Вальбут

Вальбут (Вольбат), Вяльбут (Вяльбот), Валібут — мужчынскае імя і вытворнае ад яго прозьвішча.

Walbot
Паходжаньне
Мова(-ы)	германскія
Утворанае ад	Walt + Boto Wal + Boto
Іншыя формы
Варыянт(ы)	Валібут, Вяльбут, Вяльбот, Вольбат
Зьвязаныя імёны	Бутаўт
Зьвязаныя артыкулы
якія пачынаюцца з «Вальбут»

Паходжаньне

Асноўны артыкул: Імёны ліцьвінаў

Вальдбот, Вальбод, Вальбот або Вэльпот (Waldboth, Walbod^[1], Walbot^[2], Wellpot^[3]) і Ботальд (Botald^[4][5][6]) — імёны германскага паходжаньня^[7]. Іменная аснова -валд- (-алд, -олт) (імёны ліцьвінаў Геральт, Левалт, Рамвольт; германскія імёны Gerwald, Lewolt, Romuald) паходзіць ад гоцкага і германскага waldan 'валодаць, гаспадарыць' або wulþus 'слава, мажнасьць'^[8], аснова -вал- (імёны ліцьвінаў Валін, Валант, Гервала; германскія імёны Walin, Waland, Gerwala) — ад гоцкага *wala 'тыя, хто выдужаў на полі бітвы', walisa 'праўдзівы, лю́бы', waljan 'выбраць' або германскага wala < *wal(a)ha- 'чужы, валійскі'^[9], а аснова -бут- (-бот-) (імёны ліцьвінаў Бутвід, Бутрык, Вільбут; германскія імёны Botvid, Butariks, Willebut) — ад усходнегерманскага but- з значэньнем 'корань, камель' (гепідзкае butilo 'камель')^[10]. Такім парадкам, імя Вальбут азначае «корань улады»^[11].

Варыянты імя ў гістарычных крыніцах: у Клецкомъ повете село, што Волибутъ держалъ (1440—1492 гады)^[12]; nobilibus domini… Michaele Wyelbuthowycz (15 красавіка 1475 году)^[13]; Мартинъ Волбутович (1528 год)^[14]; на Михайла Велбутовича… от Лукаша Велбутовича (1541 год)^[15]; бояръ повету Велонского на имя Волбатовичовъ (1554 год)^[16]; з Валбутовщины (1567 год)^[17]; ur. Krzysztofowi Wielbotowiczowi Paplońskiemu (20 жніўня 1658 году)^[18]; Jan Benedykt Wialbut — podstoli y kommissarz powiatu Oszmiańskiego (3 сакавіка 1712 году)^[19].

Носьбіты

• Валібут — літоўскі баярын, які ўпамінаецца ў наданьні вялікага князя Казімера
• Марцін Вальбутавіч — наваградзкі баярын, які ўпамінаецца ў попісе войска Вялікага Княства Літоўскага 1528 году
• Андрэй Вальбутавіч — жыхар Жамойцкага староства, які ўпамінаецца ў 1537—1538 гадох^[20]
• Міхайла і Лукаш Вяльбутавіча — ашмянскія баяры, якія ўпамінаюцца ў 1541 годзе
• Ян Бэнэдыкт Вяльбут — дзяржаўны дзяяч Вялікага Княства Літоўскага, падстолі і камісар Ашмянскага павету

Вяльбуты гербаў Адравонж, Вяж, Даліва і Радван — літоўскі шляхецкі род з Ашмянскага павету і Вільні^[21].

Вальбуты і Вельбуты — літоўскія шляхецкія роды^[22].

У актах Вялікага Княства Літоўскага ўпамінаўся маёнтак Вяльбуты (Вяльбуты) у Ашмянскім павеце^[23].

На гістарычнай Ашмяншчыне існуе вёска Вельбутова.

Глядзіце таксама

• Валд
• Бота