Гердут (імя)

Гердут (Кердут, Гердуць, Кердуць, Гірдут, Гірдуць) — мужчынскае імя і вытворнае ад яго прозьвішча.

Kerdut
Паходжаньне
Мова(-ы)	германскія
Утворанае ад	Gerd + суфікс з элемэнтам -т- (-t-)
Іншыя формы
Вытворныя формы	Кердут, Гірдут, Гердуць, Кердуць, Гірдуць
Зьвязаныя артыкулы
якія пачынаюцца з «Ґердут»

Паходжаньне

Асноўны артыкул: Імёны ліцьвінаў

Кердут (Kerdut) — імя германскага паходжаньня^[1][2]. Іменная аснова -гард- (-герд-, -герт-) (імёны ліцьвінаў Альгерд, Мундыгерд, Тэўтыгерд; германскія імёны Algardus, Mundgerd, Teutgerdis) паходзіць ад гоцкага gairdan 'падпяразваць' (пераноснае 'ахоўваць'), garda 'агароджа' (пераноснае 'ахова, бясьпека')^[3]. Антрапанімічны суфікс-пашыральнік -ут- (-ut-) адзначаецца як у германскіх, так і ў славянскіх мовах^[4]. Такім парадкам, імя Гердут азначае «ахоўнік»^[2].

Варыянты імя ў гістарычных крыніцах: Saymunt Girdutten son (29 верасьня 1379 году^[5])^[6]; Кердути (1387—1392 гады^[7])^[8][9]; Girde Skamunden son^[10], Gyrde, Schamunti filius^[11] (12 кастрычніка 1398 году); cum Gerdud^[12], Gerdud^[13] (2 кастрычніка 1413 году); Кгирдутю чоловек (20 чэрвеня 1413—1424 гадоў^[14] паводле выпісу 30 студзеня 1607 году)^[15]; Кгирдутьево именье (Кгирдуть^[16], 20 лютага 1466 году)^[17]; Кердити^[16]; сельцу своему Кгердутишкам (10 кастрычніка 1499 году)^[18]; земль пустовских… Бутковы Кгердутевича (3 студзеня 1522 году)^[19]; Стан Кгирдутовичъ (1528 год)^[20]; Кгирдутевая вдова (1538 год)^[21]; зъ Кгердутишокъ въ повете Менскомъ (1567 год)^[22]; пан Лаврин Кгердудъ Ульчицъский… Lawryn Gierdud Ulczicki… я Лаврин Кгердуд Улъчицский (3 верасьня 1596 году)^[23]; сеножати Кгердуты (16 чэрвеня 1633 году)^[24]; Walęty Gierdut… na miejscu Walętego Gierducia… Stefan Michałowicz Kierdutowicz na miejscu rodzica swego Michała Kierdutowiczą z Gierduciów (1667 год)^[25]; Gierduciszki (1744 год)^[26]; Katarzyna Gerdut (1758 год)^[27].

Носьбіты

• Саймонт Гердутавіч — літоўскі баярын, які засьведчыў умову 1379 году
• Гердут († па 1413) — літоўскі баярын, сын Скамонта
• Стань Гірдутавіч — бяржанскі баярын, які ўпамінаецца ў попісе войска Вялікага Княства Літоўскага 1528 году
• Андрэй Янавіч Гердуць — расенскі зямянін, які ўпамінаецца ў 1595 годзе^[28]
• Мікалай Станіслававіч Гірдутовіч — расенскі зямянін, які ўпамінаецца ў 1595 годзе^[29]

Гертут (Gertut) гербу Ліс^[30] — літоўскі шляхецкі род^[31].

Гердуд (Gierdud) гербу Яліта — літоўскі шляхецкі род з Ашмянскага павету^[32].

Кертут (Kiertut) гербу Грыф — шляхецкі род Рэчы Паспалітай^[33].

У ваколіцах Путыўлю па 1499 годзе ўпаміналася сяльдо Гердутышка (Гердутишко)^[34]. У актах Вялікага Княства Літоўскага ўпаміналася сяло Гердуцішкі ў Менскім ваяводзтве^[35].

На гістарычнай Меншчыне існуе вёска Гердуцішкі.