பெப்ரவரி 29

பெப்ரவரி 29 (February 29) அல்லது லீப் நாள் (leap day) என்பது கிரிகோரியன் ஆண்டில் நெட்டாண்டு ஒன்றின் 60 ஆவது நாளாகும். ஆண்டு முடிவிற்கு மேலும் 306 நாட்கள் உள்ளன. இந்த நாள் நான்கு ஆண்டுகளுக்கு ஒரு முறை 4 ஆல் வகுபடும் 2016, 2020, 2024 போன்ற ஆண்டுகளில் மட்டுமே வருகிறது. கிரெகொரியின் நாட்காட்டி உட்பட சூரியனைச் சுற்றிவரும் புவியின் சுழற்சியை அடிப்படையாகக் கொண்ட பெரும்பாலான சூரிய நாட்காட்டிகளில் லீப் நாள் உள்ளது. சந்திரனின் பிறைகளை அடிப்படையாகக் கொண்ட சூரியசந்திர நாட்காட்டிகளில் லீப் அல்லது இடைச்செருகப்பட்ட மாதம் சேர்க்கப்படுகிறது.^[1]

<<	பெப்ரவரி					>>
ஞா	தி	செ	பு	வி	வெ	ச
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28
MMXXV

லீப் நாளைக் கொண்டிருக்கும் ஆண்டு நெட்டாண்டு என அழைக்கப்படுகிறது. கிரெகொரியின் நாட்காட்டியில், 100 ஆல் வகுபடும் ஆண்டுகள் லீப் நாளைக் கொண்டிருப்பதில்லை. ஆனால் 400 ஆல் வகுபடும் ஆண்டுகளில் லீப் நாள் வருகிறது. 1700, 1800, 1900, 2100 போன்றவை நெட்டாண்டுகள் அல்ல, அவை சாதாரண ஆண்டுகள் ஆகும். ஆனால், 1600, 2000, 2400 ஆகியன நெட்டாண்டுகள் ஆகும். சீன நாட்காட்டியில் பெப்ரவரி 29 ஆம் நாள் குரங்கு, டிராகன், எலி ஆகிய ஆண்டுகளில் மட்டுமே வருகிறது.

பூமி சூரியனை முழுமையாகச் சுற்றிவருவதற்கு 365 நாட்களும் மேலதிகமாகக் கிட்டத்தட்ட 6 மணித்தியாலங்கள் அதிகமாக எடுப்பதால் லீப் நாள் சேர்க்கப்படுகிறது. மேலதிகமான இந்த 24 மணித்தியாலங்கள் ஒவ்வொரு நான்கு ஆண்டுகளுக்கு ஒரு முறை சேர்க்கப்பட்டு, மேலதிக ஒரு முழுமையான நாள் சூரியனின் தோற்றநிலைக்கு ஏதுவாக நாட்காட்டிகளில் சேர்க்கப்படுகிறது. 16-ஆம் நூற்றாண்டு வரை பயன்பாட்டில் இருந்த யூலியன் நாட்காட்டி நான்கு ஆண்டுகளுக்கு ஒரு முறை இந்த லீப் நாளைச் சேர்த்து வந்தது; ஆனால் இந்த முறையில் அளவுக்கு அதிகமான (கிட்டத்தட்ட 400 ஆன்டுகளுக்கு ஒரு முறை 3 நாட்கள் என) நாட்கள் கூட்டப்பட்டு வந்தன. எனினும், சூரிய ஆண்டு உண்மையில் 365 நாட்கள் 6 மணித்தியாலங்களை விட சிறிது குறைவாகும். குறிப்பாக, அல்போன்சிய அட்டவணையின் படி, பூமி சூரியனை முழுமையாகச் சுற்றி வர 365 நாட்கள், 5 மணித்தியாலங்கள், 49 நிமிடங்கள், 16 செக்கன்கள் (365.2425 நாட்கள்) எடுக்கிறது. இதனால், ஒவ்வொரு நான்கு ஆண்டுகளுக்கும் ஒரு முறை ஒரு மேலதிக நாளை சேர்ப்பதால் நாட்காட்டியில் 43 நிமிடங்கள் 12 செக்கன்கள் மேலதிகமாக சேர்க்கப்படுகின்றன. இது 400 ஆண்டுகளுக்கு ஒரு முறை 3 நாட்களாகும். இந்தக் குறைபாட்டை சமப்படுத்த, ஒவ்வொரு 400 ஆண்டுகளுக்கும் மூன்று லீப் நாட்கள் கைவிடப்பட வேண்டும். பொது விதிக்கு விதிவிலக்காக கிரெகொரியின் நாட்காட்டி குறிப்பிட்ட திருத்தங்களைக் கொண்டு வந்தது. இதன் படி, 100 ஆல் வகுக்கப்படும் ஒரு ஆண்டு நெட்டாண்டாக இராது. ஆனால் அந்த ஆண்டு 400 ஆல் வகுக்கப்பட்டால் அந்த ஆண்டு நெட்டாண்டாக இருக்கும். அதாவது, 1600, 2000, 2400, 2800 ஆகியவை நெட்டாண்டுகளாக இருக்கும். அதே வேளையில் நானூறால் வகுக்கப்படாத ஆனால் நூறால் வகுக்கப்படும் 1700, 1800, 1900, 2100, 2200, 2300 போன்றவை நெட்டாண்டுகளாக இராது.^[1][2]

நிகழ்வுகள்

• 1504 – கிறித்தோபர் கொலம்பசு அன்றிரவு சந்திர கிரகணம் குறித்த தனது அறிவைப் பயன்படுத்தி யமேக்கப் பழங்குடி மக்களை அவருக்குத் தேவையான பொருட்களை வழங்கும்படி வைத்தார்.
• 1644 – ஏபெல் டாசுமானின் இரண்டாவது கடல்வழிப் பயணம் ஆரம்பமானது.
• 1704 – பிரெஞ்சுப் படைகளும் அமெரிக்கப் பழங்குடிகளும் இணைந்து மாசச்சூசெட்சு விரிகுடாக் குடியேற்றத்தில் டியர்பீல்ட் என்ற இடத்தில் ஆங்கிலக் குடியேறிகளைத் தாக்கியதில் பெண்கள், குழந்தைகள் உட்பட நூற்றிற்கும் அதிகமானோர் கொல்லப்பட்டனர்.
• 1712 – சுவீடனில் சுவீடன் நாட்காட்டியில் இருந்து யூலியன் நாட்காட்டிக்கு மாறுவதற்காக பெப்ரவரி 29 ஆம் நாளுக்குப் பின்னர் பெப்ரவரி 30ம் நாள் ஏற்றுக்கொள்ளப்பட்டது.
• 1720 – சுவீடன் அரசி உல்ரிக்கா எலனோரா முடி துறந்தார். இவரது கணவர் முதலாம் பிரெடெரிக்கு மன்னரானார்.
• 1752 – பர்மாவின் கடைசி மன்னராட்சியின் கடைசி வம்சம் கோன்பவுங்கை அலோங்பாயா மன்னார் தொடங்கினார்.
• 1796 – ஐக்கிய அமெரிக்காவுக்கும் பிரித்தானியாவுக்கும் இடையே அமைதியான வணிகம் நடைபெறுவதற்கு ஒப்பந்தம் கையெழுத்திடப்பட்டது.
• 1864 – அமெரிக்க உள்நாட்டுப் போர்: ரிச்மண்டில் பிடித்து வைக்கப்பட்டிருந்த 15,000 அமெரிக்க ஒன்றியப் படையினரை விடுவிக்கௌம் முயற்சி தோல்வியடைந்தது.
• 1916 – டோக்கெலாவ் ஐக்கிய இராச்சியத்துடன் இணைக்கப்பட்டது.
• 1916 – குழந்தைத் தொழிலாளர்: அமெரிக்காவின் தென் கரொலைனாவில் தொழிற்சாலைகளிலும் சுரங்கங்களிலும் பணியாற்றும் தொழிலாளர்களின் குறைந்த வயதெல்லை 12 இல் இருந்து 14 ஆக அதிகரிக்கப்பட்டது.
• 1920 – செக்கோசிலோவாக்கியாவின் தேசியப் பேரவை 1920 அரசியலமைப்பை ஏற்றுக் கொண்டது.
• 1936 – தோக்கியோவில் பெப்ரவரி 26 இல் ஆரம்பமான ஆட்சிக் கவிழ்ப்பு முயற்சி தோல்வியில் முடிந்தது.
• 1940 – பின்லாந்து பனிக்காலப் போரை முடிவுக்குக் கொண்டுவர அமைதிப் பேச்சுகளை ஆரம்பித்தது.
• 1940 – இரண்டாம் உலகப் போர் காரணமாக, இயற்பியலாளர் எர்னஸ்ட் லாரன்சு தனது 1939 நோபல் பரிசை கலிபோர்னியாவின் பெர்க்லி நகரில் பெற்றுக் கொண்டார்.
• 1944 – இரண்டாம் உலகப் போர்: ஆட்மிரால்ட்டி தீவுகள் டக்ளசு மக்கார்த்தர் தலைமையிலான அமெரிக்கப் படைகளினால் முற்றுகைக்குள்ளானது.
• 1960 – மொரொக்கோவில் இடம்பெற்ற நிலநடுக்கத்தில் 12,000 பேர் வரையில் உயிரிழந்தனர்..
• 1972 – வியட்நாம் போர்: தென் கொரியா தனது மொத்தமுள்ள 48,000 படையினரில் 11,000 பேரை வியட்நாமில் இருந்து திரும்ப அழைத்துக் கொண்டது.
• 1988 – தென்னாபிரிக்காவின் ஆயர் டெசுமான்ட் டுட்டு உட்பட 100 மதகுருமார் இனவொதுக்கலுக்கு எதிரான ஆர்ப்பாட்டங்களின் போது கேப் டவுன் நகரில் கைது செய்யப்பட்டனர்.
• 1992 – பொசுனியாவின் விடுதலைக்கான பொது வாக்கெடுப்பு ஆரம்பமானது.
• 1996 – சாரயேவோ மீதான செரப்சுக்கா குடியரசின் முற்றுகை முடிவுக்கு வந்தது.
• 1996 – பெரு விமானம் ஒன்று அந்தீசு மலையில் மோதியதில் அதில் பயணம் செய்த அனைத்து 123 பேரும் உயிரிழந்தனர்.
• 2000 – செச்சினியாவில் 83 உருசிய படையினர் தீவிரவாதிகளின் தாக்குதலில் கொல்லப்பட்டனர்.
• 2004 – எயிட்டியில் இடம்பெற்ற இராணுவப் புரட்சியில் அரசுத்தலைவர் சான்-பெட்ரான்ட் அரிசுட்டைடு பதவியில் இருந்து அகற்றப்பட்டார்.
• 2012 – உலகின் மிகப்பெரிய கோபுரம் தோக்கியோ இசுக்கைட்றீ கட்டி முடிக்கப்பட்டது. இதன் உயரம் 634 மீட்டர்கள் ஆகும்.

பிறப்புகள்

• 1468 – மூன்றாம் பவுல் (திருத்தந்தை) (இ. 1549)
• 1896 – மொரார்ஜி தேசாய், இந்தியாவின் 4-வது பிரதமர் (இ. 1995)
• 1904 – ருக்மிணி தேவி அருண்டேல், பரத நாட்டியக் கலைஞர். (இ. 1986)
• 1924 – மா. இளையபெருமாள், தமிழகப் பேராசிரியர். கவிஞர், மொழிபெயர்ப்பாளர் (இ. 1984)
• 1928 – ஜீன் ஆடம்சன், ஆங்கிலேய எழுத்தாளர் (இ. 2024)
• 1932 – சி. எஸ். சேசாத்திரி, இந்தியக் கணிதவியலாளர்
• 1936 – வீ. செல்வத்துரை, மலேசியத் தமிழ் எழுத்தாளர்
• 1940 – மறைமுதுவர் முதலாம் பர்த்தலமேயு
• 1952 – க. சிறீபவன், இலங்கையின் 44-வது தலைமை நீதிபதி
• 1976 – பிரகாசு நஞ்சப்பா, இந்தியக் குறிவைத்துச் சுடும் வீரர்

இறப்புகள்

• 468 – ஹிலாரியுஸ் (திருத்தந்தை)
• 2004 – லோரி வில்மோட், தென்னாப்பிரிக்கத் துடுப்பாளர் (பி. 1943)
• 2016 – குமரிமுத்து, தமிழ்த் திரைப்பட நடிகர்

அரிதான லீப் நாள் மைல்கற்கள்

உலகின் குறிப்பிடத்தக்க நபர்களில் தாஸ்மானியா முதலமைச்சர் ஜேம்ஸ் வில்சன் (1812-1880) என்பவரே பெப்ரவரி 29 இல் பிறந்து அதே நாளில் இறந்தார்.

சிறப்பு நாள்

• அரிய நோய் நாள் (நெட்டாண்டுகளில்; சாதாரண ஆண்டுகளில் பெப்ரவரி 28 இல்)