Доманты

Доманты, Доманты Машэнскія — літоўскі княскі род гербу ўласнага.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Даўмонт (неадназначнасьць).

Доманты лац. Domanty
Герб «Домант»
Краіна паходжаньня	Вялікае Княства Літоўскае

Прозьвішча

Асноўны артыкул: Даўмонт (імя)

Дамунд або Дамонд (Damundus^[1], Damondus) — імя германскага паходжаньня^[2][3]. Іменная аснова -даў(г)- (імёны ліцьвінаў Даўгерд, Даўгер, Даўят; германскія імёны Daugaard, Dauharjis, Dowyatt) паходзіць ад гоцкага daug 'годна', бургундзкага daugjis 'здольны, годны'^[4][5], а аснова -мунд- (-мунт-, -монт-) (імёны ліцьвінаў Монтгерд, Валімонт, Жыгімонт; германскія імёны Mundgerd, Walmont, Sigimunt) — ад германскага *mundô 'рука, абарона, крэўнасьць'^[6] або гоцкага munds 'моц розуму, імкненьне', mundrs 'гарлівы, палкі'^[7]. Такім парадкам, імя Даўмонт азначае «здольны да гарлівасьці»^[3].

Другая частка прозьвішча ўтварылася ад маёнтку Мошнаў у Чаркаскім павеце.

Гісторыя

Паводле родавай легенды, разам з Гедройцамі паходзілі ад літоўскага князя Даўмонта і зь Літвы перасяліліся на Кіеўшчыну. Некаторыя дасьледнікі мяркуюць, што Доманты паходзілі ад князёў Глінскіх.

Першы вядомы з роду — князь Васіль, які жыў на мяжы XV—XVI стагодзьдзяў і валодаў Мошнамі. Ад першай жонкі меў сына Васіля, ад 2-й, Алены Глінскай, — дзьвюх дачок, якія выйшлі замуж за Яна Келбоўскага і Міхаіла Грыбуновіча-Байбузу.

Васіль Васілевіч (? — па 1555) меў сына Рыгора і дачку Аўдоцьцю.

Рыгор Васілевіч (? — па 1591) валодаў маёнткамі Мошнамі, Павуковічамі, Домантавам Палескім (апошні прадаў у 1591 годзе), дварамі ў Кіеве і Чаркасах. Прадаў Мошны князям Вішнявецкім. Астатнія маёнткі перайшлі да ўдавы Апалёніі з Тышаў-Быкоўскіх, якая ў 1640 годзе прадала іх князю Ярэмію Вішнявецкаму.

Па-за радаводам упамінаецца князь Гарайн Домант, служэбнік падляскага ваяводы Васіля Тышкевіча, які ў 1567 годзе пакінуў князю баярскі двор Медухаву каля Лагойску^[8].