Вільгельм

Вільгельм, Вілем, Вілім — мужчынскае імя і вытворнае ад яго прозьвішча.

Wilhelm
Паходжаньне
Мова(-ы)	германскія
Утворанае ад	Wilo + Helmo
Іншыя формы
Варыянт(ы)	Вілем, Вілім
Зьвязаныя артыкулы
якія пачынаюцца з «Вільгельм»

Паходжаньне

Асноўны артыкул: Імёны ліцьвінаў

Вільгельм, Вілем або Вілім^[1] (Wilhelm, Willem^[2]) — імя германскага паходжаньня^[3]. Іменная аснова -віл- (імёны ліцьвінаў Вільбут, Вільгейда, Мунтвіл; германскія імёны Willebut, Williheid, Muntwil) паходзіць ад гоцкага wilja 'воля', а аснова -гелм- (-елм-) — ад гоцкага hilms^[4], стараверхненямецкага helm 'гелм'^[5].

Этымалягічны слоўнік старапольскіх асабовых імёнаў, выдадзены Польскай акадэміяй навук, адзначае гістарычнае бытаваньне ў Польшчы германскага імя Wilim (Wilem, Willem, Wilhelm, Willehelm, Wilam, Wilaham, Wilhalm, Welhelm)^[6].

У Прусіі бытавала імя Вілям: Willam (1359 год)^[7].

Варыянты імя ў гістарычным крыніцах: на боярина земли Жомоитское Андрушка Вилимовича (25 чэрвеня 1525 году)^[8]; присылала к намъ бити чолом арцымагнусовская королева кнежна Маръя, князя Володимерова дочъ, чоловека своего Вилима (люты 1586 году)^[9]; его милости пану Вилгелмови Фрыдерихови Тавбе, державцы телшовскому (12 ліпеня 1598 году)^[10]; mieszczanie miasta Poniemonskiego. Wilhelm Tornowicz (12 жніўня 1598 году)^[11]; Adam Wilimowicz (1621 год)^[12]; Michałka Wilimowa (22 студзеня 1624 году)^[13]; Я Анна Окгинская Богдановая Вильгельмовая Стеткевичовая, подкоморына Браславская (29 верасьня 1631 году)^[14]; по небощику покойномъ его милости пану Вильгельму Стеткевичу Подкоморымъ Браславскимъ (21 студзеня 1636 году)^[15]; Wilem Jadwił (15—23 і 20 кастрычніка 1655 году)^[16]; Abram Wilamowicz (1667 год)^[17]; земенинъ господарский Мартинъ Вилямовичъ оповедалъ и ку уписанью тутъ до книгъ земъскихъ Ошъменьскихъ вечистыхъ покладалъ привилей… бояре замъку Кгераноинъского Янъ а Матысъ и Якубъ Вилямовичове (25 чэрвеня 1677 году)^[18]; Andrzej Stanisław Wilamowicz^[19], Stanisław Wilamowicz^[20] (1690 год); Samuel Wilamowicz Lithuanus (1707 год)^[21]; jmp Andrzey Wilimowicz (31 кастрычніка 1713 году, 5 кастрычніка 1714 году)^[22][23]; Wilim Wyrwiało Kombulski (1 лютага 1765 году)^[24]; Wilim Mozul…. Aloxa Wilim… Samuś, Wilim Dubrowiczowie… Samusia, Michasia, Macieja, Wilima Żurawinkow (1765 год)^[25]; Wilim Werza… Tum Grygul Wilima syn (25 сакавіка 1766 году)^[26]; Pan Jan Wilhelmowicz Stetkiewicz-Zawierskyi, choruży Orszanski (9 студзеня 1768 году)^[27]; Mikołay Semein Wilamowicz (15 траўня 1772 году)^[28]; pater Placidus Wilamowicz, filius conventus Giełvanensis (18 траўня 1789 году)^[29].

Носьбіты

• Вільгельм I (900/910—942) — герцаг Нармандыі
• Вільгельм I Заваёўнік (каля 1027—1087) — герцаг Нармандыі і кароль ангельскі з Нармандзкай дынастыі
• Андрушка Вілімавіч — баярын Жамойцкай зямлі, які ўпамінаецца ў 1525 годзе
• Вільгельм Аранскі (1533—1584) — водца паўстаньня ў Нідэрляндах супраць гішпанскага панаваньня, якое паклала пачатак Васьмідзесяцігадовай вайне і прывяло да фармальнай незалежнасьці Нідэрляндаў
• Ян, Матыс і Якуб Вілямавічы — геранёнскія баяры, якія ўпамінаюцца ў 1561 годзе
• Марцін Вілямовіч — ашмянскі зямянін, які ўпамінаецца ў 1677 годзе
• Казімер, Самуэль, Юры, Крыштоф і Каця Вілімы — жыхары вёсак Жэймаў і Мейлунаў (Браслаўскі павет), якія ўпамінаюцца ў 1759 годзе^[30]
• Людвік Вілімовіч — шляхціч Менскага ваяводзтва, які ўпамінаецца ў 1787 годзе^[31]
• Георг Вільгельм Фрыдрых Гэгель (1770—1831) — нямецкі філёзаф
• Вільгельм I (1797—1888) — імпэратар Нямеччыны і кароль Прусіі
• Валенці Вільгельм Ваньковіч (1800—1842) — мастак
• Фрыдэрык Вільгельм Радзівіл (1833—1870) — XIII ардынат на Нясьвіжы.
• Антоні Вільгельм Радзівіл (1833—1904) — вайсковы дзяяч Прусіі, генэрал артылерыі
• Вільгельм Стэйніц (1836—1900) — першы афіцыйны чэмпіён сьвету ў шахматах
• Вільгэльм Конрад Рэнтген (1845—1923) — нямецкі фізык
• Вільгельм II (1859—1941) — імпэратар Нямеччыны і кароль Прусіі
• Вілем Мэнгельбэрг (1871—1951) — нідэрляндзкі дырыгент
• Яганэс Вільгельм Енсэн (1873—1950) — дацкі пісьменьнік і паэт, ляўрэат Нобэлеўскай прэміі ў галіне літаратуры
• Станіслаў Вільгельм Радзівіл (1880—1920) — вайсковы дзяяч
• Альбрэхт Антоні Вільгельм Радзівіл (1885—1935) — перадапошні XVI ардынат на Нясьвіжы

Вілямовічы (Wilamowicz) і Вілімовічы (Wilimowicz) — літоўскія шляхецкія роды з Троцкага павету^[32].

Вільгельмовічы (Wilhelmowicz) гербу Грымала — літоўскі шляхецкі род^[33], які меў маёнткі ў Віцебскім ваяводзтве^[34].

Вілямовіч (Wilamowicz) і Віламовіч (Willamowicz) — прозьвішчы, зафіксаваныя ў XIX стагодзьдзі ў ваколіцах Сувалкаў^[35].

У актах Вялікага Княства Літоўскага ўпаміналіся сяло Вілімішкі каля Палангі і маёнтак Вілямавічы (Вилямовичи) у Берасьцейскім ваяводзтве^[36].

На гістарычнай Вількаміршчыне існуе вёска Вілемішкі, на гістарычным Падляшшы — Вілямаўка.