Skeletá

Skeletá (магчыма ад стар.-грэц. σκελετός — «высахлы», «завялы»; «шкілет»^[4]) — шосты студыйны альбом швэдзкага рок- / мэтал-гурта Ghost, рэліз якога адбыўся 25 красавіка 2025 году^[1][5][6]. Тур у падтрымку альбома — Skeletour — пачаўся 15 красавіка 2025 году, у Манчэстэры^[5][7].

Skeletá
Альбом Ghost
Выдадзены	25 красавіка 2025
Месца запісу	Capitol Studios (Галівуд) Atlantis Metronome (Стакгольм) Apmamman Studios (Стакгольм)
Жанр	рок[1] гард-рок поп-рок арэна-рок поп-мэтал
Працягласьць	46:43
Колькасьць кампазыцыяў	10[2]
Мова	ангельская лацінская
Выдавец	Loma Vista Recordings Spinefarm Records
Фармат	спампаваньне стрымінг CD вініл касэта
Прадусар	Джын Ўокер[3]
Распаўсюднік	Concord[3]
Храналёгія Ghost
Rite Here Rite Now (2024)	Skeletá (2025)	…
Сынглы да Skeletá
«Satanized» Выдадзены: 5 сакавіка 2025 году «Lachryma» Выдадзены: 11 красавіка 2025 году «Peacefield» Выдадзены: 22 красавіка 2025 году

Лід-самотнікам для Skeletá выступіў «Satanized», выдадзены 5 сакавіка 2025 году^[1]. Рэліз другога самотніка для альбома — «Lachryma» — адбыўся 11 красавіка, трэцяга самотніка — «Peacefield» — 22 красавіка. Песьні на альбоме выконвае «новы» франтмэн гурта — Папа V Пэрпэтуа.

Апісаньне

Мова выкананьня альбома — ангельская^[8], некаторыя часткі (ў прыватнасьці ў «Satanized») выконваюцца на лацінскай мове.

Перадгісторыя

Асноўны артыкул: Ghost (гурт) § 2025

У сьнежні 2023 году вакаліст Табіяс Форге распавёў брытанскаму часопісу Metal Hammer, што працуе над новым студыйным альбомам і ўжо скончыў некалькі песьняў. Ён параўнаў сваю ролю з роляй шэф-кухара, які валодае рознымі рэстаранамі. Паводле Форге, кожны новы альбом — новы рэстаран, але яму ня трэба пачынаць з чыстага ліста паперы. Калі «сакрэтны соўс» будзе ўзяты зь яго нататніка, то альбом будзе гучаць як Ghost^[9]. У адрозьненьне ад папярэдніх альбомаў, у гэтым няма інструмэнтальных кампазыцыяў. Форге патлумачыў, што такія інструмэнталы, як «Miasma», ужо існуюць, і яму нецікава пісаць інструмэнталы толькі для таго, каб яны былі на альбоме^[10].

Замест гэтага ён хацеў уключыць у песьні больш інструмэнтальных пасажаў^[11]. На Skeletá Табіас Форге зноў працаваў зь іншымі аўтарамі песьняў. Макс Гран стаў сааўтарам шасьці песьняў, Вінцэнт Пантарэ й Салім аль-Факір напісалі па дзьве песьні, адна зь якіх стала першым самотнікам («Satanised»)^[11], і толькі песьні «Missilia Amori» і «Marks of the Evil One» былі напісаны Табіясам Форге самастойна. У музычным пляне песьні альбома больш імкнуцца да арэна-року.

2 сакавіка 2025 году на афіцыйным YouTube-канале Ghost зьявіўся прамы этэр, які дэманстраваў білборд у Лас-Вэгасе, надпіс на ім «V is coming…»^[12] і лягатып гурта^[13][14][15], а 4 сакавіка гурт абвясьціў пра рэліз новага відэа — «Satanized».

У той жа дзень стала вядомая назва тура — «Skeletour»^[16], што адсылала да Skeletá^[1], а ў неафіцыйных сацсетках, прысьвечаных Ghost, зьявілася вокладка новага самотніка / альбома гурта^[1][17].

Запіс

Skeletá быў запісаны на студыі Capitol ў Галівудзе й на студыях Atlantis Metronome і Apmamman ў Стакгольме. Прадусарам альбома выступіў Табіас Форге пад псэўданімам Джын Ўокер. Усе электрагітары былі запісаныя Фрэдрыкам Окесанам з Opeth, а Салім аль-Факір запісаў клявішныя. Макс Гран сыграў на акустычных гітарах і барабанах. У першай песьні «Peacefield» гучыць дзіцячы хор^[11]. Міксаваньнем альбома займаліся Эндзі Ўольлес і Дэн Малш, а майстарынг выканаў Тэн Джэнсэн.

Для запісу гітар выкарыстоўваўся ўзмацняльнік Rockman, які быў распрацаваны бостанцам Томам Шольцам. Паводле Форге, атрыманы гук быў «даволі тонкім», але «гучаў зусім як у васьмідзесятыя». Акрамя таго, усе гітарныя кампазыцыі былі запісаныя з поўным скажэньнем праз калёнкі Marshall. Форге быў зусім незадаволены першым міксам альбома. Альбом быў цалкам перамікшаваны, і гітары, запісаныя праз калёнкі Marshall, былі вылучаныя на першы плян^[18].

Самотнікі

14 лютага ў Spotify зьявіўся плэйліст «V is Coming», першыя літары песьняў якога складалі слова «Satanized»^[19][a], адсылаючы да будучага аднайменнага самотніка. Гурт анансаваў альбом разам з выпускам лід-самотніка «Satanized» 5 сакавіка 2025 году^[20]. Суправаджальныя візуальныя эфэкты былі распрацаваны гуртам сумесна з Джэйсанам Задой і дазваляюць прыхільнікам інтэгравацца ў відэа^[21].

8 красавіка стала вядома, што 11 красавіка адбудзецца рэліз другога самотніка для альбома  — «Lachryma»^[22][23]. Афіцыйна рэліз быў абвешчаны 9 красавіка, сумесна з анонсам кліпа да самотніка^[24][25]. Ghost выпусьцілі трэйлер да песьні, які вельмі падобны на трэйлер фільма жахаў 70-х — 80-х гадоў^[26]. У канцы гучыць некалькі сэкунд сынтэзатарнай музыкі (частка песьні). У апісаньні трэйлера гурт напісаў:

Мы хочам паведаміць вам, што вы заслалі свой ложак і цяпер будзеце плакаць у ім.

---

Арыгінальны тэкст  (анг.)

We wish to inform you that you’ve made your bed, and now shall cry in it.

— Ghost, Metal Sucks^[26].

22 красавіка 2025 году быў выдадзены трэці самотнік да альбома — «Peacefield»^[27][28]. Самотнік утрымлівае две кампазыцыі: «Peacefield» і «Peacefield — Single Version»^[27].

20 сакавіка быў апублікаваны новы плэйліст, названы «Test», першыя літары песьняў складалі фразу «Satanized», «The Darker The Better» («Чым цямней, тым лепш»)^[29][b], адсылаючы да тэксту песьні «Umbra».

Рэліз і Папа V

Папа V Пэрпэтуа. Выява выкарыстоўваецца ў якасьці аватару для сацсетак гурта, а таксама як вокладка плэйліста «V IS HERE» у Spotify^[30] (раней плэйліст быў вядомы пад назвай «V is Coming»).

Разам з анонсам альбома гурт прадставіў новага франтмэна гурта па імі Папа V Пэрпэтуа^[31]. Ягоны вакальны дэбют на лід-самотніку «Satanized» быў прысьвечаны «дэманічным апантанасьцям» і падпарадкаваньню «цёмным сілам»^[32]. Папа V дэбютаваў ужывую 15 красавіка 2025 году, на першым канцэрце Ghost у іхным туры Skeletour; ён таксама будзе выступаць на канцэрце Black Sabbath 5 ліпеня 2025 году ў Villa Park у Бірмінггэме (Ангельшчына)^[33].

Даступныя выданьні

Даступныя выданьні Skeletá на афіцыйным сайце лэйбла Loma Vista Recordings^[34], калі не пазначана іншае:

• вініл (LP):
  • лімітаваны вініл «Clear Smoke» (1000 копіяў у сьвеце; Limited Edition «Clear Smoke» Colored Vinyl);
  • стандартны чорны вініл (Standard Black LP);
  • эксклюзіўны LV лілова-чорны вініл («Purple / Black Splatter» Colored Vinyl [Ghost LV Exclusive]);
  • лімітаваны вініл «ліловы дым» (Limited Edition «Purple Smoke» Colored Vinyl);
  • эксклюзіўны ліловы вініл Target (Skeletá Target Exclusive; Target)^[35];
  • лімітаваны непразрысты срэбны вініл Ghost (1000 копіяў у сьвеце; Skeletá LP [Limited Edition — Only 1,000 Made, Opaque Silver Vinyl]; Revolver)^[36];
• кампакт-дыск:
  • стандарты (Skeletá CD);
  • эксклюзіўны кампакт-дыск Target (Skeletá Target Exclusive; Target)^[35];
• лічбавае спампаваньне (Skeletá Digital Album; MP3, WAV, ALAC, ці FLAC);
• кампакт-касэты:
  • эксклюзіўная (LV + Ghost) кампакт-касэта (Limited Edition Cassette [LV + Ghost Exclusive]);
  • кампакт-касэта колеру косьці (Cassette [Bone]); Revolver)^[36];
• стрымінг^[37][38].

Гісторыя рэлізу Skeletá

Рэґіён	Дата	Фарматы	Лэйбл	Кр.
Розныя	25 красавіка 2025	кампакт-касэта кампакт-дыск спампаваньне музыкі стрымінг вініл	Loma Vista Recordings Spinefarm Records	[38][37][34]

Стыль альбома

У музычным пляне альбом можа быць апісаны такімі жанрамі як рок і мэтал, у прыватнасьці іхнымі паджанрамі, а менавіта арэна-рокам^[39][40], гард-рокам^[41][42][39], поп-рокам^[43] і поп-мэталам^[42][44].

Тэмы альбома

Skeletá ідзе за студыйным альбомам гурта 2022 году Impera і апісваецца як «самая непахісна інтраспэктыўная праца на сёньняшні дзень», падобная на дыялёг з адлюстраваньнем у люстэрку^[45]. Табіяс Форге меў намер «напісаць гімн, песьню пра нянавісьць, песьню пра надзею, песьню пра шкадаваньне. [Пра] ўсе асноўныя чалавечыя адчуваньні»^[46]. Паведамлялася, што альбом дэманструе мноства «асобных эмацыйных варыяцыяў»^[32].

Першая песьня «Peacefield», «узыходзячая й гімнічная», сымбалізуе надзею, «Lachryma» — больш цёмная «горка-салодкая» песьня пра самападман, «Satanized» — «дэманічна-юрлівая» песьня пра каханьне. «Missilia Amori», паводле Форге, апісвае пачуцьцё, калі каханьне ператвараецца ў нянавісьць і хаваецца за маскай каханьня. «Guiding Lights», паводле Ghost, — «пранікнёная эпічная баляда», «De Profundis Borealis» — песьня пра раскаяньне, а «Cenotaph» — пра жалобу. Апошняя песьня, «Excelsis», заклікае да жыцьця^[47][11].

…Нашая місія — рабіць усё магчымае й максымальна эфэктыўна выкарыстоўваць свой час. Асабліва ў такія цяжкія часы, як цяпер!

---

Арыгінальны тэкст  (ням.)

Unsere Mission ist es, unser Bestes zu geben und das Beste aus unserer Zeit zu machen. Insbesondere in schweren Zeiten wie diesen!

— Табіяс Форге, інтэрвію для Metal Hammer^[11].

Прасоўваньне

Падрабязьней па тэме: Skeletour

У рамках прасоўваньня альбома гурт адправіўся ў Skeletour, які складаецца зь пяцідзесяці чатырох датаў, з 15 красавіка па 25 верасьня 2025 году. Тур уключае ў сябе канцэрты ў ЗША, Эўропе й Мэксыцы й, як сьцьвярджаецца, будзе напоўнены «найбольш уражлівымі канцэртнымі выступамі», а таксама стане «найбольш амбіцыйнам турам у іхнай карʼеры»^[48].

За адну гадзіну да выхаду альбома (24 красавіка, а 23:00 паводле беларускага часу) на YouTube-канале гурта пачаўся жывы этэр «Skeletá Rockin Eve» (зваротны адлік да Skeletá)^[49].

Камэрцыйны посьпех

• На брытанскім этапе Skeletour на ўсіх чатырох канцэртах быў sold-out.
• Ghost сабралі больш за 20 мільёнаў праслухоўваньняў на Spotify паміж «Satanized» і «Lachryma»^[50].

Водгукі

Прафэсійныя рэйтынгі

Прафэсійныя рэйтынгі да альбома Skeletá.

Сумарныя балы
Аўтар	Рэйтынг	Кр.
AnyDecentMusic?	6,4 / 10	[51]
Metacritic	79 / 100	[52]
Аглядныя балы
Аўтар	Рэйтынг	Кр.
AllMusic		[42]
Blabbermouth.net	8 / 10	[43]
Classic Rock		[40]
Far Out		[53]
The Irish Times		[44]
Kerrang!	4 / 5	[54]
Louder		[55]
Metal On Tap	9,5 / 10	[56]
NME		[57]
Paste	8 / 10	[39]
Slant Magazine		[58]

На Metacritic, сайце-агрэгатары рэцэнзіяў, які зьбірае рэцэнзіі з асноўных выданьняў і выстаўляе сярэднеўзважаны бал са 100, Skeletá атрымала 79 балаў на падставе 7 рэцэнзіяў крытыкаў. Гэтая адзнака азначае «ў цэлым спрыяльныя водгукі»^{[52][Ц 1]}.

Jaimunji з Metal on Tap кажа: «з альбомам Skeletá Ghost стварылі адзін з сваіх самых эмацыйна насычаных і музычна авантурных альбомаў на сёньняшні дзень. Гэта падарожжа <…> багатае гукавымі дэталямі, апавядальнымі патокамі й яркімі момантамі, якія застаюцца надоўга пасьля апошняй ноты <…> ідэальна збалянсаванае варыва з эмоцыяў і тэатральнага майстэрства»^{[56][Ц 2]}.

Сьпіс кампазыцыяў

Усе кампазыцыі выкананыя Ghost (для больш падрабязнай інфармацыі гл. § Удзельнікі запісу).

Трэкліст да Skeletá^[2][3]

№	Назва
1.	«Peacefield» (Мірнае поле)	5:40
2.	«Lachryma» (Сьляза / Кропля сьлязы)	4:36
3.	«Satanized» (Сатанізаваны)	3:56
4.	«Guiding Lights» (Пуцяводныя агні)	3:24
5.	«De Profundis Borealis» (З глыбіняў поўначы)	4:32
6.	«Cenotaph» (Кенатаф)	4:17
7.	«Missilia Amori» (Стрэлы каханьня)	4:31
8.	«Marks of the Evil One» (Сьляды Злога)	4:15
9.	«Umbra» (Канічны цень[59])	5:31
10.	«Excelsis»	6:01
46:43

Нататкі

• Джын Ўокер (Gene Walker) — адзін з псэўданімаў Табіяса Форге.
• У назьве кампазыцыі «Marks of the Evil One» пад the Evil One, магчыма, маецца на ўвазе Сатана^[60].
• У назьве кампазыцыі «Excelsis», магчыма, выкарыстоўваецца частка з выразу Gloria in Excelsis, што значыць хрысьціянскі богаслужбовы гімн, які мае вершаваную форму псалмоў^[61].

Удзельнікі запісу

Ghost

• Папа V Пэрпэтуа
• Група Безназоўных упіраў

Дадатковыя ўдзельнікі

• Фрэдэрык Окесан — гітары^[3]
• Салім аль-Факір — клявішныя

Іншыя

• Эндзі Ўолес — міксаваньне
• Дэн Малш — міксаваньне
• альбом спрадусаваны Джынам Ўокерам (Табіясам Форге)^[3]
• кампазытары — Табіяс Форге, Салім аль-Факір і Вінсэнт Пантарэ^[3]
• Зьбігнеў Беляк — вокладка

Аўтары словаў

• A Ghoul Writer (Табіяс Форге; усе кампазыцыі)^[3]
• Салім аль-Факір («Peacefield», «Satanized»)
• Вінсэнт Пантарэ («Peacefield», «Satanized»)
• Макс Гран («Peacefield», «Lachryma», «Guiding Lights», «De Profundis Borealis», «Cenotaph», «Umbra», «Excelsis»)

Глядзіце таксама

• Impera — пяты студыйны альбом Ghost

Заўвагі

Асноўныя

1. Сьпіс кампазыцыяў:

   1. «Spillways»
   2. «Absolution»
   3. «The Future Is A Foreign Land»
   4. «Ashes»
   5. «Nocturnal Me»
   6. «Idolatrine»
   7. «Zenith»
   8. «Elizabeth»
   9. «Dance Macabre»
2. Сьпіс кампазыцыяў:

   1. «Satanized»
   2. «Absolution»
   3. «The Future Is A Foreign Land»
   4. «Ashes»
   5. «Nocturnal Me»
   6. «Idolatrine»
   7. «Zenith»
   8. «Elizabeth»
   9. «Dance Macabre»

   ---

   1. «Twenties»
   2. «He Is»
   3. «Enter Sandman»
   4. «Deus In Absentia»
   5. «Ashes»
   6. «Rats»
   7. «Kiss The Go-Goat»
   8. «Elizabeth»
   9. «Respite On The Spitalfields»
   10. «The Future Is A Foreign Land»
   11. «Hunter’s Moon»
   12. «Enter Sandman»
   13. «Body And Blood»
   14. «Elizabeth»
   15. «Twenties»
   16. «The Future Is A Foreign Land»
   17. «Enter Sandman»
   18. «Ritual»

Цытаты

1. Цытата на мове арыгіналу: «…generally favorable reviews». (анг.)
2. Цытата на мове арыгіналу: «With Skeletá, Ghost have delivered one of their most emotionally resonant and musically adventurous albums to date. It’s a journey in every sense—rich with sonic detail, narrative flow, and standout moments that will linger long after the final note… a perfectly balanced brew of emotion and theatrical flair». (анг.)