Рымша

Рымша (Рымуш, Рымаш) — мужчынскае імя і вытворнае ад яго прозьвішча.

Rymsza
Паходжаньне
Мова(-ы)	германскія
Утворанае ад	Rim + суфікс з элемэнтам -ш- (-sch-)
Іншыя формы
Варыянт(ы)	Рымуш, Рымаш
Зьвязаныя артыкулы
якія пачынаюцца з «Рымша»

Паходжаньне

Асноўны артыкул: Імёны ліцьвінаў

Рым (Rim) — імя германскага паходжаньня^[1]. Іменная аснова -рым- (імёны ліцьвінаў Рымель, Рыман, Рымунд; германскія імёны Riemel, Rimann, Rimund) паходзіць ад гоцкага rimis 'спакой, стрыманасьць, непарухлівасьць'^[2].

Германскае паходжаньне імя Рымша сьцьвердзіў францускі лінгвіст-германіст Раймонд Шмітляйн, які на падставе шматгадовых дасьледаваньняў прыйшоў да высноваў пра германскае паходжаньне літоўскіх уласных імёнаў^[3].

Этымалягічны слоўнік старапольскіх асабовых імёнаў, выдадзены Польскай акадэміяй навук, адзначае гістарычнае бытаваньне ў Польшчы германскага імя Rymsza^[4].

Імя Рымш адзначалася ў Прусіі (ваколіцы Мэмэлю): Jan Rymsch Kruger (1511—1520 гады)^[5]. Апроч таго, у Прусіі бытавала прозьвішча Rimmasch (Riemasch)^[6][7].

Варыянты імя ў гістарычных крыніцах: Holechno Rymszycz (1473, 1483, 1486, 1490 і 23 красавіка 1501 году)^[8]; homines seu kmetones… quintum Julianum Rymoshovyczh et sextum Petrum Rymoshovycz (25 чэрвеня 1500 году)^[9]; людеи наших шести служебъ, на имя… а Станка, а Римша, а Михна Еиковичовъ (25 ліпеня 1503 году)^[10]; покупил люди и земли, и сеножати, в бояр и въ людей нашихъ… в Леся Рушъкевича и в брата его Римъша Павловича (24 чэрвеня 1508 году)^[11]; Олехно Рымъшичъ^[12], Юреи Римъшычъ^[13], Петръ Римушевичъ^[14], Миколаи Рымшевичъ^[15], вдова Римъшовая^[16], Янъ Римъшевичъ^[17] (1528 год); людеи наших которыи к именю своему, к Икажну… Римиша (1537 год)^[18]; sioło Kirdeykowskie… Woytko Rymoszewicz (4 сьнежня 1554 году)^[19]; Rymussewicz (1564—1569 гады)^[20]; Янъ Рымашевичъ (1565 год)^[21]; поборцовъ… у Менскомъ повете — Давыдъ Есманъ а Ярошъ Римъша (6 студзеня 1567 году)^[22]; Ярошъ Рымша (1567 год)^[23]; Rymsza (1750 год)^[24]; Antonij Rymsza (1798 год)^[25].

Носьбіты

• Рымша Паўлавіч — зямянін Віленскага павету, які ўпамінаецца ў 1506 годзе
• Алехна Рымшыч — наваградзкі баярын, які ўпамінаецца ў попісе войска Вялікага Княства Літоўскага 1528 году
• Юры Рымшыч — майшагольскі баярын, які ўпамінаецца ў попісе войска ВКЛ 1528 году
• Пётар Рымушавіч — баярын Ковенскага павету, які ўпамінаецца ў попісе войска ВКЛ 1528 году
• Мікалай Рымшавіч — эйрагольскі баярын, які ўпамінаецца ў попісе войска ВКЛ 1528 году
• Ян Рымшавіч — крожаўскі баярын, які ўпамінаецца ў попісе войска ВКЛ 1528 году
• Ян Рымашавіч — ракаўскі баярын, які ўпамінаецца ў попісе войска ВКЛ 1565 году
• Андрэй Рымша (да 1550 — па 1595 або 1599) — паэт-панэгірыст, адзін з асноўных прадстаўнікоў старажытнай беларускай паэзіі другой паловы XVI — пачатку XVII стагодзьдзяў

Рымшы і Рымшэвічы — літоўскія шляхецкія роды^[26].

Рымашэвічы (Rymaszewicz) — літоўскі шляхецкі род^[27].

Рымша (Rymsza) — прозьвішча, зафіксаванае ў XIX стагодзьдзі ў ваколіцах Сувалкаў^[28].

На 1905 год існаваў засьценак Рымшышкі ў Гарадоцкай воласьці^[29].

На 1909 год існавалі вёска і маёнтак з назвай Рымшаўка ў Рэчыцкім павеце Менскай губэрні^[30].

На гістарычнай Ашмяншчыне існуе вёска Рымшыненты. Назву Рымашы маюць вёскі на гістарычных Браслаўшчыне і Случчыне.