Македонски Бошњаци

Македонски Бошњаци — уставно признато малцинство во Македонија. Според пописот во 2002 година на територијата на Македонија живеат околу 17.018 Бошњаци или околу 0,84% од вкупното население во државата^[1]. Од политичка гледна точка, Бошњаците имаат свои политички партии кои се нарекуваат Демократска лига на Бошњаците и Партија за демокрaтска акција, додека пак од културна гледна точка традиционално се одржуваат Бошњачките средби.

Македонски Бошњаци
Бошњаци во Македонија
Bošnjaci u Makedoniji

Подрачја со значајно население
Град Скопје	7,585[1]
Општина Велес	2,406[1]
Општина Долнени	2,380[1]
Општина Студеничани	1,662[1]
Општина Петровец	1,442[1]
Јазици
Бошњачки јазик, Македонски јазик
Вероисповед
Ислам
Сродни народи
Косовски Бошњаци, Српски Бошњаци

Извештај за ангажираноста на турската власт во Скопје околу доселениците од Босна и Херцеговина: создаден е Мухаџирско-отомански Клуб, привремено училиште. Во извештајот се препорачува српската власт да се ангажира да ги придобие на српска страна со отворање на кафана, берберница и читална. (Скопје, 6 февруари 1910)

Со измена на законот за празниците на Република Македонија, на 8 февруари 2007 година во Собранието на Р Македонија, 28. Септември (Денот кога претставниците на Бошњачкиот народ на вториот бошњачки сабор во Сараево го вратија своето национално име Бошњак) е прогласен за Меѓународен ден на Бошњаците како празник за припадниците на бошњачката заедница во Р Македонија. Овој ден е неработен ден за Бошњаците во Р Македонија.

Историја

Бошњаците се релативно доцна доселени на територијата на Република Македонија. Првите населувања на Бошњаци од Босна и Херцеговина се забележуваат после Големата источна криза и анкесијата на Босна од страна на Австроунгарија во 1875-1878 година. Во овој период огромен број на муслимански бегалци (Бошњаци, Турци, Черкези) бил населен во Македонија. По Балканските војни речиси сите доселени муслимани се иселиле во Турција.

Денешните Бошњаци во Република Македонија се населени во 50-тите и 60-тите години на XX век од областа Санџак во Србија и Црна Гора, претежно од местата Тутин, Рожае, Плав, Гусиње и Нови Пазар, поради што овие луѓе се познати и под името Санџаклии. Тргнувајќи на пат за иселување во Турција,според договорот меѓу Турција и Југославија од 50-тите години на XX век со кој муслиманите од Југославија единствено можеле да се иселуваат во Турција преку Македонија, голем број на Бошњаци од Санџак (заедно со Албанци од Косово) остануваат и се населуваат во испразнетите турски и торбешки села во Македонија, најчесто купувајќи ги имотите на Турците и Торбешите кои се иселувале за евтини пари. На тој начин се населиле Бошњаците во селата Батинци, Средно Коњари (Скопско) и Горно Оризари (Велешко) кои претходно биле населени со Турци. Денес компактни цели на Бошњаци во Македонија живеат во Скопското Поле, областа Торбешија (Скопско), северозападниот дел на Прилепското Поле и долниот тек на реките Бабуна и Тополка во Велешко.

По вероисповед, Македонските Бошњаци се муслимани.

Населени места

Карта на Бошњаците во Македонија (2021)

Според пописот од 2002 година, петте најмногубројни општини со Бошњаци се:

Општина	население на општината	Бошњаци
Град Скопје	467.257	6.465
Општина Велес	57.602	2.406
Општина Студеничани	17.246	1.662
Општина Долнени	11.583	1.633
Општина Петровец	8.255	1.442

Присутност на Бошњаците по населени места, според пописните резултати од 2002 година:

Населено место	Вкупно	Бошњаци
Град Скопје	467 257	5.301
Горно Оризари	2.262	2.032
Батинци	5.364	1.660
Лажани	1.846	1.076
Љубин	2.044	914
Десово	1.026	566
Житоше	1.807	604
Долно Коњари	734	527
Средно Коњари	1.140	402
Црквино	363	336
Ќојлија	400	215
Градско	2.219	215
Водоврати	379	192
Зелениково	1.906	190
Тетово	52.915	156
Локвени	178	143
’Ржаничино	855	137
Петровец	2.659	118
Борино	441	86
Сарај	5.232	78
Канатларци	972	69
Виничани	569	58
Отиштино	59	53
Јакреново	212	51
Гостивар	35.847	34

Познати Македонски Бошњаци

• Зеќир Рамчиловиќ - историчар, универзитетски професор, пратеник и потпреседател на Собрание
• Сафет Бишевац — новинар.
• Елвир Куртановиќ — каратист, освои златен медал на Европското младинско првенство во карате 1994 г. во Кардиф и тогаш за првпат официјално е интонирна македонската химна во странство.
• Адем Мекиќ — кошаркар и македонски репрезентативец.
• Елвир Мекиќ — пејач.
• Неџат Мемиќ — новинар.
• Рафет Муминовиќ — поранешен пратеник во Собранието на Македонија од ДЛБ.
• Ферид Мухиќ — филозоф и професор.
• Маја Мухиќ — поранешен портпарол и универзитетски професор.
• Алмира Папиќ — новинарка во МТВ.
• Елвира Рахиќ — пејачка со потекло од Лажани.
• Дамир Хаџиќ — светски младински првак во кајак на диви води 3xC1
• Фехим Хусковиќ — академски сликар и графичар
• Хидо Туркоглу — турски кошаркар со бошњачко потекло од Лажани, Македонија.