Андрэй Гаштольд

Андрэй Гаштольд (? — да 1404) — дзяржаўны дзяяч Вялікага Княства Літоўскага, староста віленскі (1387) і крэўскі (1398—1401).

Андрэй Гаштольд
лац. Andrej Gaštold / Haštold

Герб «Габданк»
Асабістыя зьвесткі
Нарадзіўся	1342
Памёр	да 1404 Геранёны, Ашмянскі павет, Віленскае ваяводзтва, Вялікае Княства Літоўскае
Род	Гаштольды
Бацькі	Гаштольд[1]
Дзеці	Талівойша, Ян, Пётар

Меў уладаньні ў Геранёнах (у крыжацкім помніку «Паведамленьні аб літоўскіх дарогах» упамінаецца Gasztowtendorff im gebite czu Geranenen^[2]) і зямлю ў Вільні.

Імя

Асноўны артыкул: Гаштольд (імя)

Гасьцівалд, пазьней Гастальд або Гаштальд (Gastivald, Gastaldius^[3], Gastold^[4]) — імя германскага паходжаньня^[5]. Іменная аснова -гаст- (-каст-, -гест-) (імёны ліцьвінаў Гасьціла, Гестар, Каштарт; германскія імёны Gastila, Gaster, Kastert) паходзіць ад гоцкага і германскага gasts 'госьць, вандроўнік', а аснова -валд- (-алд, -олт) (імёны ліцьвінаў Геральт, Левалт, Рамвольт; германскія імёны Gerwald, Lewolt, Romuald) — ад гоцкага і германскага waldan 'валодаць, гаспадарыць' або wulþus 'слава, мажнасьць'^[6].

Адпаведнасьць імя Гастаўт (Гайстаўт) германскаму імю Gastaldius сьцьвердзіў францускі лінгвіст-германіст Раймонд Шмітляйн, які на падставе шматгадовых дасьледаваньняў прыйшоў да высноваў пра германскае паходжаньне літоўскіх уласных імёнаў^[3][7]. Германскае паходжаньне імя Гаштольд (Gasztołt, Gastoldus, Gastawdus, Gastowdus) таксама сьцьвярджае этымалягічны слоўнік старапольскіх асабовых імёнаў, выдадзены Польскай акадэміяй навук^[4].

Форма імя ў гістарычных крыніцах: Andrea alias Gastold Vilnensi capitaneis (Andreas alias Gastold^[8]; 1 чэрвеня 1387 году)^[9]; Кгастовтъ (1387—1392 гады^[10])^[11][12]; Gastouti (1387—1394 гады)^[13]; Gastoldo (Gastold^[8]; 2 лютага 1395 году)^[14]; Gastod (23 красавіка 1398 году)^[15]; Gastudt, houptman czu Crewen^[16], Gostud, capitaneus in Krewa^[17] (12 кастрычніка 1398 году).

Біяграфія

Зь літоўскага баярскага роду, сын Гаштольда, старосты вялёнскага.

Упершыню ўпамінаецца ў 1387 годзе ў прывілеі Ягайлы касьцёлу ў Абольцах як староста віленскі. У 1387 або 1389 годзе паручыўся за князя Грыцку Канстантынавіча. Ва ўмове 1396 году пісаўся як «геранёнскі». У 1398—1401 гадох быў старостам крэўскім.

Меў сыноў Талівойшу, Яна і Пятра.