Контаўт

Контаўт (у каталіцтве Міхал; памёр па 1453) — дзяржаўны дзяяч Вялікага Княства Літоўскага, староста жамойцкі (1436—1440, 1441 і 1452—1453). Пачынальнік роду Контаўтаў.

Контаўт
лац. Kontaŭt

Асабістыя зьвесткі
Памёр	па 1453
Род	Контаўты
Дзеці	Ян

Вотчынныя ўладаньні знаходзіліся ў Крожах, Паюрах, Паланзе^[1].

Імя

Асноўны артыкул: Контаўт (імя)

Гонталд або Конталд (Gontald, Contaldus^[2]) — імя германскага паходжаньня^[3]. Іменная аснова -гунд- (-гунт-, -кунт-) (імёны ліцьвінаў Гунтар, Вігунт, Вірконт; германскія імёны Guntar, Wigunt, Werecundus) паходзіць ад гоцкага gunþs 'бойка, бітва', а аснова -валд- (-алд, -олт) (імёны ліцьвінаў Геральт, Левалт, Рамвольт; германскія імёны Gerwald, Lewolt, Romuald) — ад гоцкага і германскага waldan 'валодаць, гаспадарыць' або wulþus 'слава, мажнасьць'^[4].

Адпаведнасьць імя Гонтаўт германскаму імю Gontald сьцьвердзіў францускі лінгвіст-германіст Раймонд Шмітляйн, які на падставе шматгадовых дасьледаваньняў прыйшоў да высноваў пра германскае паходжаньне літоўскіх уласных імёнаў^[5].

Варыянты імя ў гістарычных крыніцах: слузе пана Контолтову, пану Контовту (Контолт, Контовт^[1]; 1440—1453 гады)^[6]; Kunttolt (1 кастрычніка 1441 году)^[7]; Cantawt (22 красавіка 1444 году)^[8]; Kantolt (8 жніўня 1452 году)^[9]; Canttaute^[1].

Біяграфія

Зь літоўскага баярскага роду. Меў брата Бірала (магчыма, ідэнтычнага ковенскаму войту з тым жа імём). Каталіцкае імя Міхал паходзіць з вартай даверу генэалёгіі XVI стагодзьдзя^[1].

Упершыню ўпамінаецца ў наданьні Жыгімонта Кейстутавіча яго брату Біралу. У 1436—1440 і 1441 гадох быў старостам жамойцкім, у 1452—1453 гадох — разам з галоўным старостам Янам Кезгайлам.

Меў сына Яна^[1].