Mbuga za Taifa la Tanzania

Mbuga za Taifa za Tanzania^[1] ni nyingi tena mbalimbali, zikishika karibu theluthi moja ya eneo lote la nchi hiyo ya Afrika Mashariki.

Mahali pa mbuga za taifa nchini Tanzania.

Zinagawanyika kati ya:

• Hifadhi za Taifa,
• Hifadhi Teule,
• Hifadhi ya Mawindo na
• Mapori ya Akiba.

Hifadhi za taifa

Hii ni orodha ya Hifadhi za Taifa, ambazo ni 19:

Hifadhi za Taifa	Kiingereza	Mkoa
Hifadhi ya Arusha	Arusha NP	Arusha
Hifadhi ya Burigi-Chato	Burigi-Chato NP	Kagera, Geita
Hifadhi ya Gombe	Gombe Stream NP	Kigoma
Hifadhi ya Ibanda-Kyerwa	Ibanda-Kyerwa NP	Kagera
Hifadhi ya Katavi	Katavi NP	Simiyu
Hifadhi ya kisiwa cha Rubondo	Rubondo Island NP	Mwanza
Hifadhi ya kisiwa cha Saanane	Saanane Island NP	Mwanza
Hifadhi ya Kitulo	Kitulo Plateau NP	Njombe
Hifadhi ya Mikumi	Mikumi NP	Morogoro
Hifadhi ya Mlima Kilimanjaro	Mount Kilimanjaro NP	Kilimanjaro
Hifadhi ya Milima ya Mahale	Mahale Mountains NP	Kigoma
Hifadhi ya Milima ya Udzungwa	Udzungwa Mountains NP	Iringa, Morogoro
Hifadhi ya Mkomazi	Mkomazi NP	Kilimanjaro, Tanga
Hifadhi ya Ruaha	Ruaha NP	Iringa
Hifadhi ya Rumanyika-Karagwe	Rumanyika-Karagwe NP	Kagera
Hifadhi ya Saadani	Saadani NP	Pwani
Hifadhi ya Serengeti	Serengeti NP	Mara
Hifadhi ya Tarangire	Tarangire NP	Manyara
Hifadhi ya Ziwa Manyara	Lake Manyara NP	Manyara

Hakuna budi kuweka ulinzi mbugani kwani kuna majangili wanaoua ovyo wanyama kama vile tembo na kifaru: wanyama hao wanaweza kusaidia katika kuinua pato la taifa kupitia utalii.

Hifadhi za bahari na maeneo tengefu

Ni mpango wa kimataifa kuwa asilimia 10 ya maji ya bahari na maziwa yawe chini ya hifadhi, na Tanzania ina asilimia 4.5 tu ya hifadhi ambayo inahusisha hifadhi za bahari 3 na maeneo tengefu 15.

Hifadhi za bahari

Hifadhi ya kisiwa cha Mbudya, Dar es Salaam.

Hifadhi ya Bahari ni eneo kubwa ambalo hata watu wanaishi ndani yake. Shughuli za eneo hilo husimamiwa na Mpango wa Usimamiaji ujulikanao kama General Management Plan, ambao maandalizi yake yanashirikisha wadau woteː wanaoishi ndani ya hifadhi, Halmashauri husika ambazo ziko ndani ya hifadhi, na wengineo wakiwa ni pamoja na wanasayansi. Yanafanyika makubaliano ya kuwa baadhi ya maeneo yatengwe kabisa ambapo hakuna uvuvi wowote utakaoruhusiwa, kutenga maeneo ya matumizi ya jumla ambapo uvuvi unaruhusiwa kwa wavuvi wa ndani na nje ya hifadhi na maeneo ya matumizi maalum ambayo pamoja na kwamba wavuvi wa ndani ya hifadhi wanaruhusiwa kuvua kwa kutumia zana maalumu zinazokubalika, wavuvi wa nje hawaruhusiwi kabisa kuvua katika maeneo hayo.

Maeneo tengefu

Kisiwa cha Bongoyo

Maeneo tengefu ni maeneo madogomadogo ya visiwa ambayo yanazungukwa na matumbawe. Katika maeneo hayo watu hawaruhusiwi kuishi wala matumizi ya rasilimali hayaruhusiwi. Shughuli zinazoruhusiwa katika maeneo hayo ni zile zinazohusiana na utalii tu. Maeneo hayo ni pamoja na visiwa vya Bongoyo na Mbudya mjini Dar es Salaam ambapo ndani yake kitengo kimetengeneza njia vinjari (nature trails) kwa ajili ya watalii kupita.

Tazama pia

• Wizara ya Maliasili na Utalii