡាំពិក (អាយុក្រោម ១៥ ឆ្នាំ)
• ពានរង្វាន់បាល់ទាត់ក្នុងសាលពិភពលោក
• ពានរង្វាន់បាល់ទាត់ឆ្នេរខ្សាច់ពិភពលោក
• ពានរង្វាន់បាល់ទាត់អារ៉ាប់

ផ្នែកនារី

• ពានរង្វាន់បាល់ទាត់នារីពិភពលោក
• ការប្រកួតកីឡាបាល់ទាត់អូឡាំពិក
• ពានរង្វាន់បាល់ទាត់នារីពិភពលោកអាយុក្រោម ២០ ឆ្នាំ
• ពានរង្វាន់បាល់ទាត់នារីពិភពលោកអាយុក្រោម ១៧ ឆ្នាំ
• ការប្រកួតកីឡាបាល់ទាត់យុវនារីអូឡាំពិក (អាយុក្រោម ១៥ ឆ្នាំ)

ក្លិប

ផ្នែកបុរស

• ពានរង្វាន់ក្លិបបាល់ទាត់ពិភពលោក
• ពានរង្វាន់បាល់ទាត់យុវវ័យ

ផ្នែកនារី

• ពានរង្វាន់ក្លិបបាល់ទាត់នារីពិភពលោក (សំណើ)

កីឡាអេឡិចត្រូនិក

• ពានរង្វាន់បាល់ទាត់អេឡិចត្រូនិកពិភពលោក

ក្រុម

• ពានរង្វាន់ក្លិបបាល់ទាត់អេឡិចត្រូនិកពិភពលោក
• ពានរង្វាន់អេឡិចត្រូនិកប្រជាជាតិ

អតីតកម្មវិធីប្រកួត

• ពានរង្វាន់បាល់ទាត់សហព័ន្ធ

ផែនទីម្ចាស់ផ្ទះកម្មវិធីប្រកួតពានរង្វាន់បាល់ទាត់ពិភពលោករាប់បញ្ចូលទាំងការប្រកួតរបស់បុរសនិងនារី, គិតត្រឹមឆ្នាំ២០១៤

ជើងឯកនៃកម្មវិធីប្រកួតរបស់ហ្វីហ្វានាពេលបច្ចុប្បន្ន

កម្មវិធីប្រកួត		ឆ្នាំ	ម្ចាស់ផ្ទះ	ជើងឯក	ពាន	ក្រុមផ្តាច់ព្រ័ត្រ		ព្រឹត្តិការណ៍បន្ទាប់	ម្ចាស់ផ្ទះ
ជម្រើសជាតិ (បុរស)
ពានរង្វាន់បាល់ទាត់ពិភពលោក		២០១៨	រុស្ស៊ី	បារាំង	លើកទី២	ក្រូអាស៊ី		២០២២	កាតា
ការប្រកួតកីឡាបាល់ទាត់អូឡាំពិក		២០២១	ជប៉ុន	ប្រេស៊ីល	លើកទី២	អេស្ប៉ាញ		២០២៤	បារាំង
ការប្រកួតកីឡាបាល់ទាត់សាកលវិទ្យាល័យ		២០១៩	អ៊ីតាលី	ជប៉ុន	លើកទី៧	ប្រេស៊ីល		២០២២	ចិន
ពានរង្វាន់បាល់ទាត់ពិភពលោកអាយុក្រោម ២០ ឆ្នាំ		២០១៩	ប៉ូឡូញ	អ៊ុយក្រែន	លើកទី១	កូរ៉េខាងត្បូង		២០២៣	ឥណ្ឌូនេស៊ី
ពានរង្វាន់បាល់ទាត់ពិភពលោកអាយុក្រោម ១៧ ឆ្នាំ		២០១៩	ប្រេស៊ីល	ប្រេស៊ីល	លើកទី៤	ម៉ិកស៊ិក		២០២៣	ប៉េរូ
ពានរង្វាន់បាល់ទាត់ក្នុងសាលពិភពលោក		២០១៦	កូឡុំប៊ី	អាហ្សង់ទីន	លើកទី១	រុស្ស៊ី		២០២១	លីទុយអានី
ការប្រកួតកីឡាបាល់ទាត់ក្នុងសាលយុវជនអូឡាំពិក		២០១៨	អាហ្សង់ទីន	ប្រេស៊ីល	លើកទី១	រុស្ស៊ី		២០២៦	សេនេកាល់
ពានរង្វាន់បាល់ទាត់ឆ្នេរខ្សាច់ពិភពលោក		២០១៩	ប៉ារ៉ាគ្វេ	ព័រទុយកាល់	លើកទី២	អ៊ីតាលី		២០២១	រុស្ស៊ី
ពានរង្វាន់កីឡាអេឡិចត្រូនិកប្រជាជាតិ		២០១៩		បារាំង	លើកទី១	អាហ្សង់ទីន		២០២១
ជម្រើសជាតិ (នារី)
ពានរង្វាន់បាល់ទាត់នារីពិភពលោក		២០១៩	បារាំង	សហរដ្ឋអាមេរិក	លើកទី៤	ហុល្លង់		២០២៣	អូស្ត្រាលី នូវែលសេឡង់
ការប្រកួតកីឡាបាល់ទាត់នារីអូឡាំពិក		២០២១	ជប៉ុន	កាណាដា	លើកទី១	ស៊ុយអែត		២០២៤	បារាំង
ការប្រកួតកីឡាបាល់ទាត់នារីសាកលវិទ្យាល័យ		២០១៩	អ៊ីតាលី	កូរ៉េខាងជើង	លើកទី៣	ជប៉ុន		២០២២	ចិន
ពានរង្វាន់បាល់ទាត់នារីពិភពលោកអាយុក្រោម ២០ ឆ្នាំ		២០១៨	បារាំង	ជប៉ុន	លើកទី១	ទំព័រគំរូ:Fbwu		២០២២	កូស្តារីកា
ពានរង្វាន់បាល់ទាត់នារីពិភពលោកអាយុក្រោម ១៧ ឆ្នាំ		២០១៨	អ៊ូរុយគ្វេ	អេស្ប៉ាញ	លើកទី១	ម៉ិកស៊ិក		២០២២	ឥណ្ឌា
ការប្រកួតកីឡាបាល់ទាត់ក្នុងសាលនៅក្នុងកីឡាយុវជនអូឡាំពិក		២០១៨	អាហ្សង់ទីន	ព័រទុយកាល់	លើកទី១	ជប៉ុន		២០២៦	សេនេកាល់
ក្រុមក្លិប (បុរស)
ពានរង្វាន់ក្លិបបាល់ទាត់ពិភពលោក		២០២០	កាតា	បៃយឺន មុយនិច	លើកទី២	ទីក្រេស		២០២១	ជប៉ុន
ការប្រកួតបាល់ទាត់យុវជន		២០១៩	ស្វីស	បុកាជូញ័រស៍	លើកទី៣	បិនហ្វីកា		២០២១
ពានរង្វាន់ក្លិបបាល់ទាត់អេឡិចត្រូនិកពិភពលោក		២០២០		Complexity Gaming	លើកទី១	Ellevens		២០២១
ក្រុមក្លិប (នារី)
ពានរង្វាន់ក្លិបបាល់ទាត់នារីពិភពលោក (សំណើ)[១៧]		TBD	TBD					TBD	TBD
ពានរង្វាន់តារាខៀវ/យុវនារី		២០១៩	ស្វីស	វូហ្វស៍ប៊ឺក	លើកទី១	យ៉ាង់ប៊យ		២០២១
បុគ្គលភាព
កម្មវិធីប្រកួត	កីឡាករ
ពានរង្វាន់បាល់ទាត់អេឡិចត្រូនិកពិភពលោក		២០១៩		Mohammed Harkous	លើកទី១	Mosaad Aldossary		២០២១

ចំណាត់ថ្នាក់ពិភពលោករបស់ហ្វីហ្វា

បុរស

ព័ត៌មាន​បន្ថែម: ចំណាត់ថ្នាក់ពិភពលោកហ្វីហ្វា

តារាងខាងក្រោមនេះគឺជាក្រុមជម្រើសជាតិបុរសទាំង ២០ ល្អបំផុតនៅលើពិភពលោក។^[១៨]

ចំណាត់ថ្នាក់	បម្លាស់ប្តូរ	ក្រុម	ពិន្ទុសរុប
១		ប្រេស៊ីល	១៨៤០
២	១	អាហ្សង់ទីន	១៨៣៨
៣	១	បារាំង	១៨២៣
៤	២	បែលហ្ស៊ិក	១៧៨១
៥		អង់គ្លេស	១៧៧៤
៦	២	ហុល្លង់	១៧៤០
៧	៥	ក្រូអាស៊ី	១៧២៧
៨	២	អ៊ីតាលី	១៧២៣
៩		ព័រទុយហ្កាល់	១៧០២
១០	៣	អេស្ប៉ាញ	១៦៩២
១១	១១	ម៉ារ៉ុក	១៦៧២
១២	៣	ស្វីស	១៦៥៥
១៣	៣	សហរដ្ឋអាមេរិក	១៦៥២
១៤	៣	អាល្លឺម៉ង់	១៦៤៦
១៥	២	ម៉ិកស៊ិក	១៦៣៥
១៦	២	អ៊ូរុយគ្វេ	១៦២៧
១៧		កូឡុំប៊ី	១៦១២
១៨	៨	ដាណឺម៉ាក	១៦០៨
១៩	១	សេនេកាល់	១៦០៣
២០	៤	ជប៉ុន	១៥៩៣

គិតត្រឹមថ្ងៃទី៦ ខែតុលា ឆ្នាំ២០២២

នារី

ព័ត៌មាន​បន្ថែម: ចំណាត់ថ្នាក់ពិភពលោកហ្វីហ្វា (នារី)

តារាងខាងក្រោមនេះគឺជាក្រុមជម្រើសជាតិនារីទាំង ២០ ល្អបំផុតនៅលើពិភពលោក។^[១៩]

ចំណាត់ថ្នាក់	បម្លាស់ប្តូរ	ក្រុម	ពិន្ទុសរុប
១		សហរដ្ឋអាមេរិក	២០៧៨
២	១	អាល្លឺម៉ង់	២០៧៣
៣	១	ស៊ុយអែត	២០៥៧
៤		អង់គ្លេស	២០៥២
៥		បារាំង	២០២៥
៦	១	កាណាដា	២០០៣
៧	១	អេស្ប៉ាញ	២០០០
៨		ហុល្លង់	១៩៩៦
៩		ប្រេស៊ីល	១៩៨៣
១០		កូរ៉េខាងជើង	១៩៤០
១១		ជប៉ុន	១៩១២
១២	១	អូស្ត្រាលី	១៩១១
១៣	១	ន័រវែស	១៩១១
១៤	១	ចិន	១៨៦២
១៥	២	កូរ៉េខាងត្បូង	១៨៥៣
១៦		អ៊ីស្លង់	១៨៥០
១៧	៣	អ៊ីតាលី	១៨៤៦
១៨		ដាណឺម៉ាក	១៨៤៥
១៧		អូទ្រីស	១៨០៣
២០		បែលហ្ស៊ិក	១៧៩២

គិតត្រឹមថ្ងៃទី១៣ ខែតុលា ឆ្នាំ២០២២

អ្នកឧបត្ថម

• អាឌីដាស^[២០]
• ក្រុមហ៊ុនកូកា-កូឡា^[២១]
• ហ៊ីយ៉ាន់ដាយ^[២២]
• វីសា^[២៣]
• វ៉ាន់ដាគ្រុប^[២៤]
• កាតាអ៊ែរវ៉េ^[២៥]

មើលផងដែរ

• វប្បធម៌កីឡាបាល់ទាត់
• ហ្វីហ្វា (វីដេអូហ្គេម)
• បញ្ជីរាយកីឡដ្ឋានបាល់ទាត់តាមប្រទេស

កំណត់សម្គាល់

1. អូស្ត្រាលីត្រូវបានទទួលស្គាល់ជាសមាជិក AFC តាំងពីឆ្នាំ២០០៦ មកម្លេះ។
2. គុយយ៉ានបារាំង គុយយ៉ាន និងស៊ូរីណាមគឺជាសមាជិក CONCACAF ទោះបីជារដ្ឋទាំងបីនេះមានទីតាំងភូមិសាស្ត្រនៅអាមេរិកខាងត្បូងក៏ដោយ។ ក្រុមបារាំងគុយយ៉ានគឺជាសមាជិក CONCACAF ប៉ុន្តែមិនមែនជាសមាជិកហ្វីហ្វានោះទេ។
3. ក្រុមតំណាងប្រទេសដូចជា៖ អាមេនី អាស៊ែបៃសង់ ស៊ីប ចចជី អ៊ីស្រាអែល កាសាក់ស្ថាន រុស្ស៊ី និងតួកគី គឺជាសមាជិក UEFA ទោះជាប្រទេសទាំងអស់នេះមានទឹកដីមួយភាគធំឬទាំងស្រុងស្ថិតនៅក្រៅទ្វីបអឺរ៉ុបក្តី។ ម៉ូណាកូមិនមែនជាសមាជិក UEFA ឬហ្វីហ្វានោះឡើយ។