第二語言習得

第二語言習得（英文：SLA）係指一個人學第二語言嘅過程。正常嚟講，一個人喺生命早期會一路聽住屋企人講嘢，聽吓聽吓就會由屋企人度學識講自己嘅母語（L1）；如果佢打後喺（例如）學校度學啲 L1 以外嘅語言（L2, L3...），噉佢學 L2 同 L3 等嘅語言嘅過程就算係 SLA ^[1]。

2006 年廣西一間學校；有班壯族嘅學生喺度上堂學英文。喺廿一世紀初嘅世界，英文係最常見嘅 L2 之一。

舉具體啲嘅例子說明，

• 想像而家有個細路，叫佢做明仔：明仔阿爺阿嫲嗰輩就由廣東移民過咗美國，佢喺美國出世同大，同屋企人講開廣東話，同阿爺阿嫲飲茶嗰時完全 100% 係用廣東話講嘢嘅；而等到明仔夠大個嗰陣，佢就返學，喺學校嗰度學英文，用英文同老師同學溝通，不過同屋企人就繼續用廣東話；喺呢個情況下，明仔嘅 L1 係廣東話而 L2 係英文，佢學英文嘅過程係一段 SLA ^[2]；
• 原則上，一個人學親母語以外嘅語言都算係 SLA —就算非母語語言嘅數量多過一隻（L2, L3...）都係噉話，例如東南亞嗰啲粵藉華人就成日係以廣東話做母語，跟住喺學校會學英文、標準官話同埋身處國家嘅官方語言（即係例如人喺馬來西亞嘅就會學馬拉話）噉嘅^[3]，對一個噉嘅人嚟講，廣東話係佢嘅 L1，而英文、標準官話同身處國家嘅語言就算係佢嘅 L2 ^{[註 1]}。

SLA 呢隻字詞仲可以係指一個應用語言學領域：SLA 涉及咗好複雜嘅認知過程，有好多語言學工作者都醉心研究 SLA，會做好多實驗同觀察嚟剖析（例如）人腦學 L2 嗰陣會處理啲乜資訊，仲會嘗試將呢啲研究嘅結果應用落語言教育度，想諗方法做到更有效噉教語言，形成咗 SLA 研究^[4]。到咗廿一世紀初，SLA 係最受關注嘅應用語言學領域之一，有好多語言學工作者都會寫文講吓佢哋對 SLA 相關課題有乜嘢諗法。

定位

第一語言習得：2009 年呢幅相影到個 BB 聽佢太嫲講嘢；細路喺生命頭嗰幾年一路聽身邊啲大人講嘢，聽吓聽吓就會學識 L1。

内文：語言習得、第二語言同學習

睇埋：語言認知、多語現象同應用語言學

首先，講講母語同第二語言嘅概念^{[5]:p. 7}：

• 母語（語言學上興簡寫做 L1）係指一個人人生第一隻用嘅語言：齋靠經驗已經可知，一個蘇蝦仔喺生命頭嗰幾年一路聽住屋企人或者照顧者講嘢（有互動），慢慢就會牙牙學語學識講嘢，佢喺呢個時候學識講嗰隻語言就係佢嘅 L1。
• 同時事實亦都表明，人能夠學識純熟噉運用自己 L1 以外嘅語言，而第二語言（語言學簡寫做 L2, L3, L4...）就係指一個人能夠一定程度噉運用、但又唔係佢 L1 嘅語言^[1]—當中非母語語言嘅先後，通常係按「個人學邊隻語言先」嚟分嘅，即係例如一個住喺美國、用廣東話做 L1 嘅細路，喺幼稚園學英文，到咗中學嗰陣貪得意上法文班學識法文，噉佢嘅 L2 係英文而 L3 係法文；
• 除此之外，L2 有可能數量多過一隻—例如想像一個用廣東話做 L1 嘅細路，屋企人住喺加拿大魁北克，返學就大致上同時噉學英文同法文，噉英文同法文都係佢嘅 L2。

定義上，SLA 正正就係指一個人由完全唔識 L2 變成「能夠有返咁上下純熟噉運用 L2」嘅學習過程，包括有意識同無意識嘅學習^{[註 2]}，一般亦可以包埋 L3, L4, L5... 等非 L1 語言嘅學習過程。

SLA 同教語言有好密切嘅啦掕，但兩者係唔同嘅概念：SLA 係指學習者學識一隻非 L1 語言嗰陣嘅過程，講緊嘅係學習者本身，例如係佢個腦「喺學語言期間出現咗乜變化」，或者佢「犯呢類呢類錯誤嘅機率」點樣隨住時間變化... 呀噉；而語言教育就係指教語言嗰方做嘅嘢，即係例如英文老師做「邊啲生字要教咗先，邊啲生字遲吓先教」噉嘅決定，語言教育可以明顯噉提升 SLA 嘅成效，但並唔係 SLA 嘅必要條件—有好多對語言嘢有興趣嘅人，都會喺冇人教嘅情況下自發噉走去學語言^[6]。

語言熟練度

内文：語言熟練度

睇埋：音系、文法、詞庫、語用同心理測量

語言熟練度泛指一個人有幾能夠純熟噉運用一隻語言，愈純熟就算係熟練度愈高^{[1]:Ch. 2}。

定義上，SLA 就係指緊一個人對非 L1 語言嘅熟練度隨住時間噉升，而要做 SLA 研究，就梗要搵啲方法量度語言熟練度先得—例如想像家陣有班專攻 SLA 嘅語言學家手上有 A 同 B 呢兩隻語言教法，佢哋想知邊隻教法有效啲，最簡單嘅做法係可以搵班用教法 A 學緊隻語言嘅人返嚟，又搵班用教法 B 學緊隻語言嘅人返嚟，比較吓兩組，睇吓邊組嘅語言熟練度升得比較快^{[註 3]}。因為噉，專攻 SLA 嘅語言學家實要有方法客觀噉量度語言熟練度^[7]。

要評估一個人用一隻語言用得有幾熟手，可以由聽講讀寫呢四方面嚟評^{[註 4]}。呢四種能力之間有幾高嘅正相關^[8][9]—意思係話其中一種能力高嘅人，傾向其餘三種能力都高，但的確有啲人可以係其中一種能力高但其餘三種能力低嘅。

除咗以下講嘅語言標準之外，仲可以睇吓做到認知心理實驗式嘅「量度受試者嘅犯錯率同埋生字數量」呀噉^[10]。

語言標準

内文：語言考核

睇埋：歐洲共同語言參考標準、IELTS同TOEFL

歐洲共同語言參考標準（簡稱 CEFR）係廿一世紀初常用嘅一套語言熟練度評估方案，由歐洲評議會喺 2001 年制定嘅。

CEFR 呢套方案假定咗學生喺度學緊一隻歐洲語言做 L2—當中「歐洲語言」包括英文、法文、意大利文或者加泰羅尼亞話呀噉。套方案將「溝通能力有幾高」分咗做 6 個等級，並且對每個等級有一段詳細嘅描述，等語言老師可以輕易噉評定每個學生嘅溝通能力去到邊個水平^{[註 5]}。以下係 CEFR 整體量表嗰 6 等^[11][12]：

等級組別	等級	描述
A 基本使用者	A1 突破	識得明同用熟悉嘅日常表達語句，能夠用啲好基本嘅短語嚟滿足實用需要。 識得做自我介紹同介紹其他人，識得問同答有關「自己住邊」、「識得邊個人」同埋「擁有咩物品」等嘅個人資料相關提問。 識得做簡單嘅互動，不過前題係對方肯慢慢同清楚噉講嘢而且有意慾幫手。
	A2 路段	識得理解句子同埋常用嘅表達語句，前題係啲句子語句係同即時用到嘅範疇（例如好基本嘅個人同家庭細節、買嘢、身處區域嘅地理、做嘢）有啦更嘅。 識得喺簡單同例行嘅工作當中溝通，達致簡單直接噉交流一啲有關熟悉例行嘢嘅資訊。 識得簡單唔花巧噉描述自己嘅背景、周圍環境同埋即時需要嘅嘢。
B 獨立使用者	B1 門檻	對於一啲有關工作、學校、休憩當中成日遇到嘅嘢嘅清楚標準語句，識得理解呢啲語句嘅要點。 能夠喺嗰隻語言嘅使用地區度旅遊，並且能夠應付大部份嘅可能狀況， 能夠就熟悉或者自己有興趣嘅題材，寫段簡單同連串嘅短文。 能夠描述體驗同事件、描述自己有乜夢想、願望同埋志向，並且簡短噉為自己嘅意見同計劃畀理由同解釋。
	B2 優勢	識得理解講實在或者抽象課題嘅複雜文章，能夠理解呢啲文嘅主要諗頭，包括係自己做嗰範嘅技術討論。 能夠以有返咁上下高嘅流暢度同自主度互動，就算成日同母語使用者互動都唔會令其中一方覺得有困難。 能夠就多種課題寫出清楚、詳細嘅文，並且就一個議題解釋一個觀點，講吓唔同選擇各有乜嘢利弊。
C 熟練使用者	C1 進階	能夠理解比較嚴峻同長嘅子句，並且認得到啲冇直接講明嘅意思。 能夠自然流暢噉表達諗頭，同時冇明顯嘅詞窮狀況。 識得有彈性同有效噉用語言嚟達致社交、學術同專業嘅目的。 能夠就複雜課題寫出清楚、結構良好、詳細嘅文，展示收放自如嘅組織形式、連接詞同語句內聚。
	C2 精通	能夠輕易理解任何聽到或者讀到嘅嘢咁滯。 能夠總括嚟自唔同書面或者口語來源嘅資訊，重構論證同解釋，並且有意思噉表達返出嚟。 能夠自主、好流暢同精確噉表達自己，識得喺最複雜嘅環境下都分到一啲有微妙差異嘅意思。

歐洲語言以外嘅語言，亦都有佢哋自己嘅方案可以用嚟評定語言熟練度^[13]。

語言難度

睇埋：複雜度

好多人都會覺得學 L2 好難。現代嘅 SLA 研究指，以下呢啲因素都會主宰一隻語言有幾難學。

語言距離

内文：語言距離

睇埋：語言類型

首先，要講吓語言距離嘅概念：齋靠常識已經可以得知，唔同嘅語言之間有差異，例如廣東話、德文同英文之間好明顯有差異，佢哋並冇任何嘅互通能力，如果攞一個以廣東話做 L1 嘅人、一個以德文做 L1 嘅人、同埋一個以英文做 L1 嘅人，叫佢哋分別噉用母語講嘢，假設佢哋未學過 L1 以外嘅語言，佢哋彼此之間唔會通到話。不過而家睇睇以下呢三句意思一樣嘅例句^{[註 6]}—

語言	羅馬字	漢字
廣東話	Ngo5 aa3 go1 sik6 gan2 je5。（粵拼）	我阿哥食緊嘢。
德文	Mein älterer Bruder isst.	唔適用
英文	My older brother is eating.	唔適用

—就算唔考慮呢幾隻語言傳統上用咩文字嚟寫，都可以睇得出德文同英文之間嘅差異，細過廣東話同英文之間嘅差異。兩隻語言之間嘅距離就係指「攞兩隻語言嚟睇，比較吓佢哋啲文法同音系等各方面，睇吓佢哋彼此之間爭幾遠」^[14]。一般認為，語言距離會影響一隻語言有幾難學—L1-L2 之間嘅距離愈大，個人就愈會覺得 L2 難學^[15]。舉個具體例子，想像有個人，叫佢做蘇珊，蘇珊嘅 L1 係英文，佢想學廣東話，廣東話係聲調語言所以蘇珊就梗要學聲調呢個概念，英文冇聲調系統，所以蘇珊好可能從來未接觸過聲調呢家嘢，因而學起廣東話上嚟有困難；相比之下，如果有個人係以（例如）客家話或者越南話做 L1 嘅，由於客家話同越南話都係聲調語言，呢個人實係（最少本能上）已經知聲調係乜，唔使由頭學過聲調系統嘅概念^[16]。

對於語言可以點樣按現有特徵分類，語言類型學有詳細著墨。

內隱知識

2020 年錄到嘅一段簡單廣東話語音；講嘢嘅人明顯唔使諗就自動噉發出下一吓語音，展現咗佢哋嘅內隱知識。

内文：內隱知識

睇埋：習俗、輕重讀、語調、聯想意思同語感

如果有個人希望自己用 L2 能夠用到好似母語使用者噉，必然需要學大量嘅內隱知識^[1]:2.3.4。

內隱知識係指難以用文字或者語言講出嚟嘅知識。舉例說明，

• 踩單車：是但攞個踩單車踩到咁上下熟腳嘅人，佢明顯能夠做到踩單車嗰時保持平衡，但一旦佢熟到咁上下，就會開始自動唔諗噉樣做嗰啲動作，唔會有意識噉諗或者能夠答「每次踩腳踏嗰陣要用幾多力」等嘅問題；
• 玩樂器：是但搵個玩樂器玩到有返咁上下熟手嘅人，佢能夠用件樂器做演奏，但一旦熟到咁上下，佢就會開始自動唔諗噉樣做嗰啲動作，唔會有意識噉諗「跟住落嚟隻手指要移去邊個位」等嘅問題；

使用一隻語言涉及大量嘅內隱知識：首先，一個人唔淨只要識晒隻語言啲音系文法同埋啲字詞，仲要能夠達致高度自動化^[1]:6.4 噉用呢啲知識；佢要唔使諗都知下一刻要用邊隻字同發邊隻語音，先至可以做到好似母語使用者噉用隻語言。除此之外事實亦表明，用語言會涉及好多講唔出口嘅習俗—包括

1. 要判斷講嘢嗰個人有乜意圖（語用包括嘅嘢），想像以下嘅對話^{[1]:p. 32}

   A 君：（路過）唔好意思，你有冇手機或者手錶等嘅嘢可以睇時間？

   B 君：我有部手機呀，部手機仲好靚添。（跟住佢就忽略 A 君繼續行）

   A 君：...

   —B 君講嘅廣東話句子，啱文法而且又正確噉表達到佢想表達嘅意思，但佢並冇理解到 A 君之所以噉問，係因為佢想睇時間但又冇手錶或者手機。

2. 語調要點用（用錯語調可能會畀人覺得好冇禮貌）
3. 一隻字會引起邊啲聯想（呢點對於寫文學作品嚟講好緊要^[17]）

呢啲知識，複雜得嚟又會隨時間變化，好難吓吓都寫晒落字典或者教科書度，而用嗰隻語言做 L1 但未經語言學訓練嘅人，好多時都難以用口講出呢啲知識。學生唯一可以做嘅，就係畀自己浸淫喺大量嘅 L2 材料當中^{[註 7]}，例如啲人想學好英文，就成日會走去勁睇英文戲或者勁聽英文歌^[18]，而有唔少語言教育工作者都有喺度討論「畀學生浸淫用嘅材料，要點揀先可以最有效噉幫學生學習？」等嘅課題^[19]。

音素問題

内文：音素

睇埋：神經可塑

音素（或者叫粵拼：fung1 nim4）係指令用隻語言嘅人能夠分辨兩隻字嘅最細嘅聲單位。攞廣東話做例子，想像以下嘅音—

bou1（可以對應嘅漢字：煲）、dou1（可以對應嘅漢字：都、刀）—聽嘅人正路聽得出兩個聲唔同；

bo1（可以對應嘅漢字：波、玻）、lo1（可以對應嘅漢字：欏）—聽嘅人都係會聽得出兩個聲唔同；

—「改變最頭嗰吓輔音」呢個舉動，能夠令吓聲唔同咗，而且仲係能夠做到「令吓聲唔同咗」嘅最細可能改動，所以呢幾個開頭輔音就係廣東話嘅音素^[20]。

音素係一個心理性質嘅概念：想像而家有兩個人，叫佢哋做明仔同勤仔，佢哋各自噉用廣東話講出 bou1 嘅音，而第三個人阿松負責聽佢哋嘅發音，三個人都精通廣東話；阿松發覺明仔讀起上嚟大聲過勤仔少少，但喺阿松腦海入面，兩吓聲都係表示緊相同嘅意思，即係話雖然兩吓聲物理上有差異，但聽嗰個人腦海入面當佢哋係同一款聲，所以呢兩吓聲喺廣東話入面音素相同^[21]。

唔同語言喺音素上可以好唔同：例如廿一世紀初嘅英文有分 [l]（例如 lice）同 [r]（例如 rice）呢兩種聲，而廿一世紀初嘅日本話就冇噉嘅區分，淨係得 [ɽ]（有少少似 [l] 又有少少似 [r]）噉嘅音素，搞到以日本話做母語嘅人學英文嗰陣成日都分唔清 [l] 同 [r] 呢兩隻聲^[22]。事實係語言之間喺音素上嘅差異係學語言嘅一大障礙－啲人學語言嗰陣成日會撞到一種情況，就係有啲語音係 L2 會分但 L1 唔會分嘅（嗰兩隻語音喺 L1 裏面屬同一隻音素），搞到學習者分唔到好多 L2 會分嘅字詞^[1]:2.3.1。

呢隻片假名寫嘅係日本話音節 ra，讀音 [ɾa]。有人指日文入面 r 寫嗰個音明顯唔似英文 r 寫嗰個，但又唔見得完美對應英文 l 個音。 呢隻片假名寫嘅係日本話音節 ra，讀音 [ɾa]。有人指日文入面 r 寫嗰個音明顯唔似英文 r 寫嗰個，但又唔見得完美對應英文 l 個音[23]。

比較兩款語音：/p/ 同 /b/
呢段錄音展示清雙唇破音；用 IPA 寫：/p/ 粵語都有呢隻音素，想像粵拼：baa1 呢段錄音展示清雙唇破音；用 IPA 寫：/p/ 粵語都有呢隻音素，想像粵拼：baa1  呢段錄音展示濁雙唇破音；用 IPA 寫：/b/ 包括馬拉提話同尼泊爾話在內等嘅多隻語言，都會將 /p/ 同 /b/ 當做兩款唔同嘅音素，將例如 /pa/ 同 /ba/ 當做兩隻意思唔同嘅字詞，但喺粵語入便，啲人聽到 /ba/ 比較大機會會當佢係讀得怪嘅 /pa/。 呢段錄音展示濁雙唇破音；用 IPA 寫：/b/ 包括馬拉提話同尼泊爾話在內等嘅多隻語言，都會將 /p/ 同 /b/ 當做兩款唔同嘅音素，將例如 /pa/ 同 /ba/ 當做兩隻意思唔同嘅字詞，但喺粵語入便，啲人聽到 /ba/ 比較大機會會當佢係讀得怪嘅 /pa/。

常見問題

字幕可以係學語言嘅工具：呢幅圖展示一套電影，畫面上有英文字幕。想學英文嘅人可以一路睇戲一路睇住字幕嚟學。

語言遷移

内文：語言遷移同中介語

睇埋：語碼轉換同借詞

現實表明，一個人用 L2 嗰陣成日都會喺 L2 當中加入自己 L1 嘅某啲特徵。語言遷移泛指一啲識得多隻語言嘅人用語言嗰陣，將一隻語言嘅特性用落另外一隻語言度，包括一個人用 L2 嗰時有意無意噉用咗自己 L1 嘅某啲用法：事實表明，當一個人學 L2 學到咁上下，就會開始喺腦海入面將 L2 嘅字詞同 L1 嘅對應，即係例如一個以廣東話做母語嘅細路學英文，學到咁上下通常就會有

「Walk 對應行路」

「Eat 對應食」

「Drink 對應飲」

噉嘅諗法^[24][25]。但係事實表明，唔同語言之間好難吓吓做到完美一對一嘅對應，所以呢種「乜乜對應物物」嘅諗法好多時會搞到啲學生用 L2 嗰陣出錯^[26]:A。廿一世紀初嘅語言學界一般認為，語言遷移可以分做兩大類：

• 正面：指 L1 嘅干擾有助個人學 L2；例如英文同德文都屬日耳曼語言，有好多字詞都好相似，甚至寫嗰陣會用同樣（或者大致同樣）嘅羅馬字母嚟寫—例子有英文 here 同德文 hier 呢兩隻字，簡化講都係相當於廣東話呢度噉嘅意思。喺呢種情況下，一個以英文做 L1 嘅人學德文嗰時會見到大量似曾相識嘅字詞，被指會覺得啲字詞易記咗^{[註 8]}。
• 負面：指 L1 嘅干擾妨礙個人學 L2；例子可以睇返上面提到，廿一世紀初嘅日本話缺少咗 [l] 同 [r] 之間嘅分界，搞到以日本話做 L1 嘅人習慣咗 [l] [r] 不分，要學好似英文呢啲會分 [l] 同 [r] 嘅語言嗰陣，佢哋成日因而遇到困難^[27]。

中介語係指一個人講嘢嗰時嘅特色，而呢啲特色係源自佢嘅 L1 嘅。

語言石化

睇埋：洋涇浜同動機

SLA 嘅一個常見問題係所謂嘅語言石化：語言學家發現，啲學 L2 嘅人往往會犯啲錯誤，而且去到咁上下啲錯誤就「石化咗」唔再有自發嘅改進。

對於呢個問題，有語言學家提出唔同人學 L2 嘅動機可能都唔同，而學 L2 嘅動機可以分做兩大類^{[28][29]:p. 9}：

• 溝通功能：語言其中一個重要嘅功能，就係要傳遞資訊，學語言嘅人好多時係想「方便同多啲人溝通」；
• 融入功能：語言另外一個重要功能，係畀一個人展示自己「係咪屬於呢個團體」^{[註 9][7]}；

想像而家喺廣州一間茶樓，發生咗一場噉嘅廣東話對話^[30]：

米高：畀 tu6 我，叉燒包，一籠。

阿姐跟住就郁手遞一籠叉燒包畀米高。

—就算暫且忽略口音嘅問題，米高講嘅嘢明顯唔啱廣東話文法，唔似母語使用者會講嘅廣東話句子。不過阿姐聽得明佢想噏乜，而且做出米高想佢做嘅嘢（遞一籠叉燒包畀米高）—即係話米高講出嘅廣東話句子，達得到溝通功能，但達唔到融入功能，唔能夠令人覺得佢係「以廣東話做母語嘅人」呢個團體嘅一份子。如果米高淨係想達到溝通功能，佢就好有可能會喺呢度止步，唔再改進自己嘅廣東話，形成語言石化。將「廣東話」換做任何嘅語言，上述講嘅嘢都會成立。

L2 耗失

内文：第二語言耗失

睇埋：語言耗失、記憶同遺忘

第二語言耗失係指一個人學咗隻 L2 之後用得唔夠，然後慢慢噉喪失用嗰隻 L2 嘅能力^[31][32]。

認知心理學上嘅研究表明咗，記憶係需要持續噉用先至會維持得到嘅：如果有一件記憶，個人唔會定時噉攞嚟用，佢通常就會慢慢噉遺忘呢件記憶（好似下面幅圖噉），呢個諗頭就係所謂嘅記憶衰變理論。SLA 必然會涉及記憶—人要學 L2 就需要記住隻 L2 嘅文法規則同埋生字^[33]，呢啲記憶理應都會隨時間而「衰變」，用得唔夠就會開始被遺忘。喺實證研究上，語言學家已經觀察到噉嘅現象，觀察啲學生隨時間嘅變化，發現啲學生如果唔持續噉用 L2（尤其係會同時要求收訊同傳訊嘅現實對話），時間一耐就會開始唔記得有關 L2 嘅知識^{[註 10]}。第二語言耗失就係指

「停用或者少用 L2 一排之後，開始喪失使用 L2 嘅能力」

嘅現象。

有好多 SLA 同語言教育工作者都致力研究第二語言耗失呢種現象，想知有咩因素會影響耗失嘅發生率，同埋係有啲咩方法可以阻止耗失。順帶一提，呢系列研究亦都帶出咗「某啲語言知識比較難遺忘」嘅諗頭—研究指，整體嘅 L2 知識衰退到咁上下就唔會再衰退，而呢啲淨低嘅知識可以維持成廿幾年咁耐^{[註 11]}，而且仲有多份研究反映，生字（同文法比較嚟）比較容易出現耗失嘅情況^[31][34]。

對比學習母語

老師準備教語言嗰陣，梗會跟某啲明文寫低嘅課程指引，亦會有意噉寫教學材料，而屋企人教細路講嘢嗰時正路唔會準備啲噉嘅嘢。

内文：第一語言習得

睇埋：外顯知識、內隱知識同幼兒話

有唔少 SLA 專家都想知道 SLA 同第一語言習得（FLA）之間有乜分別。首先，FLA 通常主要係由屋企人（或者照顧者）做嘅—細路學 L1，通常唔使人特登教，照顧佢嘅人成日喺佢身邊用 L1 講嘢，個細路聽聽吓就會學識用 L1 講嘢；相比之下，學 L2 L3 就比較傾向會係正式啲噉做嘅，會由老師等嘅人員教細路用呢啲語言。噉就表示 SLA 同 FLA 會有以下呢啲分別^[1]:5.2.1：

• 學 L1 正常嚟講唔會跟咩教學大綱；
• 屋企人同照顧者自己會用啱文法嘅字句，但好少可會明確噉解釋文法規則；
• 有人用廿一世紀初嘅英文做 FLA 研究，觀察家長點樣同學緊講嘢嘅細路講嘢，發現家長成日都唔改正細路嘅文法，淨係改正啲唔真確嘅內容—即係話家長同細路講嘢嗰時，重視嘅係信息唔係形式^{[註 12]}。用廣東話諗嘅話，想像有個阿嫲同個學緊講嘢嘅孫仔講嘢^[1]:B5.3—

  孫仔：嗰架係的士。（一句完全文法正確嘅句子）

  阿嫲：唔係呀，嗰架係巴士。（改正唔真確嘅內容）

  孫仔：嗰係巴士。（一句錯文法嘅句子）

  阿嫲：啱喇，嗰架係巴士。（唔改正個細路嘅文法）

• 屋企人同照顧者會講啲細路能夠感知到嘅內容；
• 同老師相似嘅係，屋企人同照顧者成日會有意噉將句嘢重複講幾次；

呀噉。

個體因素

呢幅相顯示學語言用嘅流動應用程式 Duolingo 2017 年嗰時個樣，Duolingo 專登設計到似隻遊戲，想靠噉嚟提升學習者嘅動機^[35]。

睇埋：智能、心理測量學同認知心理學

以下呢啲個體因素都會影響一個人學第二語言嘅成效^{[36][37][38][39]}：

• 智能：證據指，IQ 同學術性質嘅 SLA 有正相關—IQ 高嘅學生傾向比較能夠理解文法等概念性質嘅嘢，而且閱讀能力都傾向會高啲，不過「喺正常社交場合下用隻第二語言」嘅能力，就同 IQ 冇乜嘢明顯嘅相關^[40][41]。
• 語言方面嘅天份：有證據顯示，一個人「學語言嘅表現有幾好」唔完全淨係取決於普遍嘅認知能力（智能）—認知心理學家搵到好多學者症候群嘅個案，即係有一啲個體語言能力極高但其他認知能力明顯唔高，當中有啲個案甚至係「能夠流利噉用 20 隻語言，但係連基本自理都做唔到」噉嘅^[42][43]。睇埋言語智能。
• 做歸納嘅能力：學語言好多時都係要睇一大拃字詞同句子，再搵出當中嘅規律，所以呢個過程理應會涉及個人腦做歸納。
• 動機（內在同外在動機）
• 性格：尤其可以睇吓外向度^[44]。
• 態度：對隻語言有正面態度嘅人，一般認為會學得快啲。
• 學語言嘅策略：泛指學習者有意識噉採取、用嚟提升自己學語言成效嘅行動^[45]。

等等。

睇埋

相中嘅係羅塞塔石碑；羅塞塔石碑嘅事反映，對等文本對學習語言嚟講非常有用。

• 語言教育：顧名思義係指教語言嘅教育工作；語言教育同 SLA 係兩個唔同嘅領域，但關係密切—從事語言教育工作嘅人（例如英文老師）要設計教語言用嘅教材，又要諗吓有啲咩活動可以有效幫學生學語言，SLA 研究為佢哋提供咗理論基礎，幫佢哋思考「SLA 研究已知人腦係噉學語言嘅，我設計緊嘅呢種教法能唔能夠順應呢種行為傾向，令學生學得更有效呢？」噉。
• 語言浸淫：指個教育環境會用 L1 同 L2 嚟教好多同語言無關嘅課題（例如數學同自然科學都會攞 L2 嚟教），啲老師冚唪唥都做到純熟噉用 L1 同 L2，同時喺文化上又會遷就返 L1 嘅文化而且會明確噉支援 L1；好多人認為呢種教法能夠有效噉提升學生嘅多語能力^[46]。
• 對等文本
• 習得次序
• 無意識^[47]
• 寂靜期
• 行為主義
• 可讀度

文獻

歐美文獻：

• Alem, D. D. (2020). Strategic Competence and its implication in language teaching (PDF). Journal of Advances in Social Science and Humanities, 6(10), 1326-1333. "Some of compensation strategies are word coinage, circumlocution, foregnizing, literal translation, nonlinguistic means, restructuring, approximation"
• Başöz, T. (2015). Exploring the relationship between tolerance of ambiguity of EFL learners and their vocabulary knowledge. Journal of Language and Linguistic Studies, 11(2), 53-66.
• Dela Rosa, J. P. O., & Arguelles, D. C. (2016). Do Modification and Interaction Work?--A Critical Review of Literature on the Role of Foreigner Talk in Second Language Acquisition. Journal on English Language Teaching, 6(3), 46-60，又有啲語言學家喺度觀察人用自己嘅 L1 嚟同學緊 L1 嘅外地人講嘢，分析佢哋（簡化講）點樣將自己講嘅嘢簡化或者檢查對方「係咪真係明自己講咗乜」，方便啲外地人學嗰隻語言。
• Durkin, P. (2009). The Oxford guide to etymology. OUP Oxford，1.3.2嗰度講到語源學知識可以點樣幫助人學語言，例如英文之所以有好多意思相關但望落唔相似嘅詞語（佢哋用咗 hand 同 manual 做例）係源於英文由其他語言嗰度大量借詞，尤其係借咗好多法文同拉丁文嘅詞語。
• Faez, F., Karas, M., & Uchihara, T. (2021). Connecting language proficiency to teaching ability: A meta-analysis. Language Teaching Research, 25(5), 754-777，呢篇文探討老師對自己教學能力嘅自信會點影響學生嘅語言熟練度，當中 6 有講到啲研究點量度語言熟練度。
• Gass, Susan; Selinker, Larry (2008). Second Language Acquisition: An Introductory Course. New York, NY: Routledge.
• Huang, S., & Kan, P. F. (2022). Cross-linguistic transfer between aspect in Cantonese and past tense in English in Cantonese-English bilingual preschool children. International Journal of Speech-Language Pathology, 24(4), 385-394.
• Johnson, K. (2008). An introduction to foreign language learning and teaching. Pearson Education，呢本書係一本 SLA 入門簡介，對象係有志從事語言教育工作嘅人。
  • Chapter 6.6 "Towards a model"，有講到 SLA 涉及外顯知識變內顯知識（DEC-PRO）嘅過程，又會涉及內顯知識變外顯知識（PRO-DEC）嘅過程。
• Ludwig, J., Fu, D., Bardovi-Harlig, K., Stringer, D., & San Mateo, C. A. (2009). Serious games for second language retention. In Proceedings of the Industry/Interservice, Training, Simulation & Education Conference (I/ITSEC 2009) (pp. 1-10).
• Palmer, H. E. (1924). English intonation with systematic exercises. W. Heffer，有提到學英文嘅人學起上嚟搞唔掂英文嗰啲語調。
• Ramírez Verdugo, D. (2006). A study of intonation awareness and learning in non-native speakers of English. Language awareness, 15(3), 141-159，呢篇文有講到學語言嗰時要學埋啲語調係幾咁難。
• Van Wonderen, E., & Unsworth, S. (2021). Testing the validity of the Cross-Linguistic Lexical Task as a measure of language proficiency in bilingual children. Journal of Child Language, 48(6), 1101-1125，呢篇文第 3 頁有討論一隻語言嘅複雜度可以用乜基準嚟量度。
• Zorzi, M., Houghton, G., & Butterworth, B. (1998). The development of spelling-sound relationships in a model of phonological reading. Language and Cognitive Processes, 13(2-3), 337-371，呢篇文講到英文寫起上嚟啲字嘅串法成日都唔跟固定規則，例如 word（[wɜːd]）同 bird（[bɜːd]）明明用口講嗰陣元音同結尾輔音都一樣，但寫起嚟就一個用 -ord 一個用 -ird。
• 語言天份測試：
  • Carroll, J. B., & Sapon, S. M. (1959). Modern language aptitude test. Psychological Corporation，講到一個到咗廿一世紀初都仲好多人用嘅語言天份測試。
  • Sasaki, M. (2012). The modern language aptitude test (paper-and-pencil version). Language Testing, 29(2), 315-321.
• Input-output 假說：
  • Krashen, S. (1989). We acquire vocabulary and spelling by reading: Additional evidence for the input hypothesis. The modern language journal, 73(4), 440-464，Input 假說主張 input 係學語言嘅重點，一個人要成功學到一隻語言，一定要持續噉接收到佢能夠理解嘅 input—簡單講即係以佢嘅水平嚟講可以理解嘅句子。睇埋心流體驗同適度挑戰嘅概念。
  • Izumi, S., Bigelow, M., Fujiwara, M., & Fearnow, S. (1999). Testing the output hypothesis: Effects of output on noticing and second language acquisition. Studies in second Language acquisition, 21(3), 421-452，Output 假說就主張一個人要成功學到一隻語言，一定要係噉嘗試畀 output－寫嘢或者講嘢都好，先至會留意到某啲語言錯誤。

詞表

以下係篇文啲重要概念嘅粵英對照，啲拼音用嘅係粵拼：

• 母語 / mou5 jyu5 / mother tongue 或者 native language
• 第一語言 / dai6 jat1 jyu5 jin4 / first language
• 熟練度 / suk6 lin6 dou6 / proficiency
• 統計相關 / tung2 gai3 soeng1 gwan1 / statistical correlation
• 認知 / jing6 zi1 / cognition
• 歐洲共同語言參考標準 / au1 zau1 gung6 tung4 jyu5 jin4 caam1 haau2 biu1 zeon2 / Common European Framework of Reference for Languages
• 語言距離 / jyu5 jin4 keoi5 lei4 / language distance
• 互通程度 / wu6 tung1 cing4 dou6 / mutual intelligibility
• 內隱知識 / noi6 jan2 zi3 sik1 / tacit knowledge
• 外顯知識 / ngoi6 hin2 zi3 sik1 / explicit knowledge
• 音素 / jam1 sou3 / phoneme
• 語言遷移 / jyu5 jin4 cin1 ji4 / language transfer
• 中介語 / zung1 gaai3 jyu5 / interlanguage
• 石化 / sek6 faa3 / fossilization
• 溝通功能 / kau1 tung1 gung1 nang4 / communicative function
• 融入功能 / jung4 jap6 gung1 nang4 / integrative function
• 語言耗失 / jyu5 jin4 hou3 sat1 / language attrition
• 記憶衰變 / gei3 jik1 seoi1 bin3 / memory decay
• 智能 / zi3 nang4 / intelligence
• 智商 / zi3 soeng1 / intelligence quotient
• 言語智能 / jin4 jyu5 zi3 nang4 / verbal intelligence
• 歸納 / gwai1 naap6 / induction
• 語言浸淫 / jyu5 jin4 zam3 jam4 / language immersion

註釋

1. 假設佢係大致同時噉學英文、標準官話同身處國家嘅語言。
2. 可以睇吓內隱知識嘅概念。
3. 有關點樣用統計分析答呢條問題，可以睇吓 t 測試。
4. 假設隻語言有自己嘅文字系統，而且做到言文合一。世上有好多語言係連文字都未有嘅，或者有雙層語言等嘅現象做唔到「我手寫我口」。
5. 溝通能力好多時會當係等同熟練度，但呢種睇法唔係個個都贊成。
6. 以下係簡化嘅例子，唔諗「啲句子係咪代表到佢哋嗰隻語言」呢條問題住。
7. 可以睇吓語料庫同機械學習嘅概念，講到靠住畀電腦讀大量嘅語言材料，教電腦學識點處理一隻語言。
8. 不過又有學者指，呢種情況有可能令學習者出現「兩隻語言查實好似」嘅錯覺，令佢哋誤以為其他嘅 L1 特性都可以用落 L2 嗰度。
9. 亦有人提出，話「講得有幾似 L1 使用者」可以攞嚟評估語言熟練度，但淨係「攞嗰隻語言嘅邊款變體嚟做標準」已經係大問題。
10. 「唔記得咗」嘅知識唔會完全消失：事實表明，學「之前學過但唔記得咗」嘅知識明顯快過學「真係完全未接觸過」嘅知識。
11. 可以睇吓遺忘曲線「跌到咁上下條線就橫咗唔再跌」嘅情況，或者睇吓指數衰減。
12. 英文原文："They are message-focused, not form-focused."