Конрад Гудзігердавіч

Конрад Гудзігердавіч (? — па 1476) — літоўскі баярын.

Конрад Гудзігердавіч
лац. Konrad Gudzigierdavič / Hudzihierdavič

Герб «Задора»
Асабістыя зьвесткі
Памёр	не раней за 1437[1]
Род	Валімонтавічы гербу Задора[d]
Бацькі	Гудзігерд Валімонтавіч
Дзеці	Сямён, Станіслаў (Станька)

Відаць, вотчынныя ўладаньні знаходзіліся ў Дзяволтве^[2].

Імя

Асноўныя артыкулы: Конрад і Гудзігерд

Конрад або Кунрад (Konrad, Cunrad^[3]) — імя германскага паходжаньня^[4]. Іменная аснова -кон- (-кун-) (імёны ліцьвінаў Кондрут, Кунат, Якун; германскія імёны Cundrud, Kunat, Acun) паходзіць ад гоцкага koni- 'адважны'^[5] або германскага kunja, kuni '(хтосьці) з годнага, шляхецкага роду'^[6], а аснова -рад- (-рат-) (імёны ліцьвінаў Радзівіл, Раталт, Радавін; германскія імёны Ratwilius, Ratolt, Radowin) — ад гоцкага *rêþs^[7], германскага rad- 'рада'^[8].

Этымалягічны слоўнік старапольскіх асабовых імёнаў, выдадзены Польскай акадэміяй навук, адзначае гістарычнае бытаваньне ў Польшчы германскага імя Konrad (Konrat, Kunrod, Kunrot)^[9].

Формы імя ў гістарычных крыніцах: Conradus Gudigirdowycz (9 красавіка 1437 году)^[10]; пану Кундрату Кгуркгирдовичу (Кудрат Кгуркгирдович^[2]; 17 студзеня 1520 году)^[11].

Біяграфія

Зь літоўскага баярскага роду, сын Гудзігерда Валімонтавіча. Меў брата Завішу Гудзігердавіча.

Упершыню ўпамінаецца ў данацыі 1437 году родзіча Станіслава Даўгайлы Віленскай катэдры. Ня браў актыўнага ўдзелу ў палітычным жыцьці, існуюць зьвесткі пра адзін яго судовы вырак (разам з Судзівоем Валімонтавічам і Радзівілам Осьцікавічам). У 1476 годзе Міхал і Ян Кезгайлавічы адзначылі, што набылі ў стрыечнага брата Конрада пэўныя землі^[2].

Меў сыноў Сямёна і Станіслава (Станьку).